ສູນກາງສະຫະພັນແມ່ຍິງລາວ (ສສຍລ) ໄດ້ຈັດກອງປະຊຸມຄົບຄະນະບໍລິຫານງານກາງສະໄໝ ສສຍລ ສະໄໝທີ VIII ຂຶ້ນໃນລະຫວ່າງວັນທີ 5-6 ທັນວານີ້ ທີ່ສູນອົບຮົມແມ່ຍິງລາວ ບ້ານໂພນທັນ ນະຄອນຫຼວງວຽງຈັນ ໂດຍການເປັນປະທານຂອງທ່ານນາງອາລີ ວົງໜໍ່ບຸນທຳ ກຳມະການສູນກາງພັກ ປະທານຄະນະບໍລິຫານງານ ສສຍລ, ມີແຂກຖືກເຊີນ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ທ່ານນາງອາລີວົງໜໍ່ບຸນທຳ ກ່າວວ່າ: ໃນໄລຍະ 2 ປີກວ່າຜ່ານມາ, ຄະນະປະທານ ສສຍລ, ຄະນະບໍລິຫານງານ ສສຍລ, ຄະນະປະທານສະຫະພັນແມ່ຍິງບັນດາກະຊວງ, ອົງການ, ແຂວງ ແລະ ນະຄອນຫຼວງວຽງຈັນໄດ້ພ້ອມກັນຕັ້ງໜ້າ, ເອົາໃຈໃສ່ນຳພາ-ຊີ້ນຳຈັດຕັ້ງຜັນຂະຫຍາຍ ແລະປະຕິບັດມະຕິກອງປະຊຸມໃຫຍ່ຜູ້ແທນຍິງລາວທົ່ວປະເທດຄັ້ງທີ VIII (2021-2025) ເປັນແຜນການ, ແຜນງານ, ໂຄງການ ແລະກິດຈະກໍາສະເພາະໃນຂອບເຂດຄວາມຮັບຜິດຊອບຂອງຕົນດ້ວຍຄວາມເປັນເຈົ້າການ ແລະມີຄວາມຮັບຜິດຊອບສູງ.ສະນັ້ນ, ກອງປະຊຸມໃນຄັ້ງນີ້ໄດ້ພ້ອມກັນສະຫຼຸບ, ຕີລາຄາໝາກຜົນຕົວຈິງວຽກງານຮອບດ້ານຂອງສະຫະພັນແມ່ຍິງລາວໃນໄລຍະກາງສະໄໝ (2021-2023) ທີ່ຜ່ານມາ ເພື່ອພ້ອມກັນປຶກສາຫາລືແລກປ່ຽນຄຳຄິດຄຳເຫັນຮ່ວມກັນ ຊອກໃຫ້ເຫັນທ່າແຮງບົ່ມຊ້ອນພາຍໃນ, ຂໍ້ຄົງຄ້າງ, ບັນຫາອຸປະສັກກີດຂວາງ, ສິ່ງທ້າທາຍໃນການຈັດຕັ້ງປະຕິບັດວຽກງານ, ບົດຮຽນທີ່ຖອດຖອນໄດ້ ແລະ ເອກະພາບຮ່ວມກັນກໍານົດທິດທາງແຜນວຽກຈຸດສຸມໄລຍະທ້າຍສະໄໝຊຶ່ງເປັນໄລຍະທີ່ປະເທດເຮົາພວມປະສົບກັບຄວາມຫຍຸ້ງຍາກທາງດ້ານເສດຖະກິດ-ການເງິນ ເພື່ອສືບຕໍ່ນໍາພາ-ຊີ້ນໍາການຈັດຕັ້ງປະຕິບັດຕົວຈິງຢູ່ແຕ່ລະຂັ້ນ, ແຕ່ລະທ້ອງຖິ່ນຮາກຖານໃຫ້ສໍາເລັດຕາມຄາດໝາຍວາງໄວ້. 
ກອງປະຊຸມຄັ້ງນີ້ໄດ້ປຶກສາຫາປະກອບຄໍາເຫັນຕໍ່ບາງເອກະສານເປັນຕົ້ນ ມາດຖານພັດທະນາດີເດັ່ນ, ໂຄງສ້າງຂອງຮ່າງບົດລາຍງານການເມືອງ ແລະການນໍາສະເໜີແນວຄວາມຄິດໃນການຮ່າງແຜນພັດທະນາແມ່ຍິງແຫ່ງຊາດສະໄໝທີ IX (2026-2030) ເພື່ອກະກຽມໃຫ້ແກ່ການດໍາເນີນກອງປະຊຸມໃຫຍ່ 3 ຂັ້ນຂອງແຕ່ລະພາກສ່ວນ ແລະ ກອງປະຊຸມໃຫຍ່ຜູ້ແທນແມ່ຍິງລາວທົ່ວປະເທດສະໄໝທີ IX ທີ່ຈະມາເຖິງ. ພ້ອມນີ້ຍັງໄດ້ດຳເນີນຊີວິດການເມືອງຄົບຄະນະບໍລິຫານງານ ສສຍລ ສະໄໝທີ VIII ແລະສໍາຫຼວດບຸກຄົນໃນຄະນະບໍລິຫານງານຕາມກົດລະບຽບວາງໄວ້ ເພື່ອເຫັນໄດ້ຄວາມຮັບຜິດຊອບລວມຕໍ່ໜ້າທີ່ການເມືອງຂອງຄະນະບໍລິຫານງານ ແລະບຸກຄົນໃນການນໍາພາ-ຊີ້ນໍາຕົວຈິງຢູ່ໃນຂອບເຂດຄວາມຮັບຜິດຊອບຕົນ. ໃນຕອນທ້າຍກອງປະຊຸມຈະໄດ້ຮັບຟັງການໂອ້ລົມຊີ້ທິດເຍືອງທາງຈາກການນຳຂັ້ນສູງຕື່ມອີກ. 
ຂ່າວ-ພາບ: ວັນເພັງ