ກອງປະຊຸມຄົບຄະນະບໍລິຫານງານພັກ ເປີດກວ້າງຄັ້ງທີ 10 ສະໄໝທີ IV ຂອງກະຊວງແຜນການ ແລະ ການລົງທຶນ(ຜທ) ໄດ້ຈັດຂຶ້ນໃນວັນທີ 14 ກຸມພານີ້ ທີ່ກະຊວງດັ່ງກ່າວ ໂດຍການເປັນປະທານ ຂອງສະຫາຍ ຄຳເຈນ ວົງໂພສີ ກຳມະການສູນກາງພັກເລຂາຄະນະພັກລັດຖະມົນຕີກະຊວງແຜນການ ແລະ ການລົງທຶນ,ມີສະຫາຍຮອງເລຂາຄະນະພັກ,ຄະນະປະຈຳພັກ,ຄະນະພັກ,ເລຂາໜ່ວຍພັກ,ຄະນະໜ່ວຍພັກ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ກອງປະຊຸມຄັ້ງນີ້ໄດ້ສະຫຼຸບຕີລາຄາການນໍາພາ-ຊີ້ນໍາວຽກງານຂອງຄະນະບໍລິຫານງານພັກກະຊວງແຜນການ ແລະ ການລົງທຶນ ປະຈຳປີ 2023 ແລະ ແຜນວຽກຈຸດສຸມໃນປີ 2024,ສະຫຼຸບຕີລາຄາຄືນການຈັດຕັ້ງຜັນຂະຫາຍຜົນຂອງການດໍາເນີນຊີວິດການເມືອງກາງສະໄໝ ຂອງໜ່ວຍພັກໃນໄລຍະຜ່ານມາ,ເຜີຍແຜ່ແຜນການກະກຽມດໍາເນີນກອງປະຊຸມໃຫຍ່ຂັ້ນຮາກຖານພັກ, ຄະນະພັກຮາກຖານ ແລະ ກອງປະຊຸມໃຫຍ່ ຄັ້ງທີ V ຂອງອົງຄະນະພັກກະຊວງ ຜທ ສະບັບເລກທີ 178/ ຄຈພ.ກຜທ, ລົງວັນທີ 13 ທັນວາ 2023,ເຜີຍແຜ່ມະຕິຕົກລົງ ວ່າດ້ວຍການແຕ່ງຕັ້ງຄະນະຊີ້ນຳລວມໃນການກະກຽມກອງປະຊຸມໃຫຍ່ຂັ້ນຮາກຖານພັກ, ຄະນະພັກຮາກຖານ ແລະ ກອງປະຊຸມໃຫຍ່ ຄັ້ງທີ V ຂອງອົງຄະນະພັກກະຊວງ ຜທ ສະບັບເລກທີ 179/ຄຈພ.ກຜທ, ລົງວັນທີ 13 ທັນວາ 2023 ແລະ ເຜີຍແຜ່ຄໍາແນະນໍາກ່ຽວກັບການກະກຽມກອງປະຊຸມໃຫຍ່ຂັ້ນຮາກຖານພັກ, ຄະນະພັກຮາກຖານ ທົ່ວອົງຄະນະພັກກະຊວງ ຜທ ປີ 2024 ສະບັບເລກທີ 180/ຄຈພ.ກຜທ, ລົງວັນທີ13 ທັນວາ 2023, ໃນນັ້ນກອງປະຊຸມຜູ້ເຂົ້າຮ່ວມຍັງໄດ້ສຸມສະຕິປັນຍາ ແລະ ປະກອບຄໍາຄິດ, ຄໍາເຫັນຕໍ່ເນື້ອໃນຕ່າງໆ ຢ່າງກົງໄປກົງມາດ້ວຍຄວາມຮັບຜິດຊອບສູງ ແລະ ໄດ້ລົງເລິກຕີລາຄາຄືນກ່ຽວກັບ ການນໍາພາ-ຊີ້ນໍາ ວຽກງານຮອບດ້ານ ຂອງຄະນະພັກກະຊວງ ແລະ ຄວາມຮັບຜິດຊອບ ຂອງຄະນະພັກຮາກຖານ, ບັນດາໜ່ວຍພັກຕ່າງໆຕື່ມອີກ.
ໂອກາດດັ່ງກ່າວ ສະຫາຍ ຄຳເຈນ ວົງໂພສີໄດ້ໂອ້ລົມ ຊຶ່ງໄດ້ສະແດງຄວາມຍ້ອງຍໍຊົມເຊີຍຕໍ່ການຊີ້ນຳ ແລະ ນຳພາຂອງອົງຄະນະພັກກະຊວງຜທ,ຜ່ານມາສາມາດມີຜົນສຳເລັດຫຼາຍດ້ານ ແລະ ໄດ້ເນັ້ນໃຫ້ຄະນະພັກຮາກຖານ,ບັນດາໜ່ວຍພັກ ແລະ ບັນດາສະຫາຍສະມາຊິກພັກຕ້ອງສືບຕໍ່ກຳແໜ້ນແນວທາງ,ມະຕິຄຳສັ່ງຂອງສູນກາງພັກ ກໍຄືລັດຖະບານ ໂດຍສະເພາະຕ້ອງກຳແໜ້ນເອກະສານຕ່າງໆ,ສຳລັບການກະກຽມໃຫ້ແກ່ກອງປະຊຸມ 3 ຂັ້ນ ບົນພື້ນຖານນັ້ນຕ້ອງເອົາໃຈໃສ່ກະກຽມດຳເນີນກອງປະຊຸມໜ່ວຍພັກຂອງຕົນໃຫ້ສຳເລັດຕາມແຜນການຂອງອົງຄະນະພັກກະຊວງ ຜທທີ່ວາງອອກ,ຄະນະພັກຮາກຖານ,ບັນດາໜ່ວຍພັກຕ້ອງເອົາໃຈໃສ່ວຽກງານສຶກສາອົບຮົມການເມືອງ-ແນວຄິດ ແລະ ວຽກງານປັບປຸງ-ກໍ່ສ້າງພັກຕາມ 5ຫຼັກການ ແລະ 3 ທິດນຳໃນກົດລະບຽບຂອງພັກສະໄໝທີ XI ຂອງພັກແລະຄຳສັ່ງຂອງກົມການເມືອງສູນກາງພັກວ່າດ້ວຍການເພີ່ມທະວີກໍ່ສ້າງໜ່ວຍພັກ,ປອດໃສ,ເຂັ້ມແຂງ,ໜັກແໜ້ນ,ຄະນະພັກຮາກຖານ,ບັນດາໜ່ວຍພັກ ແລະ ສະມາຊິກພັກ ຕ້ອງໄດ້ສືບຕໍ່ເອົາໃຈໃສ່ແກ້ໄຂຂໍ້ຄົງຄ້າງຕໍ່ການດຳເນີນຊີວິດການເມືອງ ກາງສະໄໝຂອງບັນດາໜ່ວຍພັກຕົນໃນໄລຍະຜ່ານມາໃຫ້ປະກົດຜົນເປັນຈິງ,ວຽກງານຂະຫຍາຍພັກໃຫ້ແຕ່ລະໜ່ວຍພັກເອົາໃຈໃສ່ ຈັດຕັ້ງຜັນຂະຫຍາຍຕາມກົດລະບຽບພັກສະໄໝທີ XI, ການຂະຫຍາຍພັກຖືຄຸນນະພາບເປັນກົກ, ພ້ອມປະຕິບັດຕາມຄໍາແນະນໍາ ເລກທີ 102/ຄຈສພ, ລົງວັນທີ 24 ມິຖຸນາ 2021 ກ່ຽວກັບການຈັດຕັ້ງປະຕິບັດກົດລະບຽບພັກ ສະໄໝທີ XI ແລະ ພ້ອມກັນຈັດຕັ້ງປະຕິບັດຢ່າງເຂັ້ມງວດ,ໃຫ້ປັບປຸງແບບແຜນນໍາພາ ແລະ ວິທີເຮັດວຽກ ຂອງຄະນະໜ່ວຍພັກ ແລະ ຄະນະພັກຮາກຖານໃນກະຊວງ ຜທ ໂດຍຢຶດໝັ້ນ ແລະ ປະຕິບັດຢ່າງເຂັ້ມງວດຫຼັກການນຳພາຂອງພັກ,ເພີ່ມທະວີການນໍາພາ-ຊີ້ນໍາເພື່ອສ້າງການຫັນປ່ຽນທີ່ແຂງແຮງ,ເລິກເຊິ່ງໃນວຽກງານພະນັກງານ ແນໃສ່ສ້າງໃຫ້ມີກຳລັງຖັນແຖວພະນັກງານໜຸ່ມ ທີ່ມີຄວາມໜັກແໜ້ນ, ເຂັ້ມແຂງ, ຈົງຮັກພັກດີ ຕໍ່ພັກຕໍ່ປະເທດຊາດ ແລະ ປະຊາຊົນ, ມີຄວາມຮັບຜິດຊອບສູງ, ຫ້າວຫັນບຸກບືນ, ເອົາການງານໃນການປະຕິບັດໜ້າທີ່ການເມືອງທີ່ໄດ້ຮັບມອບໝາຍ,ຄະນະພັກກະຊວງ ແລະ ບັນດາຮາກຖານພັກຕ້ອງເພີ່ມທະວີວຽກງານຕິດຕາມ-ກວດກາ,ສະກັດກັ້ນ ແລະ ຕ້ານການສໍ້ລາດບັງຫຼວງໃຫ້ເປັນປົກກະຕິ ແລະ ແທດເຖິງທຸກກົມ,ທຸກພະແນກການ ແລະ ດ້ານວຽກງານວິຊາສະເພາະ ບັນດາສະຫາຍກຳມະການພັກກະຊວງ ແລະ ຄະນະໜ່ວຍພັກຈົ່ງສືບຕໍ່ເອົາໃຈໃສ່ເປັນເສນາທິການໃຫ້ແກ່ຄະນະພັກ-ຄະນຳກະຊວງ ຜທ,ຊຸກຍູ້ບັນດາກົມວິຊາການຈັດຕັ້ງປະຕິບັດວຽກງານຂອງຕົນໃຫ້ສຳເລັດຕາມກຳນົດເວລາ ແລະ ເອົາໃຈໃສ່ປະສານກັບຂະແໜງການກ່ຽວຂ້ອງຢູ່ຂັ້ນສູນກາງ ແລະ ທ້ອງຖິ່ນໃຫ້ຈອດກັນ.
(ຂ່າວ-ພາບ:ສຳນານ)