ກອງປະຊຸມຄົບຄະນະບໍລິຫານງານພັກກະຊວງຍຸຕິທຳ ຄັ້ງທີ XI ສະໄໝທີ V ໄດ້ຈັດຂຶ້ນໃນວັນທີ 4 ຕຸລານີ້ທີ່ກະຊວງຍຸຕິທຳ ໂດຍການເປັນປະທານຂອງສະຫາຍ ໄພວີ ສີບົວລິພາ ເລຂາຄະນະພັກ ລັດຖະມົນຕີກະຊວງຍຸຕິທຳ, ເປັນກຽດເຂົ້າຮ່ວມຂອງສະຫາຍນາງ ວຽງທອງ ສີພັນດອນ ຄະນະເລຂາທິການສູນກາງພັກ ປະທານສານປະຊາຊົນສູງສຸດ,ມີຄະນະພັກ, ສະມາຊິກພັກເຂົ້າຮ່ວມ.
    ສະຫາຍ ໄພວີ ສີບົວລິພາ ກ່າວວ່າ: ກອງປະຊຸມຄັ້ງນີ້,ຈະໄດ້ພ້ອມກັນສະຫຼຸບຕີລາຄາຄືນການຈັດຕັ້ງປະຕິບັດວຽກງານໃນໄລຍະຜ່ານມາ, ຮັບຟັງການສະຫຼຸບຕີລາຄາການຊີ້ນຳ-ນຳພາຂອງຄະນະບໍລິຫານງານພັກກະຊວງປະຈຳໄຕມາດ III/2023 ແລະ ທິດທາງແຜນການປະຈໍາໄຕມາດ IV/2023; ຮັບຟັງກ່ຽວກັບການກະກຽມສ້າງຕັ້ງອົງການປະຕິບັດຄໍາຕັດສິນຂອງສານ, ຮັບຟັງກ່ຽວກັບວຽກງານສ້າງບຸກຄະລາກອນກົດໝາຍ, ຮັບຟັງລາຍງານຜົນການລົງເຄື່ອນໄຫວວຽກງານຍຸຕິທໍາຮາກຖານປະຈໍາປີ 2023,ຮັບຟັງການຈັດຕັ້ງປະຕິບັດງົບປະມານ 9 ເດືອນຜ່ານມາ ແລະ ແຜນການ 3 ເດືອນທ້າຍປີ ແລະ ຄາດຄະເນແຜນການລົງທຶນຂອງລັດປະຈໍາປີ 2024; ຮັບຟັງການກະກຽມກອງປະຊຸມວຽກງານຍຸຕິທຳປະຈຳປີ 2023 ຊຶ່ງບັນດາເນື້ອໃນທີ່ນໍາມາສະເໜີໃນຄັ້ງນີ້ ລ້ວນແຕ່ມີຄວາມໝາຍ-ສໍາຄັນເພື່ອເຮັດໃຫ້ເນື້ອມີຄວາມຈະແຈ້ງ, ຮັດກຸມ, ຄົບຖ້ວນ, ມີຄວາມເປັນເອກະພາບສູງຕໍ່ບັນຫາຕ່າງໆບົນພື້ນຖານແນວທາງນະໂຍບາຍຂອງພັກ, ກົດລະບຽບຂອງພັກ, ກົດໝາຍ ແລະ ລະບຽບການທີ່ກ່ຽວຂ້ອງ, ຫຼີກເວັ້ນການປະກອບຄຳເຫັນທີ່ມີລັກສະນະລວມໆ; ໃຫ້ສຸມໃສ່ລົງເລິກບັນຫາຕ່າງໆທີ່ຈະຕ້ອງໄດ້ສືບຕໍ່ປັບປຸງແກ້ໄຂໃນຕໍ່ໜ້າ ເພື່ອເຮັດໃຫ້ເນື້ອໃນມີການຫັນປ່ຽນຢ່າງແຂງແຮງເລິກເຊິ່ງທຸກຂອດຂອງວຽກງານ.
    ໂອກາດນີ້, ສະຫາຍນາງ ວຽງທອງ ສີພັນດອນ ໄດ້ໃຫ້ກຽດໂອ້ລົມໂດຍເນັ້ນໜັກໃຫ້ສືບຕໍ່ເພີ່ມທະວີຄວາມເອົາໃຈໃສ່ໃນການສຶກສາອົບຮົມການເມືອງ-ແນວຄິດໃຫ້ຖັນແຖວສະມາຊິກພັກ, ພະນັກງານ, ຕ້ອງສ້າງພັກໃຫ້ມີຄວາມປອດໃສ, ເຂັ້ມແຂງ, ໜັກແໜ້ນຕິດພັນກັບການເສີມຂະຫຍາຍຄວາມເປັນເຈົ້າການ,ຄວາມຮັບຜິດຊອບການເມືອງໃນການຄຸ້ມຄອງລັດ,ຄຸ້ມຄອງສັງຄົມດ້ວຍກົດໝາຍ,ຕ້ອງເອົາໃຈໃສ່ສ້າງປັບປຸງກົດໝາຍ ແລະ ນິຕິກຳໃຕ້ກົດໝາຍໃຫ້ສອດຄ່ອງກັບແນວທາງປ່ຽນແປງໃໝ່,ຍົກສູງປະສິດທິພາບຂອງການຕິດຕາມ,ກວດກາການປະຕິບັດໜ້າທີ່ຂອງສະມາຊິກພັກ-ພະນັກງານ ພ້ອມທັງມາດຕະການເຂັ້ມງວດ ແລະ ເດັດຂາດຕໍ່ສະມາຊິກພັກ-ພະນັກງານທີ່ລະເມີດກົດໝາຍ,ເອົາໃຈໃສ່ປັບປຸງດ້ານແບບແຜນນຳພາ,ວິທີເຮັດວຽກຂອງຄະນະພັກ, ພະນັກງານ-ລັດຖະກອນ,ເອົາໃຈໃສນຳພາດ້ານວິຊາສະເພາະວຽກງານບໍລິການກົດໝາຍ ແລະຍຸຕິທຳໃຫ້ມີການຫັນປ່ຽນຢ່າງຕັ້ງໜ້າ.
ຂ່າວ-ພາບ: ບຸນຕອມ