(ສພຊ) ໃນວັນທີ 5 ຕຸລາ ນີ້ ທີ່ຫໍສະພາແຫ່ງຊາດ ໄດ້ຈັດກອງປະຊຸມປະຈຳປີ ຂອງຄະນະເລຂາທິການສະພາແຫ່ງຊາດ ຮ່ວມກັບອົງການພາຍໃນສະພາແຫ່ງຊາດ ແລະ ຄະນະເລຂາທິການສະພາປະຊາຊົນຂັ້ນແຂວງ  ປະຈຳປີ 2023 ໂດຍການເປັນປະທານຂອງທ່ານ ນາງ ປິ່ງຄຳ ລາຊະສິມມາ ເລຂາທິການສະພາແຫ່ງຊາດ ມີບັນດາທ່ານຫົວໜ້າຫ້ອງການສູນກາງພັກ, ຫົວໜ້າຫ້ອງວ່າການສໍານັກງານປະທານປະເທດ, ຫົວໜ້າຫ້ອງວ່າການສຳນັກງານນາຍົກລັດຖະມົນຕີ, ບັນດາທ່ານຮອງປະທານກໍາມາທິການ, ຮອງເລຂາທິການສະພາແຫ່ງຊາດ,  ຮອງຫົວໜ້າສະຖາບັນຄົ້ນຄວ້ານິຕິກໍາສະພາແຫ່ງຊາດ, ເລຂາທິການ, ຮອງເລຂາທິການສະພາປະຊາຊົນຂັ້ນແຂວງ, ຄະນະກົມ, ສູນ, ຄະນະພະແນກ ແລະ ວິຊາການ ພາຍໃນສະພາແຫ່ງຊາດ.                                         
ໃນກອງປະຊຸມ ຍັງໄດ້ຮັບຟັງການລາຍງານ ຮ່າງບົດສະຫຼຸບການເຄື່ອນໄຫວວຽກງານ ປະຈໍາປີ 2023 ແລະ ທິດທາງແຜນການ ປະຈໍາປີ 2024 ຂອງຄະນະເລຂາທິການສະພາແຫ່ງຊາດ; ຮັບຟັງເຜີຍແຜ່ນິຕິກຳ ກ່ຽວກັບຂໍ້ຕົກລົງວ່າດ້ວຍ ການກຳນົດການໃຊ້ຈ່າຍງົບປະມານຂອງລັດ, ການປະຢັດ ແລະ ການຕ້ານການຟຸ່ມເຟືອຍ ສະບັບເລກທີ 200/ກງ, ລົງວັນທີ 25 ມັງກອນ 2023; ນິຕິກໍາກ່ຽວກັບກົດໝາຍວ່າດ້ວຍ ການຕ້ານສໍໍ້ລາດບັງຫຼວງ ແລະ ຮັບຟັງການປະກອບຄໍາເຫັນແລກປ່ຽນບົດຮຽນຂອງຄະນະເລຂາທິການສະພາປະຊາຊົນຂັ້ນແຂວງ 3 ແຂວງຄື: ແຂວງ ບໍ່ແກ້ວ, ແຂວງ ຄຳມ່ວນ ແລະ ແຂວງ ໄຊສົມບູນ.
                               ຂ່າວ-ພາບ: ກຸກກິກ