ທ່ານ ພົນຈັດຕາວາ ສາຍສະໝີງ ສີວິໄລ ຮອງຫົວໜ້າກົມໃຫຍ່ສັນຕິບານ ຫົວໜ້າກົມຕຳຫຼວດກວດຄົນເຂົ້າ-ອອກເມືອງ (ຕມ) ກະຊວງ ປກສ ໄດ້ຮັບອະນຸຍາດໃຫ້ສຳພາດຕໍ່ນັກຂ່າວໜັງສືພິມປະຊາາຊົນ ໃນວັນທີ 18 ມີນາ ຜ່ານມາ ທີ່ກົມ ຕມ ຕໍ່ກັບການຈັດຕັ້ງປະຕິບັດວຽກງານຄຸ້ມຄອງການເຂົ້າ-ອອກ ສປປ ລາວ ໃຫ້ຮູ້ວ່າ:

ໃນໂອກາດ ວັນສ້າງຕັ້ງພັກປະຊາຊົນ ປະຕິວັດລາວ ທີ່ຈະໄດ້ໝູນວຽນມາບັນຈົບຄົບຮອບ 69 ປີ (22/3/1955-22/3/2024) ຊຶ່ງຕະຫຼອດໄລຍະ 69 ປີທີ່ຜ່ານມາ, ພັກປະຊາຊົນປະຕິວັດລາວ ໄດ້ຜ່ານຜ່າເສັ້ນທາງຢ່າງລະອິດລະອ້ຽວ ແຕ່ມີຜົນງານໃນຫຼາຍດ້ານໃນແຕ່ລະໄລຍະ. ມີຄວາມເສຍສະລະອັນໃຫຍ່ຫຼວງ ແລະ ເຕັມໄປດ້ວຍວິລະກໍາອັນອົງອາດກ້າແກ່ນ. ມາເຖິງປັດຈຸບັນ, ພັກຍິ່ງມີຄວາມເຕີບໃຫຍ່ຂະຫາຍຕົວ ສາມາດຮັກສາສະຖຽນລະພາບທາງດ້ານການເມືອງ, ປະເທດຊາດມີຄວາມສະຫງົບ, ປະຊາຊົນບັນດາເຜົ່າມີ ຄວາມສາມັກຄີເປັນປຶກແຜ່ນແໜ້ນໜາ, ມີຈິດໃຈຮັກຊາດ. ໂດຍພາຍໃຕ້ການນໍາພາ-ຊີ້ນໍາໂດຍກົງຮອບດ້ານ ຂອງພັກ ຕໍ່ກຳລັງປະກອບອາວຸດ ເວົ້າລວມ ເວົ້າສະເພາະ ກຳລັງປ້ອງກັນຄວາມສະຫງົບ ກໍໄດ້ອອກແຮງແຂ່ງຂັນສ້າງຂະບວນການເພື່ອຂໍ່ານັບຮັບຕ້ອນວັນສ້າງຕັ້ງກຳລັງປ້ອງກັນຄວາມສະຫງົບ ຄົບຮອບ 63 ປີ ທີ່ຈະມາເຖິງນີ້ ກັບ ກົມຕໍາຫຼວດກວດຄົນເຂົ້າ-ອອກເມືອງ ກົມໃຫຍ່ສັນຕິບານ ກະຊວງປ້ອງກັນຄວາມະຫງົບ ກໍໄດ້ປະກອບສ່ວນຜົນງານໃນຂອບເຂດຄວາມຮັບຜິດຊອບຂອງຕົນ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ຄືດັ່ງນີ້:

1. ໄດ້ສຳເລັດການປັບປຸງກົງຈັກການຈັດຕັ້ງດ່ານສາກົນໃນຂອບເຂດທົ່ວປະເທດໂດຍຮ່ວມກັບກົມພະນັກງານ, ຫ້ອງການເມືອງ, ບັນດາກອງບັນຊາການ ປກສ ແຂວງ ແລະ ກົມພັດທະນາບໍລິຫານລັດ ກະຊວງພາຍໃນ ໃຫ້ຖືກຕ້ອງຕາມດໍາລັດ ວ່າດ້ວຍດ່ານຊາຍແດນ ແລະ ສະໜາມບິນສາກົາກົນ ເລກທີ 558/ລບ, ລົງວັນທີ 31 ທັນວາ 2018 ໂດຍພາຍໃຕ້ການຊີ້ນໍາ ຂອງຄະນະພັກກົມໃຫຍ່ສັນຕິບານ, ກົມໃຫຍ່ການເມືອງ ກໍຄືການນຳກະຊວງປ້ອງກັນຄວາມສະຫງົບ.

2. ໄດ້ປັບປຸງ, ພັດທະນາ ລະບົບອຸປະກອນເຕັກນິກ ເກັບກໍາຂໍ້ມູນການເດີນທາງເຂົ້າ-ອອກ ສປປ ລາວ ຢູ່ບັນດາດ່ານ ຕມ ສາກົນ ໃນຂອບເຂດທົ່ວປະເທດ ໃຫ້ສາມາດເຊື່ອມໂຍງເຊື່ອມຈອດຖານຂໍ້ມູນ ໃຫ້ເປັນອັນລວມສູນ ສາມາດກວດສອບເປັນລະບົບແບບທັນການໄດ້ ພາຍໃນດ່ານຈຳນວນໜຶ່ງແລ້ວ ແລະ ຍັງກຳລັງສືບຕໍ່ພັດທະນາໄປແຕ່ລະດ່ານຊາຍແດນສາກົນທີ່ຍັງເຫຼືອໃຫ້ສຳເລັດໃນໄວໆນີ້.

3. ໃນປີ 2020 ເປັນຕົ້ນມາ, ຢູ່ດ່ານ ຕມ ສະໜາມບິນສາກົນ 4 ແຫ່ງ ໃນ ສປປ ລາວ (ສະໜາມບິນວັດໄຕ, ຫຼວງພະບາງ, ສະຫວັນນະເຂດ ແລະ ຈໍາປາສັກ) ພວກເຮົາມີລະບົບກວດກາຂໍ້ມູນຜູ້ໂດຍສານລ່ວງໜ້າກ່ອນຂຶ້ນເຮືອບິນ (APPS) ຊຶ່ງເປັນລະບົບທີ່ໄດ້ຊ່ວຍກັ່ນກອງຂໍ້ມູນ ເພື່ອໃຫ້ເຈົ້າໜ້າທີ່ ຕມ ກວດກາ ແລະ ພິຈາລະນາ ອະນຸຍາດ ຫຼື ບໍ່ອະນຸຍາດ ໃຫ້ເດີນທາງເຂົ້າ-ອອກ ຫຼື ຜ່ານ ສປປ ລາວ ໃນເວລາແຈ້ງປີ້ເຮືອບິນຢູ່ປະເທດຕົ້ນທາງ.

4. ພາຍໃຕ້ການນໍາພາຂອງພັກ, ໃນໄລຍະຊຸມປີຜ່ານມາ ກົມຕໍາຫຼວດກວດຄົນເຂົ້າ-ອອກເມືອງ ກໍຍັງໄດ້ອອກບັນດານິຕິກໍາ ເຜີຍແຜ່ໃຫ້ບັນດາດ່ານ ຕມ ຈັດຕັ້ງປະຕິບັດ ເປັນຕົ້ນ:

- ຄໍາແນະນໍາ ກ່ຽວກັບການຜັນຂະຫຍາຍບາງມາດຕາ ຂອງກົດໝາຍ ວ່າດ້ວຍການເຂົ້າ-ອອກ ແລະ ການຄຸ້ມຄອງຄົນຕ່າງະເທດ ຢູ່ ສປປ ລາວ ແລະ ດຳລັດ ເລກທີ 21/ລບ ລົງວັນທີ 20 ມັງກອນ 2021.

- ແຈ້ງການ ກ່ຽວກັບການແກ້ໄຂ ຕໍ່ຜູ້ທີ່ລະເມີດກົດໝາຍ ແລະ ລະບຽບການ ກ່ຽວກັບການເຂົ້າ-ອອກ ແລະ ຄຸ້ມຄອງຄົນຕ່າງປະເທດ ຢູ່ ສປປ ລາວ;

- ແຈ້ງການ ກ່ຽວກັບການນໍາໃຊ້ຕາປະທັບ ສໍາລັບໜັງສືຜ່ານແດນເຫຼັ້ມໃໝ່ ຂອງຄົນຕ່າງປະເທດ ແລະ ຄົນບໍ່ມີສັນຊາດ.

- ແຈ້ງການກ່ຽວກັບເງື່ອນໄຂການນໍາເອົານັກທ່ອງທ່ຽວ ຫຼື ຜູ້ໂດຍສານທີ່ເປັນພົນລະເມືອງ ຂອງປະເທດທີ່ຫ້າມເອົາວີຊາກັບດ່ານ ແລະ ປະເທດເຝົ້າລະວັງທີ່ຈະເດີນທາງເຂົ້າ ສປປ ລາວ.

- ແຈ້ງການ ກ່ຽວກັບເພີ່ມທະວີການຄຸ້ມຄອງ, ຕິດຕາມ, ກວດກາ ການເຂົ້າ-ອອກ ແລະ ການພັກເຊົາຂອງຄົນເຊື້ອຊາດລາວ, ສັນຊາດຕ່າງປະເທດ ແລະ ຄົນເຊື້ອຊາດລາວ ບໍ່ມີສັນຊາດທີ່ເຂົ້າມາທ່ອງທ່ຽວ ຢ້ຽມຢາມ ຢູ່ ສປປ ລາວ.

- ຄໍາແນະນໍາ ກ່ຽວກັບການຕິດຕາມ, ອໍານວຍຄວາມສະດວກ ການເຂົ້າ-ອອກ ສປປ ລາວ ໃນໄລຍະເປີດປີທ່ອງທ່ຽວລາວ 2024 ໃຫ້ມີຄວາມເປັນເອກະພາບທາງດ້ານການຄຸ້ມຄອງ ແລະ ປະຕິບັດກົດໝາຍຂອງ ສປປ ລາວ.

ທ່ານ ພົນຈັດຕາວາ ສາຍສະໝີງ ສີວິໄລ ໃຫ້ຮູ້ຕື່ມວ່າ: ໃນນາມ ເປັນສະມາຊິກພັກ ໃນຍຸກໃໜ່ ຈະຂໍຈົດຈໍາບຸນຄຸນຂອງພັກບໍ່ມີວັນລືມ, ຂໍສັນລະເສີນການນໍາພັກ-ລັດ ທຸກໆທ່ານ ທີ່ໄດ້ເສຍສະຫຼະເຫື່ອແຮງສະຕິປັນຍາ ຊີວິດ, ເລືອດເນື້ອ ບໍ່ຈັກວ່າທໍ່ໃດ ເພື່ອຄວາມສົມບູນພູນສຸກຂອງປະຊາຊົນ, ພ້ອມດ້ວຍຄະນະ ແລະ ພະນັກງານວິຊາສະເພາະ ໃນກຳລັງ ຕມ ກໍຄືກຳລັງສັນຕິບານປະຊາຊົນທຸກທົ່ວໜ້າ ຈະສືບຕໍ່ຕັ້ງໜ້າປະກອບສ່ວນໃນພາລະກິດປ່ຽນແປງໃໝ່ຂອງພັກ ກໍຄື ປະກອບສ່ວນໃນການປົກປັກຮັກສາ ແລະ ສ້າງສາພັດທະນາ ປະເທດຊາດ ເວົ້າສະເພາະ ກົມຕໍາຫຼວດກວດຄົນເຂົ້າ-ອອກເມືອງ ໃຫ້ຈະເລີນກ້າວໜ້າຂຶ້ນໄປເລື້ອຍໆ.

ເນື່ອງໃນໂອກາດວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 69 ປີ, ຂໍອວຍພອນ ໄປຍັງການນຳພັກ-ລັດ ທຸກໆທ່ານ ຈົ່ງມີສຸຂະພາບເຂັ້ມແຂງ, ມີຄວາມສຸກ, ຄວາມຈະເລີນ ແລະ ສຳເລັດພາລະກິດທີ່ພັກ-ລັດມອບໝາຍໃຫ້ຢ່າງມີກຽດສະຫງ່າ.

ຂ່າວ: ພັທ ສຸກສະໄໝ ໄຊຍະແສງ

ພາບ: ຮອ ສີການດາ ພວງມະນີວັນ