ວັນທີ 7 ພຶດສະພາ 2024 ນີ້ ເມືອງໄຊສະຖານ ແຂວງໄຊຍະບູລີໄດ້ດໍາເນີນກອງປະຊຸມຄົບຄະນະ ບໍລິຫານງານພັກເມືອງ ຄັ້ງທີ 15 ສະໄໝທີ II ຂື້ນຢ່າງເປັນທາງການ ຢູ່ທີ່ຫ້ອງປະຊຸມໃຫຍ່ຂອງເມືອງ ໂດຍການເຂົ້າຮ່ວມເປັນກຽດຂອງ ສະຫາຍ ສົມຫວັງ ແກ້ວວິໄລສັກ ກໍາມະການປະຈໍາພັກແຂວງ ປະທານກວດກາພັກ-ລັດແຂວງ ພາຍໃຕ້ການເປັນປະທານຂອງ ສະຫາຍ ສີສະໝອນ ນາມວົງ ເລຂາພັກເມືອງ ເຈົ້າເມືອງ ມີກໍາມະການປະຈໍາພັກເມືອງ ກໍາມະການພັກເມືອງ ເລຂາຄະນະພັກຮາກຖານ ເລຂາໜ່ວຍພັກຫ້ອງການ, ສໍານັກງານ, ອົງການ, ເລຂາໜ່ວຍພັກບ້ານເຂົ້າຮ່ວມ.

ກອງປະຊຸມໃນຄັ້ງນີ້ ສະຫາຍ ສີສະໝອນ ນາມວົງ ເລຂາພັກເມືອງ ເຈົ້າເມືອງ ໄດ້ສະເໜີຈຸດປະສົງພ້ອມທັງກ່າວໄຂກອງປະຊຸມຢ່າງເປັນທາງການແລ້ວ ຜູ້ເຂົ້າຮ່ວມກອງປະຊຸມໄດ້ຮັບຟັງການສະຫຼຸບຕີລາຄາການຈັດຕັ້ງປະຕິບັດມະຕິກອງປະຊຸມຄົບຄະນະບໍລິຫານງານພັກເມືອງ ຄັ້ງທີ 14 ສະໄໝທີ II , ສະຫຼຸບຕີລາການຊີ້ນໍາ-ນໍາພາການຈັດຕັ້ງປະຕິບັດແຜນພັດທະນາເສດຖະກິດ-ສົງຄົມ ໃນໄລຍະ 3 ເດືອນຜ່ານມາ ( 1-2-3 ) ແລະ ທິດທາງແຜນການເດືອນ ( 4-5-6 ) ພ້ອມນີ້ປະທານກອງປະຊຸມຍັງໄດ້ມີຄໍາເຫັນເຈາະຈີມຕໍ່ກັບການຈັດຕັ້ງປະຕິບັດວຽກງານໃນໄລຍະຜ່ານມາ ຈາກນັ້ນບັນດາຜູ້ແທນກອງປະຊຸມກໍ່ໄດ້ມີການຂື້ນປະກອບຄໍາຄິດຄໍາເຫັນຢ່າງກົງໄປກົງມາຕໍ່ກັບການຈັດຕັ້ງປະຕິບັດວຽກງານໃນໄລຍະຜ່ານມາເພື່ອຊອກໃຫ້ເຫັນບັນຫາດ້ານດີ, ດ້ານອ່ອນຂໍ້ຄົງຄ້າງທີ່ຈະໄດ້ພ້ອມກັນສືບຕໍ່ແກ້ໄຂໃນຕໍ່ໜ້າ, ຮັບຟັງການລາຍງານກ່ຽວກັບການເກັບລາຍຮັບເຂົ້າງົບປະມານ ປະຈໍາໄຕມາດ I ແລະ ທິດທາງແຜນການປະຈໍາໄຕມາດ II ປີ 2024, ການເກັບກູ້ຜົນຜະລິດພືດລະດູແລ້ງ, ການຕ້ານ ແລະ ສະກັດກັ້ນໄຟໄໝ້ລາມປ່າ ຕິດພັນກັບການປູກພືດລະດູຝົນ ປີ 2024, ສະພາບການຮຽນ-ການສອນ ແລະບັນຫານັກຮຽນຂາດຮຽນ ຕິດພັນກັບການສອບເສັງພາກຮຽນ ທີ II, ການສ້າງບ້ານຢຸດຕິການຖ່າຍຊະຊາຍ ຈໍານວນ 3 ບ້ານ, ການກະກຽມປະກາດຮັບຮອງເປັນເມືອງຢຸດຕິການຖ່າຍຊະຊາຍ ຕິດພັນກບການຕ້ານ ແລະ ສະກັດກັ້ນພະຍາດທີ່ອາດເກີດຂື້ນໃນລະດູຝົນ, ການເກັບເຂົ້າພັນທະປະຈໍາປີ 3023 ພ້ອມທັງສະເໜີທິດທາງແຜນການ ການເກັບເຂົ້າພັນທະໃນປີ 2024 ຕິດພັນກັບການຈັດຕັ້ງປະຕິບັດວຽກງານປ້ອງກັບຊາດ, ຜ່ານແຜນດໍາເນີນງານ ແລະ ຮ່າງມະຕິແບ່ງຄວາມຮັບຜິດຊອບໃຫ້ຄະນະບໍລິຫານງານພັກເມືອງ ແລະບັນດາຫ້ອງການອ້ອມຂ້າງ ພ້ອມນີ້ ບັນດາຜູ້ແທນກອງປະຊຸມກໍ່ໄດ້ມີການປະກອບຄໍາຄິດຄໍາເຫັນຢ່າງກົງໄປກົງມາ. ຈາກນັ້ນປະທານກອງປະຊຸມຍັງໄດ້ມີຄໍາເຫັນສັງລວມຕໍ່ກັບບັນຫາທີ່ບັນດາຜູ້ແທນກອງປະຊຸມໄດ້ມີການປະກອບຄໍາຄິດ-ຄໍາເຫັນ.

ກອງປະຊຸມໃນຄັ້ງນີ້ຜູ້ເຂົ້າຮ່ວມຍັງໄດ້ຮັບຟັງຄໍາເຫັນໂອ້ລົມ ແລະ ໃຫ້ທິດຊີ້ນໍາຂອງສະຫາຍ ສົມຫວັງ ແກ້ວວິໄລສັກ ກໍາມະການປະຈໍາພັກແຂວງ ປະທານກວດກາພັກ-ລັດແຂວງ. ຕອນທ້າຍກອງປະຊຸມ ສະຫາຍ ສີສະໝອນ ນາມວົງ ເລຂາພັກເມືອງ ເຈົ້າເມືອງ ຍັງໄດ້ຂື້ນຮັບຄໍາໂອວາດ ພ້ອມທັງໄດ້ກ່າວປິດກອງປະຊຸມ.