ໃນວັນທີ 26 ມິຖຸນານີ້ ຮາກຖານພັກພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ແຂວງຄໍາມ່ວນ ໄດ້ຈັດພິທີເລື່ອນສະມາຊິກພັກສຳຮອງ ຂຶ້ນເປັນສະມາຊິກພັກສົມບູນ ໂດຍເປັນກຽດເຂົ້າຮ່ວມຂອງສະຫາຍ ແສງມະນີ ສີລາເພັດ ຮອງເລຂາຄະນະພັກຮາກຖານ ພະແນກ ຖວທ ແຂວງ, ມີຄະນະພັກ ຄະນະໜ່ວຍພັກ, ສະມາຊິກພັກກ່ຽວຂ້ອງເຂົ້າຮ່ວມ.

ການເລື່ອນສະມາຊິກພັກສຳຮອງ ຂຶ້ນເປັນສະມາຊິກພັກສົມບູນຄັ້ງນີ້ມີທັງໝົດ 4 ສະຫາຍ, ຍິງ 1 ສະຫາຍສັງກັດຢູ່ 4 ໜ່ວຍພັກ ທີ່ຂຶ້ນກັບຮາກຖານພັກພະແນກຄື: ໜ່ວຍພັກບໍລິຫານ, ໜ່ວຍພັກຖະແຫຼງຂ່າວ, ໜ່ວຍພັກວັດທະນະທໍາ ແລະ ໜ່ວຍພັກທ່ອງທ່ຽວ ເພື່ອຢັ້ງຢືນການເລື່ອນສະມາຊິກພັກສຳຮອງ ຂຶ້ນເປັນສະມາ ຊິກພັກສົມບູນ, ໃນພິທີສະຫາຍຮອງເລຂາພັກຮາກຖານ ພະແນກ ຖວທ ແຂວງ ໄດ້ມອບມະຕິຕົກລົງ ພ້ອມທັງມີຄໍາເຫັນເນັ້ນໃຫ້ສະມາຊິກພັກທີ່ໄດ້ຮັບການອະນຸມັດໃນຄັ້ງນີ້ ສືບຕໍ່ເອົາໃຈໃສ່ຕັ້ງໜ້າເຊີດຊູບົດບາດການນໍາພາຂອງພັກໃຫ້ກ້າວຂຶ້ນສູ່ຄຸນນະພາບໃໝ່ ໂດຍສະເພາະການປະຕິບັດກົດລະບຽບຂອງພັກ ປະກອບສ່ວນເຂົ້າໃນການປັບປຸງ-ກໍ່ສ້າງພັກ ໃຫ້ກາຍເປັນໜ່ວຍພັກປອດໃສ ເຂັ້ມແຂງ ໜັກແໜ້ນ, ເອົາໃຈໃສ່ປັບປຸງແບບແຜນວິທີເຮັດວຽກ, ປະຕິບັດໜ້າທີ່ວຽກງານວິຊາສະເພາະຂອງຕົນ, ຮັບໃຊ້ໜ້າທີ່ການເມືອງຂອງພັກຢ່າງເຂັ້ມແຂງ, ມີຄວາມສາມັກຄີເປັນເອກະພາບໃນໝູ່ຄະນະ, ຝຶກຝົນຫຼໍ່ຫຼອມຕົນເອງໃຫ້ກາຍເປັນສະມາຊິກພັກທີ່ມີຄຸນນະພາບ ແລະ ເປັນແບບຢ່າງຮອບດ້ານໃຫ້ແກ່ມະຫາຊົນ. ຂ່າວ: ມະນີວັນ