ສະຫາຍ ບຸນໂຈມ ອຸບົນປະເສີດ ກຳມະການສູນກາງພັກ ເລຂາພັກແຂວງ ເຈົ້າແຂວງສະຫວັນນະເຂດ ເປັນປະທານໃນກອງປະຊຸມຄົບຄະນະບໍລິຫານງານພັກແຂວງສະຫວັນນະເຂດ ຄັ້ງທີ 12 ສະໄໝທີ IX ຊຶ່ງຈັດຂຶ້ນໃນວັນທີ 11 ຕຸລາ ນີ້ ທີ່ຫ້ອງປະຊຸມຫ້ອງວ່າການປົກຄອງແຂວງ ຊຶ່ງມີສະຫາຍຮອງເລຂາພັກແຂວງ, ຄະນະປະຈຳພັກແຂວງ, ກຳມະການພັກແຂວງ, ເລຂາພັກເມືອງ-ນະຄອນ ພ້ອມດ້ວຍຄະນະພັກ-ຄະນະນຳຈາກພະແນກການ, ກົມກອງທີ່ກ່ຽວຂ້ອງເຂົ້າຮ່ວມຢ່າງພ້ອມພຽງ.

ໂອກາດນີ້, ສະຫາຍ ບຸນໂຈມ ອຸບົນປະເສີດ ກໍໄດ້ກ່າວເປີດກອງປະຊຸມຢ່າງເປັນທາງການ ພ້ອມທັງໄດ້ນຳພາດຳເນີນກອງປະຊຸມໃຫ້ໄປຕາມວາລະສຳຄັນທີ່ວາງໄວ້ໂດຍສະຫາຍໄດ້ມີການເຈາະຈີ້ມໃນຫຼາຍ ບັນຫາກ່ຽວກັບການນຳພາ-ຊີ້ນຳຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ໄດ້ຮຽກຮ້ອງໃຫ້ບັນດາສະຫາຍໃນຄະນະບໍລິຫານງານພັກແຂວງ ເປັນເຈົ້າການໃນການປະກອບຄຳຄິດເຫັນຢ່າງກົນໄປກົງມາ ແລະ ປຶກສາຫາລືຮ່ວມກັນໃນການແກ້ໄຂບັນຫາສຳຄັນຕ່າງໆ ທີ່ຍົກຂຶ້ນມາໃນກອງປະຊຸມຄັ້ງນີ້.

ກອງປະຊຸມ, ໄດ້ຮັບຟັງການຜ່ານຮ່າງບົດສະຫຼຸບຕີລາຄາການນໍາພາ-ຊີ້ນໍາຈັດຕັ້ງປະຕິບັດວຽກງານຮອບດ້ານໄລຍະ 3 ເດືອນ (7-8-9) ແລະ ທິດທາງແຜນການ 3 ເດືອນທ້າຍປີ 2023 ທີ່ນຳສະເໜີໂດຍສະຫາຍ ພູວັງ ເກດແກ້ວພົມພອນ ຮອງເລຂາພັກແຂວງ ຈາກນີ້,ກໍຍັງໄດ້ຮັບຟັງການລາຍງານສະພາບການປາກົດການຫຍໍ້ທໍ້ທີ່ເກີດຂຶ້ນໃນສັງຄົມ ແລະ ການແກ້ໄຂເຮັດໃຫ້ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍ, ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ການຈັດຕັ້ງປະຕິບັດແຜນງົບ ປະມານ ປະຈຳງວດ 3 ແລະ ແຜນການປະຈຳງວດ 4 ພ້ອມນີ້, ບັນດາສະຫາຍທີ່ເຂົ້າຮ່ວມ ກໍໄດ້ປະກອບຄຳເຫັນໃນຫຼາຍໆບັນຫາສຳຄັນເປັນຕົ້ນ: ກ່ຽວກັບສະພາບການເປີດສົກຮຽນການຮຽນ-ການສອນໂຮງຮຽນສາມັນແຫ່ງຕ່າງໆໃນທົ່ວແຂວງ ຕິດພັນກັບການແກ້ໄຂບັນຫາຄູອາສາ ແລະ ການຂາດຄູສອນ, ສະພາບການຮັກສາສຸຂະພາບຊຸມຊົນ, ການສະກັດກັ້ນພະຍາດຕາມລະດູການ ຕິດພັນກັບການແກ້ໄຂຫາງສຽງສັງຄົມ ທີ່ສະທ້ອນຕໍ່ການບໍລິການ ແລະ ການນຳພາ-ຄຸ້ມຄອງຢູ່ໂຮງໝໍແຂວງ, ການແກ້ໄຂໂຮງງານໄມ້, ໂຮງງານເຟີນີເຈີ, ໂຮງງານຖ່ານດຳ-ຖ່ານຂາວອອກຈາກ 3 ປະເພດປ່າ ຕິດພັນກັບບັນດາມາດຕະຖານຂອງບັນດາໂຮງງານດັ່ງກ່າວ ແລະ ທິດທາງແກ້ໄຂຕົວຈິງໃນຕໍ່ໜ້າ, ຮັບຟັງການລາຍງານສະພາບການຜະລິດລະດູຝົນ ເພື່ອທົດແທນການນຳເຂົ້າ, ສະພາບການເໜັງຕີງຂອງລາຄາສິນຄ້າຢູ່ທ້ອງຕະຫຼາດ ຕົ້ນທຶນການຜະລິດ, ວິທີການ ແລະ ມາດຕະການແຊກແຊງລາຄາສິນຄ້າຂອງແຂວງໃນສະພາບເສດຖະກິດປັດຈຸບັນ ມີຄືແນວໃດ, ລາຍງານສະພາບການ, ຮູບການ ແລະ ວິທີການເຄື່ອນໄຫວເຜີຍແຜ່ສາສະໜາຕາເວັນຕົກຢູ່ພາຍໃນແຂວງ ເວົ້າສະເພາະແມ່ນຢູ່ບັນດາເຂດພູດອຍ-ຊົນເຜົ່າຕິດກັບຊາຍແດນ ສສ ຫວຽດ ນາມ, ລາຍງານສະພາບແນວຄິດ ແລະ ຫາງສຽງສັງຄົມ ທີ່ເກີດຂຶ້ນຢູ່ຖັນແຖວສະມາຊິກພັກ-ພະນັກງານ, ທະຫານ, ຕຳຫຼວດ ແລະ ປະຊາຊົນບັນດາເຜົ່າຕໍ່ການນຳພາ-ຊີ້ນຳຂອງພັກ-ລັດໃນສະພາບເສດຖະກິດ-ສັງຄົມໃນປັດຈຸບັນ.

(ຂ່າວ-ພາບ: ສະຫວັນນະເຂດ)