ໃນຕອນເຊົ້າວັນທີ 24 ກໍລະກົດນີ້, ທີ່ຫໍວັດທະນະທຳໄກສອນພົມວິຫານ ໄດ້ເປີດກອງປະຊຸມສະໄໝສາມັນເທື່ອທີ 7 ຂອງສະພາປະຊາຊົນແຂວງ(ສພຂ)ສະຫວັນນະເຂດ ຊຸດທີ II ຂຶ້ນຢ່າງເປັນທາງການ ໂດຍການເປັນປະທານຂອງທ່ານ ກົງແກ້ວ ມີວໍລະຈັກ ຮອງເລຂາພັກແຂວງ ປະທານສະພາປະຊາຊົນແຂວງ, ໃຫ້ກຽດເຂົ້າຮ່ວມໃນພິທີຄັ້ງນີ້ມີທ່ານ ນາງ ສູນທອນ ໄຊຍະຈັກ ຄະນະເລຂາທິການສູນກາງພັກ ຮອງປະທານສະພາແຫ່ງຊາດ, ສະມາຊິກສະພາແຫ່ງຊາດ ເຂດເລືອກຕັ້ງທີ 13, ທ່ານ ບຸນໂຈມ ອຸບົນປະເສີດ ກຳມະການສູນກາງພັກເລຂາພັກແຂວງ ເຈົ້າແຂວງສະຫວັນນະເຂດ, ບັນດາທ່ານສະມາຊິກສະພາແຫ່ງຊາດ(ສສຊ) ປະຈໍາເຂດ 13, ສະມາຊິກສະພາປະຊາຊົນແຂວງ (ສສຂ) ແລະພາກສ່ວນຕ່າງໆທີ່ກ່ຽວຂ້ອງເຂົ້າຮ່ວມຢ່າງພ້ອມພຽງ.

ໂອກາດນີ້, ທ່ານ ກົງແກ້ວ ມີວໍລະຈັກ ໄດ້ກ່າວເປີດກອງປະຊຸມຢ່າງເປັນທາງການ ຊຶ່ງມີບາງຕອນສຳຄັນກ່າວວ່າ: ໃນກອງປະຊຸມສະໄໝສາມັນເທື່ອທີ 7 ຂອງສະພາປະຊາຊົນແຂວງ ຊຸດທີ II ຈະໄດ້ຮັບຟັງການລາຍງານ ພ້ອມທັງພິຈາລະນາ, ຮັບຮອງເອົາບັນຫາສຳຄັນຂອງແຂວງດັ່ງນີ້: 1. ບົດລາຍງານໂດຍຫຍໍ້ຂອງທ່ານເຈົ້າແຂວງສະຫວັນນະເຂດ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດຂອງແຂວງ, ແຜນເງິນຕາ ຕິດພັນກັບການຈັດຕັ້ງປະຕິບັດສອງວາລະແຫ່ງຊາດ ໄລຍະ 6 ເດືອນຕົ້ນປີ ແລະທິດທາງແຜນການ 6 ທ້າຍປີ 2024;2. ບົດລາຍງານຂອງພະແນກແຜນການ ແລະການລົງທຶນແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງ ປະຈຳ 6 ເດືອນຕົ້ນປີ ແລະທິດທາງແຜນການ 6 ເດືອນທ້າຍປີ 2024;3.ບົດລາຍງານຂອງພະແນກການເງິນແຂວງ ກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດຂອງແຂວງ ປະຈໍາ 6 ເດືອນຕົ້ນປີ ແລະທິດທາງແຜນການ 6 ເດືອນທ້າຍປີ 2024;4. ບົດລາຍງານຂອງສາຂາທະນາຄານ ແຫ່ງ ສປປ ລາວ ພາກກາງ ແຂວງສະຫວັນນະເຂດ ກ່ຽວກັບການຈັດຕັ້ງປະຕິບັດແຜນເງິນຕາ 6 ເດືອນຕົ້ນປີ ແລະທິດທາງແຜນການ 6 ເດືອນທ້າຍປີ 2024;5. ບົດລາຍງານຂອງພະແນກພະລັງງານ ແລະບໍ່ແຮ່ ກ່ຽວກັບການຈັດຕັ້ງປະຕິບັດບັນດາໂຄງການລົງທຶນແຮ່ທາດໃນແຕ່ລະໄລຍະ ແລະການກຳນົດແຜນການຈັດຕັ້ງປະຕິບັດແຜນການດັ່ງກ່າວໃນຕໍ່ໜ້າ; 6. ບົດລາຍງານຂອງພະແນກກະສິກຳ ແລະປ່າໄມ້ແຂວງ ກ່ຽວກັບການຈັດຕັ້ງປະຕິບັດບັນດາຄາດໝາຍການພັດທະນາຊົນນະບົດ ແລະການແກ້ໄຂຄວາມທຸກຍາກ ໃນໄລຍະຜ່ານມາ ແລະທິດທາງແຜນການໃນຕໍ່ໜ້າ; 7.ພິຈາລະນາ, ຮັບຮອງການສ້າງ ແລະປັບປຸງນິຕິກຳໃຕ້ກົດໝາຍ ທີ່ສ້າງໃໝ່ຈຳນວນ 2 ສະບັບຄື: ຮ່າງຂໍ້ຕົກລົງຂອງທ່ານເຈົ້າແຂວງ ວ່າດ້ວຍການຄຸ້ມຄອງກອງທຶນໄພພິບັດແຂວງ ແລະຮ່າງຂໍ້ຕົກລົງຂອງທ່ານເຈົ້າແຂວງ ວ່າດ້ວຍການຄຸ້ມຄອງ ແລະນຳໃຊ້ທີ່ດິນກະສິກຳ; 8. ບົດລາຍງານການເຄື່ອນໄຫວວຽກງານ ແຕ່ກອງປະຊຸມສະໄໝສາມັນເທື່ອທີ 6 ຫາກອງປະຊຸມສະໄໝສາມັນເທື່ອທີ 7 ແລະທິດທາງແຜນການຮອດກອງປະຊຸມສະໄໝສາມັນເທື່ອທີ 8 ຂອງຄະນະປະຈຳສະພາປະຊາຊົນແຂວງ.

ທ່ານ ກົງແກ້ວ ມີວໍລະຈັກ ຍັງກ່າວຕື່ມອີກວ່າ: ກອງປະຊຸມຄັ້ງນີ້ ຍັງຈະໄດ້ຮັບຟັງການຊີ້ແຈງຂອງອົງການປົກຄອງແຂວງ ແລະພາກສ່ວນທີ່ກ່ຽວຂ້ອງຕໍ່ຄຳຖາມຂອງບັນດາທ່ານສະມາຊິກສະພາແຫ່ງຊາດ ແລະສະມາຊິກສະພາປະຊາຊົນແຂວງ ພ້ອມນີ້, ທ່ານກໍຍັງໄດ້ຮຽກຮ້ອງມາຍັງບັນດາ ສສຊ/ສສຂ ຈົ່ງໄດ້ເຊີດຊູ ແລະນໍາໃຊ້ສິດປະຊາທິປະໄຕ ແລະຄວາມຮັບຜິດຊອບຕໍ່ໜ້າທີ່ການເມືອງຂອງຕົນ ສຸມທຸກສະຕິປັນຍາ, ຄວາມຮູ້ຄວາມສາມາດເຂົ້າໃນການຄົ້ນຄວ້າບັນຫາຕ່າງໆໃຫ້ເລິກເຊິ່ງ, ສ້າງສັນ, ພາວະວິໄສ, ມີເຫດ, ມີຜົນ, ແທດເໝາະກັບຕົວຈິງ ບົນພື້ນຖານແນວທາງປ່ຽນແປງໃໝ່ຂອງພັກ, ລັດຖະທຳມະນູນ, ກົດໝາຍຂອງລັດ ແລະເປັນເຈົ້າການຊ່ວຍກັນຊອກຫາວິທີການແກ້ໄຂບັນດາບັນຫາທີ່ສັງຄົມໃຫ້ຄວາມເປັນຫ່ວງເປັນໃຍ, ເຄັ່ງຮ້ອນ ແລະຮີບດ່ວນໃນປັດຈຸບັນ ເພື່ອໃຫ້ມີຄວາມເປັນເອກະພາບສູງກັບເນື້ອໃນທີ່ນຳເຂົ້າມາພິຈາລະນາ, ຮັບຮອງໃນກອງປະຊຸມຄັ້ງນີ້ ມີຄຸນນະພາບ ແລະສາມາດນໍາໄປຈັດຕັ້ງປະຕິບັດໄດ້ຢ່າງເປັນຮູບປະທຳຢ່າງແທ້ຈິງ. (ຂ່າວ: ສະຫວັນນະເຂດ)