ກອງປະຊຸມຄົບຄະນະບໍລິຫານງານພັກແຂວງຊຽງຂວາງ ຄັ້ງທີ 8 ສະໄໝທີ VIII ເປີດຂຶ້ນໃນວັນທີ 26 ກໍລະກົດ ນີ້ ທີ່ຫ້ອງວ່າການແຂວງ ໂດຍການເປັນປະທານຂອງ ສະຫາຍ ບຸນຈັນ ສີວົງພັນ ກຳມະການສູນກາງພັກ ເລຂາພັກແຂວງ ເຈົ້າແຂວງຊຽງຂວາງ, ມີຄະນະປະຈຳພັກແຂວງ ແລະ ກຳມະການພັກແຂວງເຂົ້າຮ່ວມ.

ກອງປະຊຸມຄັ້ງນີ້ ສະຫາຍ ສູນທອນ ພັນມີໄຊ ຄະນະປະຈຳພັກແຂວງ ຫົວໜ້າຄະນະຈັດຕັ້ງແຂວງ ໄດ້ຜ່ານຄຳສັ່ງຂອງຄະນະເລຂາທິການສູນກາງພັກ ວ່າດ້ວຍການຄາດຄະເນແບ່ງຄວາມຮັບຜິດຊອບ ຂອງຄະນະປະຈຳພັກແຕ່ລະຂັ້ນ, ແຈ້ງການຂອງຄະນະຈັດຕັ້ງສູນກາງ ວ່າດ້ວຍການຄົ້ນຄວ້າ, ເລືອກເຟັ້ນກຳມະການຄະນະບໍລິຫານງານພັກ ຊຸດປະຈຳທີ່ມີອາຍຸກະສຽນເກີນເງື່ອນໄຂ ຕາມທີ່ນິຕິກຳກຳນົດໄວ້ ເພື່ອເປັນເປົ້າໝາຍອອກທາບທາມບຸກຄະລາກອນ ທີ່ຈະອອກຮັບສະໝັກເລືອກຕັ້ງ ເຂົ້າໃນຄະນະບໍລິຫານງານພັກແຕ່ລະຂັ້ນຊຸດໃໝ່ ແລະ ນິຕິກຳອື່ນໆຂອງຂັ້ນເທິງຈຳນວນໜຶ່ງ, ລາຍງານກະກຽມດຳເນີນກອງປະຊຸມໃຫຍ່ 3 ຂັ້ນຂອງພັກ ແລະ ທິດທາງແຜນການຕໍ່ໜ້າ, ການສ້າງແຜນກຳນົດພະນັກງານນຳພາ-ຄຸ້ມຄອງ, ການກະກຽມບຸກຄະລາກອນໃຫ້ກອງປະຊຸມໃຫຍ່ 3 ຂັ້ນຂອງພັກ, ຜົນສຳເລັດການປັບປຸງກົງຈັກການຈັດຕັ້ງ ການປັບປຸງສັບຊ້ອນຕຳແໜ່ງງານຂອງພັກ, ມີໜ່ວຍພັກປອດໃສ ເຂັ້ມແຂງ ໜັກແໜ້ນ ໄດ້ 878 ໜ່ວຍ ກວມ 81,33%, ຂະຫຍາຍມະຫາຊົນກ້າວໜ້າເຂົ້າພັກສຳຮອງ 61 ສະຫາຍ, ເລື່ອນສະມາຊິກສຳຮອງຂຶ້ນສົມບູນ 23 ສະຫາຍ, ເປີດຮຽນສະໜັບສະໜູນ 56 ສະຫາຍ, ຮຽນກົດລະບຽບພັກ 38 ສະຫາຍ, ສາມາດມ້າງລາຍຄະດີຢາເສບຕິດ 175 ລາຍ ຈັບຜູ້ຖືກຫາ 245 ຄົນ, ຢຶດຂອງກາງເຮໂລອິນ 32 ແທ່ງ ແລະ 9ຫໍ່ນ້ອຍ, ຢາບ້າ 190.448 ກຣາມ ແລະ ສິ່ງເສບຕິດປະເພດອື່ນໆອີກຈຳນວນໜຶ່ງ, ທຳລາຍສວນຢາຝິ່ນ 26 ຕອນ ເນື້ອທີ່ 53.529 ເຮັກຕາ, ນຳຕົວຜູ້ຕິດສິ່ງເສບຕິດເຂົ້າສູນບຳບັດ 662 ຄົນ, ປິ່ນປົວດີ ແລະ ສົ່ງກັບຄືນຜູ້ປົກຄອງ 449 ຄົນ, ຍັງບຳບັດຢູ່ສູນ 213 ຄົນ, ສຳເລັດການດຳເນີນກອງປະຊຸມໃຫຍ່ຂອງພັກ ມີ 89 ຄະນະພັກຮາກຖານ ສຳເລັດ 22 ຄະນະພັກຮາກຖານ, ໜ່ວຍພັກຮາກຖານ ແລະ ໜ່ວຍພັກຂຶ້ນກັບຄະນະພັກຮາກຖານ 1.077 ໜ່ວຍ ສຳເລັດ 852 ໜ່ວຍ, ຄະນະພັກກອງບັນຊາການທະຫານແຂວງມີ 8 ຄະນະພັກຮາກຖານ ສຳເລັດ 1 ຄະນະພັກຮາກຖານ, ມີ 28 ໜ່ວຍພັກຂຶ້ນກັບຄະນະພັກຮາກຖານ ສຳເລັດ 18 ໜ່ວຍ, ມີ 14 ໜ່ວຍພັກຮາກຖານ ສຳເລັດ 8 ໜ່ວຍ, ຄະນະພັກກອງບັນຊາການປ້ອງກັນຄວາມສະຫົງບ ມີ 4 ຄະນະພັກຮາກຖານ, ມີ 16 ໜ່ວຍພັກຂຶ້ນກັບຄະນະພັກຮາກຖານ, ມີ 5 ໜ່ວຍພັກຮາກຖານ ສຳເລັດແລ້ວ 100%, ຮາກຖານພັກເມືອງ 7 ເມືອງ ມີ 60 ຄະນະພັກຮາກຖານ, ມີໜ່ວຍພັກຮາກຖານ ແລະ ໜ່ວຍພັກຂຶ້ນກັບຄະນະພັກຮາກຖານຂອງອົງຄະນະພັກເມືອງ 916 ໜ່ວຍ ໃນນີ້ເມືອງ ໜອງແຮດຍັງ 11 ຄະນະພັກຮາກຖານ, ເມືອງພູກູດຍັງ 3 ຄະນະພັກຮາກຖານ, ເມືອງຄຳຍັງ 7 ຄະນະພັກຮາກຖານ, ເມືອງຜາໄຊຍັງ 2 ຄະນະພັກຮາກຖານ, ເມືອງແປກຍັງ 8 ຄະນະພັກຮາກຖານ, ເມືອງຄູນຍັງ 4 ຄະນະພັກຮາກຖານ ແລະ 1 ໜ່ວຍພັກຮາກຖານບ້ານ (ໜ່ວຍພັກບ້ານຊ້າງ) ກະກຽມບຸກຄະລາກອນບໍ່ທັນໄດ້, ເມືອງໝອກຍັງ 1 ໜ່ວຍພັກຮາກຖານບ້ານ (ບ້ານນ້ຳຈາວໃຕ້) ກະກຽມບຸກຄະລາກອນບໍ່ທັນໄດ້.

ຜູ້ແທນກອງປະຊຸມໄດ້ປະກອບຄຳຄິດເຫັນ ເພື່ອເຮັດໃຫ້ແຜນວຽກໃນຕໍ່ໜ້າມີຜົນສຳເລັດ. ໂອກາດ ນີ້ທ່ານເຈົ້າແຂວງຊຽງຂວາງ ໄດ້ມີຄຳເຫັນໂດຍເນັ້ນໜັກໃຫ້ການກະກຽມ ດຳເນີນກອງປະຊຸມໃຫຍ່ 3 ຂັ້ນຂອງພັກມີຄວາມສະຫງົບ, ປະຢັດມັດທະຍັດ, ມອບໃຫ້ຄະນະຈັດຕັ້ງແຂວງ ເປັນເຈົ້າການສົມທົບ ພົວພັນແນະນຳ ແລະ ລົງມືຈັດຕັ້ງປະຕິບັດຕາມນິຕິກຳຂອງຂັ້ນເທິງ, ບົດສະຫຼຸບ ຕ້ອງສັງລວມໂດຍ ຫຍໍ້ເວົ້າວຽກເດັ່ນທີ່ສຸດຈະແຈ້ງ ແຜນຕໍ່ໜ້າເນັ້ນວິທີທາງແກ້ໄຂ, ແຂວງລົງຊ່ວຍເມືອງທາງດ້ານເນື້ອໃນ, ບຸກຄະລາກອນ ແລະ ຂະບວນການ, ມອບໃຫ້ຄະນະວິໄນຂັ້ນແຂວງ ແລະ ເມືອງ ແກ້ໄຂບ້ານຊ້າງໃຫ້ໄວ, ສ້າງຂະບວນການໃຫ້ຟົດຟື້ນ ເປັນຕົ້ນແມ່ນການແກ້ໄຂຄວາມທຸກຍາກໃຫ້ດີຂື້ນເປັນກ້າວໆ.

(ຂ່າວ-ພາບ: ບຸນມີ ແສງທຸມມີ)