ຄະນະກຳມະການລະດັບຊາດປັບປຸງລັດຖະທຳມະນູນໄດ້ຈັດກອງປະຊຸມປະເມີນຜົນການຈັດຕັ້ງປະຕິບັດລັດຖະທຳມະນູນແຫ່ງ ສປປ ລາວ ສະບັບປີ 2015 ຂຶ້ນໃນວັນທີ 29ກໍລະກົດນີ້ທີ່ແຂວງບໍລິຄຳໄຊໂດຍການເປັນປະທານຂອງທ່ານ ຄໍາໄຫຼ ສີປະເສີດ ກໍາມະການສູນກາງພັກ ຮອງປະທານຜູ້ປະຈຳການສູນກາງແນວລາວສ້າງຊາດ(ສນຊ) ຮອງຫົວໜ້າອະນຸກຳມະການໂຄສະນາປັບປຸງລັດຖະທຳມະນູນ, ມີທ່ານ ສອນທະນູ ທຳມະວົງ ເລຂາພັກແຂວງ, ເຈົ້າແຂວງໆບໍລີຄໍາໄຊ, ທ່ານເລື່ອນວິໄລ ຈັນທະລາພັນ ກໍາມະການປະຈໍາພັກແຂວງ ຮອງປະທານສະພາປະຊາຊົນແຂວງ ພ້ອມດ້ວຍພາກສ່ວນກ່ຽວຂ້ອງຈາກ 7 ເມືອງຂອງແຂວງເຂົ້າຮ່ວມ.

ທ່ານເລື່ອນວິໄລ ຈັນທະລາພັນ ໄດ້ໃຫ້ກຽດຂຶ້ນສະເໜີບົດປະເມີນການຈັດຕັ້ງປະຕິບັດລັດຖະທຳມະນູນສະບັບປີ 2015 ວ່າ: ກອງປະຊຸມຄັ້ງນີ້ຈັດຂຶ້ນເພື່ອເປັນການປະເມີນຜົນການຈັດຕັ້ງປະຕິບັດລັດຖະທຳມະນູນແຫ່ງ ສປປ ລາວ ຊຶ່ງເປັນກົດໝາຍພື້ນຖານຂອງຊາດ, ລັດຖະທໍາມະນູນສະບັບທໍາອິດຂອງ ສປປ ລາວ ໄດ້ຖືກຮັບຮອງ ແລະປະກາດໃຊ້ຢ່າງເປັນທາງການໃນປີ 1991, ມາຮອດປັດຈຸບັນເປັນເວລາ 33 ປີ, ໃນໄລຍະຜ່ານມາໄດ້ມີການປັບປຸງ 2 ຄັ້ງຄື: ການປັບປຸງປີ 2003 ແລະ ປີ 2015 ໄດ້ເປັນບ່ອນອີງແກ່ການສ້າງ ແລະ ປັບປຸງບັນດາກົດໝາຍ ເພື່ອເປັນເຄື່ອງມືຂອງລັດໃນການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມດ້ວຍກົດໝາຍ ແລະ ສ້າງເງື່ອນໄຂພື້ນຖານໃຫ້ແກ່ການສ້າງລັດປະຊາທິປະໄຕ ປະຊາຊົນໃຫ້ເປັນລັດທີ່ປົກຄອງດ້ວຍກົດໝາຍດີຂຶ້ນເທື່ອລະກ້າວ. ຜ່ານການຈັດຕັ້ງປະຕິບັດຕົວຈິງ ຍັງມີບາງບົດບັນຍັດຂອງລັດຖະທຳມະນູນບໍ່ທັນສອດຄ່ອງກັບໜ້າທີ່ການເມືອງຂອງພັກ ແລະ ສະພາບການພັດທະນາເສດຖະກິດ-ສັງຄົມໃນໄລຍະປັດຈຸບັນ.

ສະນັ້ນ, ກົມການເມືອງສູນກາງພັກໄດ້ອອກມະຕິ ສະບັບເລກທີ 15/ກມສພ, ລົງວັນທີ 22 ພຶດສະພາ 2024 ວ່າດ້ວຍການແຕ່ງຕັ້ງຄະນະກຳມະການລະດັບຊາດເພື່ອຄົ້ນຄວ້າ ແລະ ປັບປຸງລັດຖະທຳມະນູນໃຫ້ທັນເວລາ ໂດຍໄດ້ວາງແຜນການປັບປຸງລັດຖະທຳມະນູນແຕ່ນີ້ຮອດກາງປີ 2025 ແລະ ຄາດວ່າຈະຖືກຮັບຮອງໃນທ້າຍປີ 2025 ພ້ອມທັງແຕ່ງຕັ້ງກອງເລຂາ ແລະ ອະນຸກຳມະການຕ່າງໆເພື່ອຈັດຕັ້ງປະຕິບັດໃຫ້ສຳເລັດຕາມລະດັບຄາດໝາຍທີ່ວາງໄວ້.

ກອງປະຊຸມຄັ້ງນີ້, ຜູ້ເຂົ້າຮ່ວມໄດ້ຮັບຟັງການສະເໜີບົດປະເມີນການຈັດຕັ້ງປະຕິບັດລັດຖະທຳມະນູນ ສະບັບປີ 2015 ແລະ ຕາງໜ້າແຕ່ລະຂົງເຂດວຽກງານຕ່າງໆ ກໍໄດ້ປະກອບຄໍາຄິດເຫັນສະເໜີບົດຄົ້ນຄວ້າ ເພື່ອແນໃສ່ເຮັດໃຫ້ການປັບປຸງລັດຖະທຳທະນູນສະບັບໃໝ່ມີເນື້ອໃນຄົບຖ້ວນ, ສົມບູນ, ຖືກຕ້ອງ ແລະ ສອດຄ່ອງກັບໜ້າທີ່ການເມືອງໃນໄລຍະໃໝ່.ຂ່າວ-ພາບ: ພູວັນ