ແຂວງຫຼວງນໍ້າທາ ໄດ້ຈັດກອງປະຊຸມສະຫຼຸບຕີລາຄາການຈັດຕັ້ງປະຕິບັດລັດຖະທຳມະນູນສະບັບປີ 2015 ຂຶ້ນໃນວັນທີ 23 ກໍລະກົດຜ່ານມາ ໂດຍການເປັນປະທານຂອງທ່ານ ຄໍາໄຫຼ ສີປະເສີດ ກໍາມະການສູນກາງພັກ ຮອງປະທານຜູ້ປະຈຳການສູນກາງແນວລາວສ້າງຊາດ (ສນຊ) ຮອງຫົວໜ້າອະນຸກຳມະການໂຄສະນາປັບປຸງລັດຖະທຳມະນູນ, ມີປະທານກໍາມາທິການປ້ອງກັນຊາດ-ປ້ອງກັນຄວາມສະຫງົບ, ຮອງຫົວໜ້າອະນຸກໍາມະການເນື້ອໃນ, ຂົງເຂດສະພາປະຊາຊົນແຂວງ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ທ່ານ ຄໍາໄຫຼ ສີປະເສີດ ກ່າວວ່າ: ການປະເມີນຄັ້ງນີ້ ມີຄວາມໝາຍສຳຄັນຫຼາຍເນື່ອງຈາກແມ່ນການປະເມີນຜົນການຈັດຕັ້ງປະຕິບັດນິຕິກຳສູງສຸດຂອງລັດ ຊຶ່ງເປັນກົດໝາຍພື້ນຖານຂອງຊາດ. ລັດຖະທຳມະນູນສະບັບທໍາອິດຂອງ ສປປ ລາວ ໄດ້ຖືກຮັບຮອງ ແລະ ປະກາດໃຊ້ຢ່າງເປັນທາງການໃນປີ 1991, ມາຮອດປັດຈຸບັນເປັນເວລາ 33 ປີ ແລະ ໄດ້ມີການປັບປຸງ 2 ຄັ້ງຄື: ການປັບປຸງໃນປີ 2003 ແລະ ປີ 2015. ລັດຖະທໍາມະນູນສະບັບປີ 2015 ມາຮອດປັດຈຸບັນເປັນເວລາ 9 ປີ ຊຶ່ງເປັນກົດໝາຍພື້ນຖານສໍາຄັນຂອງປະເທດຊາດ, ເປັນບ່ອນອີງແກ່ການສ້າງ ແລະ ປັບປຸງກົດໝາຍ ເພື່ອເປັນເຄື່ອງມືຂອງລັດໃນການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ດ້ວຍກົດໝາຍ ແລະ ສ້າງເງື່ອນໄຂພື້ນຖານແກ່ການສ້າງລັດປະຊາທິປະໄຕ ປະຊາຊົນຂອງພວກເຮົາ ໃຫ້ເປັນລັດທີ່ປົກຄອງດ້ວຍກົດໝາຍດີຂຶ້ນເທື່ອລະກ້າວ, ຜ່ານການຈັດຕັ້ງປະຕິບັດມີບາງບົດບັນຍັດຂອງລັດຖະທຳມະນູນ ບໍ່ສອດຄ່ອງກັບໜ້າທີ່ການເມືອງຂອງພັກ ແລະ ສະພາບການພັດທະນາເສດຖະກິດ-ສັງຄົມໃນໄລຍະປັດຈຸບັນ. ໃນດ້ານອື່ນໆເພື່ອຕອບສະໜອງກັບຄວາມຮຽກຮ້ອງຕ້ອງການ ໃນການຈັດຕັ້ງປະຕິບັດແນວທາງປ່ຽນແປງໃໝ່ຢ່າງຮອບດ້ານຢ່າງມີຫຼັກການຂອງພັກເຮົາໃນຕໍ່ໜ້າ.ປັດຈຸບັນ,ພັກພວມຄົ້ນຄວ້າ ແລະ ສ້າງໂຄງການໆເມືອງຂອງພັກ ທີ່ຈະປະກາດໃຊ້ໃນຕໍ່ໜ້ານີ້. ທັງໝົດໄດ້ຮຽກຮ້ອງໃຫ້ລັດຕ້ອງປັບປຸງລັດຖະທໍາມະນູນແຫ່ງ ສປປ ລາວ ສະບັບປີ 2015 ໃຫ້ສອດຄ່ອງກັບໜ້າທີ່ການເມືອງຂອງພັກ ແລະ ລັດໃນໄລຍະໃໝ່.ສະນັ້ນ, ກົມການເມືອງສູນກາງພັກໄດ້ອອກມະຕິ ສະບັບເລກທີ 15/ກມສພ, ລົງວັນທີ 22 ພຶດສະພາ 2024 ວ່າດ້ວຍການແຕ່ງຕັ້ງຄະນະກຳມະການລະດັບຊາດເພື່ອຄົ້ນຄວ້າ ແລະ ປັບປຸງລັດຖະທຳມະນູນໃຫ້ທັນເວລາ ໂດຍໄດ້ວາງແຜນການປັບປຸງລັດຖະທຳມະນູນແຕ່ນີ້ຮອດກາງປີ 2025 ແລະ ຄາດວ່າຈະຖືກຮັບຮອງໃນທ້າຍປີ 2025 ພ້ອມທັງແຕ່ງຕັ້ງກອງເລຂາ ແລະ ອະນຸກຳມະການຕ່າງໆເພື່ອຈັດຕັ້ງປະຕິບັດໃຫ້ສຳເລັດຕາມລະດັບຄາດໝາຍທີ່ວາງໄວ້.

ກອງປະຊຸມຄັ້ງນີ້, ຜູ້ເຂົ້າຮ່ວມໄດ້ຮັບຟັງການສະເໜີບົດປະເມີນການຈັດຕັ້ງປະຕິບັດລັດຖະທຳມະນູນ ສະບັບປີ 2015 ແລະ ຕາງໜ້າແຕ່ລະຂົງເຂດວຽກງານຕ່າງໆ ກໍໄດ້ປະກອບຄໍາຄິດເຫັນສະເໜີບົດຄົ້ນຄວ້າ ເພື່ອແນໃສ່ເຮັດໃຫ້ການປັບປຸງລັດຖະທຳທະນູນສະບັບໃໝ່ມີເນື້ອໃນຄົບຖ້ວນ, ສົມບູນ, ຖືກຕ້ອງ ແລະ ສອດຄ່ອງກັບໜ້າທີ່ການເມືອງໃນໄລຍະໃໝ່.ຂ່າວ-ພາບ: ຂັນໄຊ