ໜ່ວຍພັກຮາກຖານສູນການແພດຟຶ້ນຟູໜ້າທີ່ການ ກະຊວງສາທາລະນະສຸກ ໄດ້ຈັດກອງປະຊຸມໃຫຍ່ຄັ້ງທີ IX ຂອງໜ່ວຍພັກດັ່ງກ່າວ ຂຶ້ນເມື່ອບໍ່ດົນມານີ້ທີ່ ນະຄອນຫຼວງວຽງຈັນ ໂດຍການເປັນປະທານຂອງ ສະຫາຍ ບຸນແຝງ ພູມມະໄລສິດ ເລຂາຄະນະພັກກະຊວງລັດຖະມົນຕີກະຊວງສາທາລະນະສຸກ, ສະຫາຍ ສະໜອງ ທອງສະນະ ຮອງເລຂາຄະນະພັກກະຊວງ ຮອງລັດຖະມົນຕີ ກະຊວງສາທາລະນະສຸກ, ສະຫາຍ ທອງເພັດ ສິດທິວັນ ເລຂາໜ່ວຍພັກຮາກຖານສູນການແພດຟຶ້ນໜ້າທີ່ການ, ມີບັນດາສະມາຊິກພັກສົມບູນ-ສຳຮອງ ພ້ອມດ້ວຍແຂກຖືກເຊີນເຂົ້າຮ່ວມ.
ກອງປະຊຸມໃນຄັ້ງນີ້,ໄດ້ເຫັນດີເປັນເອກະພາບກັນຢ່າງສົມບູນຕໍ່ບົດລາຍງານການເມືອງຂອງຄະນະໜ່ວຍພັກຊຸດເກົ່າໃນໄລຍະຜ່ານມາ ແລະ ທິດທາງແຜນການ 2025 ຫາ 2030 ຂອງໜ່ວຍພັກ. ຈາກນັ້ນ, ໄດ້ມີການປ່ອນບັດເລຶອກຕັ້ງເອົາເລຂາໜ່ວຍພັກຮາກຖານຊຸດໃໝ່ມີຜູ້ແທນສົມບູນ ທັງໝົດ 54 ສະຫາຍຜົນຄັດເລືອກໄດ້ ມີ 5 ສະຫາຍດັ່ງນີ້: 1. ສະຫາຍນາງ ສີອາທອນພູມມະວົງ ເປັນ ເລຂາໜ່ວຍພັກ ຮັບຜິດຊອບຊີ້ນຳ-ນຳພາລວມລົງເລິກວຽກງານການເມືອງແນວຄິດ; 2. ສະຫາຍ ເກດແກ້ວ ສໍພາບມີໄຊ ເປັນຮອງເລຂາໜ່ວຍພັກ ເປັນປະທານກວດກາ-ຮັບຜິດຊອບຊີ້ນໍາປ້ອງກັນຊາດ-ປ້ອງກັນຄວາມສະຫງົບ; 3. ສະຫາຍ ສີບຸນເຮືອງ ແສນຖະທິດ ເປັນຄະນະໜ່ວຍພັກ ຊີ້ນໍາວຽກງານຂະບວນການຈັດຕັ້ງມະຫາຊົນ; 4. ສະຫາຍ ທອງສີ ເທບທໍາວົງ ເປັນຄະນະໜ່ວຍພັກ ຮັບຜິດຊອບວຽກງານວຽກງານຊັບສິນ, ຂະບວນການ; 5. ສະຫາຍ ນາງ ມອນແກ້ວ ມາກໂນຊາ ເປັນຄະນະໜ່ວຍພັກ ຮັບຜິດຊອບວຽກງານວິຊາສະເພາະລົງເລິກວຽກງານການແພດຟຶ້ນຟູໜ້າທີ່ການ ແລະ ຄົ້ນຄ້ວາວິທະຍາສາດ-ສິດສອນນັກຮຽນ.
ໃນໂອກາດນີ້, ສະຫາຍ ບຸນແຝງ ພູມມະໄລສິດໄດ້ໂອ້ລົມເນັ້ນໃຫ້ຄະນະໜ່ວຍພັກຊຸດໃໝ່ສືບຕໍ່ປັງປຸງແກ້ໄຂ ແລະ ພັດທະນາໃຫ້ດີຂຶ້ນເປັນຕົ້ນ 1. ໃຫ້ຮີບຮ້ອນຈັດຕັ້ງຜັນຂະຫຍາຍຜົນສຳເລັດຂອງກອງປະຊຸມໃຫ່ຍຄັ້ງນີ້ໃຫ້ຖືກຕ້ອງ, ທົ່ວເຖິງ ແລະ ທັນເວລາ ທັງນີ້ເພື່ອເຮັດໃຫ້ແຕ່ລະອົງການຈັດຕັ້ງ, ພະນັກງານ, ສະມາຊິກພັກ ໃນແຕ່ລະພະແນກຂອງສູນໄດ້ຮັບຮູ້ເຊື່ອມຊຶມ, ຈັດຕັ້ງຜັນຂະຫຍາຍ ແລະ ຫັນເປັນອັນລະອຽດແຕ່ລະຂົງເຂດວຽກງານ ແລະ ເອົາໄປນຳພາຈັດຕັ້ງເຮັດໃຫ້ເກີດຜົນເປັນຮູບປະທຳຕົວຈິງຢູ່ແຕ່ລະຂັ້ນ; 2. ຕ້ອງໄດ້ສືບຕໍ່ເອົາໃສ່ເພີ່ມທະວີຄວາມສາມັກຄີເປັນເອກະພາບພາຍໃນພັກ, ຍົກສູງຄວາມຮັບຜິດຊອບທາງດ້ານການເມືອງໃຫ້ສູງຂຶ້ນຕື່ມ, ປັບປຸງແບບແຜນການນຳພາ, ເປັນແບບຢ່າງນຳໜ້າໃນການປະຕິບັດໜ້າທີ່ການເມືອງ,ການດຳລົງຊີວິດເພື່ອສົມກັບຄວາມເຊື່ອໜັ້ນ,ຄວາມໄວ້ວາງໃຈຂອງຜູ້ແທນກອງປະຊຸມທີ່ເລືອກເອົາບັນດາສະຫາຍມາເປັນຕົວແທນເຂົ້າໃນຄະນະໜ່ວຍພັກສູນການແພດຟື້ນຟູໜ້າທີ່ການ; 3. ຕ້ອງເຊື່ອມຊຶມກຳແໜ້ນແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ກຳແໜ້ນມະຕິຄຳສັ່ງ ແລະ ແຜນການທີ່ລັດ ກໍຄືກະຊວງສາທາລະນະສຸກວາງອອກແຕ່ລະໄລຍະ. ຄຽງຄູ່ກັນນີ້, ນອກຈາກມີຄວາມຮັບຜິດຊອບວຽກລວມຂອງຄະນະພັກແລ້ວ, ແຕ່ລະສະຫາຍຕ້ອງຕັ້ງໜ້າຮຽນຮູ້ ເພື່ອຍົກລະດັບວິຊາສະເພາະວິຊາການທີ່ການຈັດຕັ້ງມອບໃຫ້ຕົນ, ລົງເລິກຮັບຜິດຊອບຊີ້ນຳຕື່ມ ແລະສິ່ງສໍາຄັນຕ້ອງຮູ້ຈັກຖອດຖອນບົດຮຽນຈາກຂະບວນການ ວຽກງານຕົວຈິງ, ຕ້ອງຮູ້ຈັກຮໍ່າຮຽນນຳມະຫາຊົນ, ຮໍ່າຮຽນນຳເພື່ອນມິດສະຫາຍ ເພື່ອໃຫ້ສົມຄູ່ກັບໜ້າທີ່ໆຕົນຮັບຜິດຊອບຢູ່ສະເໜີ; ຕ້ອງປະຕິບັດຫຼັກການ ກົດລະບຽບຂອງພັກຢ່າງເຂັ້ມງວດ,ຕ້ອງມີທັດສະນະມະຫາຊົນ ຢ່າງຖືກຕ້ອງ; 4. ຄະນະພັກຊຸດໃໝ່ ຕ້ອງເປັນແບບຢ່າງໃນດ້ານຄຸນສົມບັດ ສິນທຳປະຕິວັດ, ໃນດ້ານແບບແຜນວິທີເຮັດວຽກ ແລະ ແບບແຜນການດຳລົງຊີວິດ,ພະຍາຍາມຖືເອົາຜົນປະໂຫຍດລວມໝູ່ ເໜືອຜົນປະໂຫຍດສ່ວນຕົວ, ທັງເປັນແບບຢ່າງ ແລະສຶກສາອົບຮົມສະມາຊິກໃນຄອບຄົວ ໃຫ້ມີສະຕິປະຕິບັດລະບຽບກົດໝາຍ; 5. ສຳລັບສະຫາຍເລຂາໜ່ວຍພັກຊຶ່ງແມ່ນພະນັກງານຫຼັກແຫຼ່ງຜູ້ໜຶ່ງຂອງພັກ, ຂອງລັດ ແລະ ເຄີຍຮັບໜ້າທີ່ເປັນການນຳມາແລ້ວ, ເປັນຜູ້ທີ່ມີບົດຮຽນໃນການນຳພາພໍສົມຄວນ ແຕ່ບັນດາສະຫາຍທັງຫຼາຍນັບທັງຄະນະພັກຊຸດເກົ່າ ແລະ ຄະນະພັກຊຸດໃໝ່ຕະຫຼອດເຖິງສະມາຊິກພັກ, ພະນັກງານ, ພະນັກງານປະຕິວັດອາວຸດໂສບຳນານ, ຜູ້ຊົງຄຸນວຸດທິຂອງສູນການແພດຟື້ນຟູໜ້າທີ່ການຕ້ອງໄດ້ສືບຕໍ່ໃຫ້ຄວາມຊ່ວຍເຫຼືອ ແລະ ຮ່ວມມືກັບສະຫາຍເລຂາໜ່ວຍພັກໃຫ້ຫຼາຍກ່ວາເກົ່າຕື່ມອີກ; 6. ສືບຕໍ່ເພີ່ມທະວີການພົວພັນຮ່ວມມື ຍາດແຍ່ງການຊ່ວຍເຫຼືອກັບຄູ່ຮ່ວມພັດທະນາ, ອົງການຈັດຕັ້ງສາກົນທີ່ບໍ່ຂຶ້ນກັບລັດຖະບານ ຕາມນະໂຍບາຍ ແນວທາງການຕ່າງປະເທດຂອງພັກ ໃນການພົວພັນຕ່າງປະເທດ.ນອກນັ້ນ, ຍັງເນັ້ນໃຫ້ສະຫາຍເລຂານໍາພາຄະນະພັກ, ພະນັກງານຫຼັກແຫຼ່ງໃຫ້ມີການປຶກສາຫາລືກັນເອກະພາບກັນໃນການຈັດຕັ້ງປະຕິບັດວຽກງານທີ່ສໍາຄັນ 4 ໜ້າວຽກຄື:ວຽກງານຈັດຕັ້ງ-ພະນັກງານ;ວຽກງານແຜນການ-ການຮ່ວມມື;ວຽກງານງົບປະມານ-ການເງິນ;ວຽກງານພົວພັນການຕ່າງປະເທດ.
(ຂ່າວ: ວັນເພັງ, ຂໍ້ມູນ-ພາບ: ກະຊວງສາທາລະນະສຸກ)