ທ່ານ ນາງ ສູນທອນ ໄຊຍະຈັກຮອງປະທານສະພາແຫ່ງຊາດ ສະມາຊິກສະພາແຫ່ງຊາດ (ສສຊ) ປະຈຳເຂດເລືອກຕັ້ງທີ 13 ແຂວງສະຫວັນນະເຂດພ້ອມຄະນະໄດ້ເຄື່ອນໄຫວຢ້ຽມຢາມກຸ່ມບ້ານທີ 1ເຂດເທດສະບານແລະ ກຸ່ມບ້ານນາກະລາ ເມືອງສອງຄອນ ໃນວັນທີ 27 ກໍລະກົດຜ່ານມາໂດຍການຕ້ອນຮັບຂອງທ່ານພັອ. ລຳພູນ ວໍລະວົງເຈົ້າເມືອງສອງຄອນ, ການນຳເມືອງຕະຫຼອດຮອດປະຊາຊົນ 2 ເຂົ້າຮ່ວມ.

ຈຸດປະສົງການເຄື່ອນໄຫວແລະ ຢ້ຽມຢາມຄັ້ງນີ້ ແມ່ນເພື່ອເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ (ສພຊ) ຊຸດທີ IX ແລະ ສະພາປະຊາຊົນແຂວງ (ສພຂ) ສະຫວັນນະເຂດ ຊຸດທີ II ແນໃສ່ເຮັດໃຫ້ພະນັກງານ-ລັດຖະກອນ, ທະຫານ-ຕຳຫຼວດ ແລະ ປະຊາຊົນບັນດາເຜົ່າຮັບຮູ້ ແລະ ເຂົ້າໃຈຕໍ່ແນວທາງນະໂຍບາຍຂອງພັກ ເວົ້າລວມ, ເວົ້າສະເພາະວຽກງານຂອງສະພາແຫ່ງຊາດ ກໍຄືສະພາປະຊາຊົນແຂວງ; ໄດ້ຮັບຮູ້ ແລະ ເຂົ້າໃຈພາລະບົດບາດ, ສິດ ແລະ ໜ້າທີ່ຂອງ ສສຊ ແລະ ສສຂ ໃຫ້ເລິກເຊິ່ງກວ່າເກົ່າ.

ທ່ານ ນາງ ໄຊຊົມຊື່ນ ໂພທິສານ ສສຊ ປະຈຳເຂດເລືອກຕັ້ງທີ 13 ໄດ້ເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 7 ຂອງ ສພຊ ຊຸດທີ IX ຊຶ່ງທ່ານໃຫ້ຮູ້ວ່າ: ກອງປະຊຸມຄັ້ງນີ້ ໄດ້ພິຈາລະນາຮັບຮອງເອົາບັນຫາສຳຄັນພື້ນຖານຂອງປະເທດຊາດ ໂດຍອອກເປັນມະຕິ 6 ສະບັບ ແລະ ຮັບຮອງເອົາການສ້າງ ແລະ ປັບປຸງກົດໝາຍ 13 ສະບັບ ໃນນີ້, ກົດໝາຍສ້າງໃໝ່ 2 ສະບັບຄື: ຮ່າງກົດໝາຍວ່າດ້ວຍຊັບພະຍາກອນທີ່ເປັນຢາ ແລະ ຮ່າງກົດໝາຍວ່າດ້ວຍສະຫະກອນ; ກົດໝາຍປັບປຸງ 11 ສະບັບຄື: 1) ກົດໝາຍວ່າດ້ວຍການສະກັດກັ້ນ ແລະ ຕ້ານເຊື້ອເອັດຈໄອວີ/ພະຍາດເອດ, 2) ກົດໝາຍວ່າດ້ວຍການສົ່ງເສີມການລົງທຶນ, 3) ກົດໝາຍວ່າດ້ວຍການຕ້ານສະກັດກັ້ນການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ, 4) ກົດໝາຍວ່າດ້ວຍການປົກປັກຮັກສາສິ່ງແວດລ້ອມ, 5) ກົດໝາຍວ່າດ້ວຍການທ່ອງທ່ຽວ, 6) ກົດໝາຍວ່າດ້ວຍອາກອນມູນຄ່າເພີ່ມ, 7) ກົດໝາຍວ່າດ້ວຍການສະກັດກັ້ນ ແລະ ຕ້ານອັກຄີໄພ, 8.) ກົດໝາຍວ່າດ້ວຍການຕ້ານການສໍ້ລາດບັງຫຼວງ, 9) ກົດໝາຍວ່າດ້ວຍສະພາແຫ່ງຊາດ, 10) ກົດໝາຍວ່າດ້ວຍສະພາປະຊາຊົນຂັ້ນແຂວງ, 11) ກົດໝາຍວ່າດ້ວຍການເລືອກຕັ້ງສະມາຊິກສະພາແຫ່ງຊາດ ແລະ ສະພາປະຊາຊົນຂັ້ນແຂວງ ແລະ ວຽກງານສະພາແຫ່ງຊາດ ໃນໄລຍະແຕ່ກອງປະຊຸມສະໄໝສາມັນເທື່ອທີ 6ຫາເທື່ອທີ7 ແລະແຜນການເຄື່ອນໄຫວຮອດກອງປະຊຸມສະໄໝສາມັນເທື່ອທີ8ຂອງສະພາແຫ່ງຊາດຊຸດທີ IX.

ທ່ານ ຄຳດີ ສຸວັນນະສານປະທານຄະນະກຳມະການວັດທະນະທຳ-ສັງຄົມ ແລະ ບັນດາເຜົ່າ ກໍໄດ້ເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 7 ຂອງ ສພຂ ສະຫວັນນະເຂດ ຊຸດທີ IIທີ່ຫາກໍສຳເລັດໃນວັນທີ 26 ກໍລະກົດຜ່ານມາ ໃຫ້ຜູ້ເຂົ້າຮ່ວມໄດ້ຮັບຊາບຕື່ມອີກ. ຫຼັງຈາກນັ້ນ, ກໍໄດ້ຮັບຟັງບັນຫາ, ຂໍ້ສະເໜີ, ຄວາມຂັດຂ້ອງໝອງໃຈຂອງປະຊາຊົນ ຊຶ່ງບາງບັນຫາກໍໄດ້ຕອບກັບທີ່, ສ່ວນບັນຫາທີ່ກ່ຽວຂ້ອງກັບຫຼາຍພາກສ່ວນ ກໍໄດ້ນຳໄປສະເໜີຕໍ່ພາກສ່ວນທີ່ກ່ຽວຂ້ອງແກ້ໄຂໃນໂອກາດຕໍ່ໄປ.

ທ່ານນາງ ສູນທອນ ໄຊຍະຈັກ ໄດ້ສະແດງຄວາມຊົມເຊີຍຕໍ່ຜົນງານຮອບດ້ານທີ່ທັງສອງບ້ານຍາດມາໄດ້ໃນໄລຍະຜ່ານມາ ທັງຕີລາຄາສູງຕໍ່ຄວາມດຸໝັ່ນ ແລະ ມີຫົວຄິດພັດທະນາຂອງປະຊາຊົນ ທັງສະແດງຄວາມຂອບໃຈຕໍ່ການຕ້ອນຮັບຢ່າງອົບອຸ່ນຂອງປະຊາຊົນ,ພ້ອມທັງໃຫ້ທິດຊີ້ນຳອຳນາດການປົກຄອງເມືອງ, ບ້ານ ຕະຫຼອດຮອດປະຊາຊົນ ຈົ່ງພ້ອມກັນຮັກສາຄວາມສາມັກຄີຮັກແພງຊຶ່ງກັນແລະກັນ, ຕ້ານປະກົດການຫຍໍ້ທໍ້ຕ່າງໆທີ່ອາດຈະເກີດຂຶ້ນ, ເອົາໃຈໃສ່ສ້າງເສດຖະກິດໃນຄອບຄົວໃຫ້ມີຄວາມເຂັ້ມແຂງ ເພື່ອເຮັດໃຫ້ຊີວິດການເປັນຢູ່ນັບມື້ດີຂຶ້ນເປັນກ້າວໆ ນຳເອົາເມືອງສອງຄອນກ້າວຂຶ້ນຢ່າງໜັກແໜ້ນ. ຕໍ່ຂໍ້ສະເໜີຂອງປະຊາຊົນສອງກຸ່ມບ້ານນັ້ນກໍໄດ້ມີການຊີ້ແຈງໃຫ້ເຂົ້າໃຈເປັນແຕ່ລະບັັນຫາບົນພື້ນຖານແນວທາງນະໂບບາຍຂອງພັກ ແລະ ລັດເຮົາ.

ໃນການເຄື່ອນໄຫວຄັ້ງນີ້, ທ່ານຮອງປະທານສະພາແຫ່ງຊາດ ຍັງໄດ້ນຳເອົາເຄື່ອງນຸ່ງຫົ່ມ, ອຸປະ ກອນການສຶກສາ ແລະ ກິລາ ໄປມອບໃຫ້ແກ່ແຕ່ລະກຸ່ມບ້ານອີກດ້ວຍ.

ກ່ອນໜ້ານີ້, ທ່ານນາງ ສູນທອນ ໄຊຍະຈັກ ຍັງໄດ້ໄປຢ້ຽມຢາມສູນຝຶກເປົ່າແຄນ, ຜະລິດແຄນ ແລະ ດົນຕີພື້ນບ້ານ ສະມາຄົມສິລະປິນລາວ ແຂວງສະຫວັນນະເຂດ ເພື່ອສົ່ງເສີມວັດທະນະທຳທີ່ເປັນເອກະລັກຂອງຊາດເຮົາຊຶ່ງແຄນກໍໄດ້ຖືກຮັບຮອງເປັນມໍລະດົກໂລກມາແລ້ວ ເພື່ອໃຫ້ຄົງຢູ່ນຳຊາດເຮົາຕໍ່ໄປ.

(ຂ່າວ: ນາງ ອາລິນ ສຸພິມມະປະດິດ)