ຄະນະກຳມະການລະດັບຊາດປັບປຸງລັດຖະທຳມະນູນໄດ້ຈັດກອງປະຊຸມປະເມີນຜົນການຈັດຕັ້ງປະຕິບັດລັດຖະທຳມະນູນແຫ່ງສປປລາວສະບັບປີ2015ທີ່ແຂວງໄຊສົມບູນຂຶ້ນໃນຕອນເຊົ້າຂອງວັນທີ30ກໍລະກົດນີ້, ທີ່ສະໂມສອນເມືອງອະນຸວົງໂດຍການເປັນປະທານຂອງທ່ານກອງແກ້ວໄຊສົງຄາມ, ຫົວໜ້າສະຖາບັນວິທະຍາສາດເສດຖະກິດແລະສັງຄົມແຫ່ງຊາດ, ຄະນະກຳມະການລະດັບຊາດປັບປຸງລັດຖະທຳມະນູນຮອງຫົວໜ້າອະນຸກຳມະການເນື້ອໃນ, ມີທ່ານພອຍຄຳຮຸ່ງບຸນຍວງເຈົ້າແຂວງໄຊສົມບູນ, ປະທານ-ຮອງປະທານສະພາປະຊາຊົນແຂວງ, ຮອງເຈົ້າແຂວງ, ບັນດາສະມາຊິກສະພາແຫ່ງຊາດປະຈຳເຂດເລືອກຕັ້ງທີ18ແລະສະມາຊິກສະພາປະຊາຊົນແຂວງພ້ອມດ້ວຍພະແນກການ, ອົງການກົມກອງອ້ອມຂ້າງແຂວງຕະຫຼອດຮອດເຈົ້າເມືອງ5ເມືອງເຂົ້າຮ່ວມ.
ໂອກາດກ່າວເປີດກອງປະຊຸມທ່ານກອງແກ້ວໄຊສົງຄາມໄດ້ຍົກໃຫ້ເຫັນເຖິງຄວາມໝາຍ-ຄວາມສຳຄັນຂອງລັດຖະທຳມະນູນທີ່ເປັນແນວທາງຂອງພັກກຳອຳນາດທີ່ຖືກຫັນເປັນກົດໝາຍພື້ນຖານຂອງຊາດ, ເປັນພາຫະນະສຳຄັນໃນການປົກປ້ອງສິດແລະຜົນປະໂຫຍດຂອງຊົນຊັ້ນກຳອຳນາດ, ຄຸ້ມຄອງລັດ, ຄຸ້ມຄອງເສດຖະກິດ-ສັງຄົມຂອງປະເທດຊາດ. ຊຶ່ງການປະເມີນຜົນການຈັັດຕັ້ງປະຕິບັດລັດຖະທຳມະນູນກໍເພື່ອເປັນການປັບປຸງລະບົບອຳນາດລັດໃຫ້ມີປະສິດທິພາບສູງ, ສ້າງບາດລ້ຽວໃໝ່ໃຫ້ແກ່ການປົກປັກຮັກສາແລະສ້າງສາພັດທະນາປະເທດຊາດ, ການເຊື່ອມໂຍງເສດຖະກິດກັບພາກພື້ນແລະສາກົນໃນໄລຍະໃໝ່. ກອງປະຊຸມໃນຄັ້ງນີ້ຍັງເປັນການສະຫຼຸບຕີລາຄາ, ຍົກໃຫ້ເຫັນຂໍ້ສະດວກ, ຂໍ້ຫຍຸ້ງຍາກເພື່ອເປັນຂໍ້ມູນໃນການຄົ້ນຄວ້າ, ປັບປຸງເນື້ອໃນໃຫ້ຖືກຕ້ອງສອດຄ່ອງ, ຄົບຖ້ວນແລະສາມາດນຳໄປຈັດຕັ້ງປະຕິບັດໃນຕໍ່ໜ້າໃຫ້ປະກົດຜົນເປັນຈິງ. ຈາກນັ້ນທ່ານອິນທະປັນຍາຂຽວວົງພະຈັນຮອງຫົວໜ້າຫ້ອງວ່າການສຳນັກງານປະທານປະເທດ, ຄະນະກຳມະການລະດັບຊາດປັບປຸງລັດຖະທຳມະນູນໄດ້ຂຶ້ນສະເໜີບົດປະເມີນການຈັດຕັ້ງປະຕິບັດລັດຖະທຳມະນູນສະບັບປີ2015ຊຶ່ງການສ້າງ, ປະກາດໃຊ້ແລະປັບປຸງລັດຖະທຳມະນູນ2ຄັ້ງທີ່ຜ່ານມາເຮັດໃຫ້ນິຕິກຳສູງສຸດຂອງປະເທດເຮົາມີຄວາມຖືກຕ້ອງ, ສອດຄ່ອງກັບສະພາບຕົວຈິງໃນແຕ່ລະໄລຍະກາຍເປັນພາຫະນະພື້ນຖານໃນການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມດ້ວຍກົດໝາຍໃຫ້ດີຂຶ້ນ, ສ້າງເງື່ອນໄຂພື້ນຖານໃຫ້ແກ່ການສ້າງລັດເຮົາໃຫ້ເປັນລັດທີ່ປົກຄອງດ້ວຍກົດໝາຍຂອງປະຊາຊົນ, ໂດຍປະຊາຊົນແລະເພື່ອປະຊາຊົນເທື່ອລະກ້າວ. ພ້ອມດຽວກັນນັ້ນຜູ້ເຂົ້າຮ່ວມກອງປະຊຸມໄດ້ພ້ອມກັນຄົ້ນຄວ້າ, ປະກອບຄຳຄິດ-ຄຳເຫັນ, ຕອບຄຳຖາມເຈາະຈີ້ມຕໍ່ກັບການປະເມີນຜົນການຈັດຕັ້ງປະຕິບັດລັດຖະທຳມະນູນດ້ວຍຄວາມຮັບຜິດຊອບສູງ. ທັງນີ້ກໍເພື່ອເປັນການສືບຕໍ່ຜັນຂະຫຍາຍແນວທາງປ່ຽນແປງໃໝ່ຢ່າງຮອບດ້ານ, ມີຫຼັກການຂອງພັກເປັນຂໍ້ບັນຍັດຂອງລັດຖະທຳມະນູນແຫ່ງສປປລາວ, ປັບປຸງບາງບົດບັນຍັດກ່ຽວກັບລະບົບອົງການອຳນາດແຫ່ງລັດຂັ້ນຕ່າງໆໃຫ້ມີຄວາມສອດຄ່ອງກັບເນື້ອໃນພື້ນຖານຂອງໂຄງການການເມືອງຂອງພັກແລະມະຕິຕ່າງໆຂອງບັນດາກອງປະຊຸມໃຫຍ່ຂອງພັກເຮົາໃນຕໍ່ໜ້າ, ເປັນບ່ອນອີງພື້ນຖານຮັບປະກັນໃຫ້ແກ່ການສ້າງແລະປັບປຸງກົດໝາຍໃຫ້ເປັນລະບົບຄົບຊຸດ, ຮັດກຸມ, ສາມາດຈັດຕັ້ງປະຕິບັດໄດ້ແລະສືບຕໍ່ຍູ້ແຮງການຜັນຂະຫຍາຍແນວທາງຫັນປ່ຽນທີ່ແຂງແຮງ, ເລິກເຊິ່ງແລະຮອບດ້ານໃນການນຳພາຂອງພັກ.
(ຂ່າວ: ສີລິພອນສົງຄຳ; ບກ: ຄຳສາວເລືອງຄຳທິບ)