ຂ່າວຕ່າງປະເທດລາຍງານ ໃນວັນທີ 19 ສິງຫາ ຜ່ານມາ ວ່າ: ພີທີພີເອລເອັນ ອິນໂດເນເຊຍ (PLN) ບໍລິສັດການໄຟຟ້າຂອງລັດຖະບານອິນໂດເນເຊຍ ຮ່ວມມືກັບບໍລິສັດຊາອຸດິດ ອາຣັບບີ ພັດທະນາໂຮງໄຟຟ້າພະລັງງານແສງອາທິດແບບລອຍນ້ຳຂະໜາດ 60 ເມກະວັດ ບໍລິເວນອ່າງເກັບນໍ້າຊາກູລິງ ແຂວງຊະວາຕາເວັນຕົກ.
ຂ່າວລະບຸວ່າ: ໃນວັນທີ 18 ສິງຫາ ຜ່ານມາ, ທ່ານ ເອັດວິນ ນູກຣາຮາ ປຸຕຣາ ປະທານກຳມະການບໍລິຫານຂອງ PLN ກ່າວວ່າ: ໂຄງການນີ້ສຸມໃສ່ສ້າງຄວາມເຂັ້ມແຂງຂອງຂະແໜງທຸລະກິດພະລັງງານໝູນວຽນໃນອິນໂດເນເຊຍ ຫຼຸດຜົນກະທົບຈາກການປ່ຽນແປງຂອງດິນຟ້າອາກາດ ແລະການປ່ອຍອາຍແກັສເຮືອນແກ້ວ.
ທ່ານ ເອັດວິນເຊື່ອໝັ້ນວ່າ: ໂຄງການນີ້ຈະເພີ່ມຄວາມເຂັ້ມແຂງໃນການປ່ຽນຜ່ານພະລັງງານ ແລະ ສະໜັບສະໜູນເປົ້າໝາຍປ່ອຍມົນລະພິດເປັນສູນພາຍໃນປີ 2060, ໂດຍມີການກໍານົດການດໍາເນີນງານໃນເດືອນມິຖຸນາ 2026ເພື່ອຈະກະຕຸ້ນການລົງທຶນ ແລະເສີມຂະຫຍາຍຄວາມສຳພັນລະຫວ່າງອິນໂດເນເຊຍ ແລະ ຊາອຸດິດ ອາຣັບບີ.
ທັງນີ້, ອິນໂດເນເຊຍ ໄດ້ເປີດໂຮງໄຟຟ້າພະລັງງານແສງອາທິດແບບລອຍນ້ຳຊິຣາຕາ (Cirata) ຊຶ່ງມີຂະໜາດໃຫຍ່ທີ່ສຸດໃນອາຊີຕາເວັນອອກສຽງໃຕ້ ດ້ວຍເນື້ອທີ່ 250 ເຮັກຕາ ໃນແຂວງຊະວາຕາເວັນຕົກ ໃນວັນທີ 9 ພຶດສະພາ 2023, ໂດຍໂຮງໄຟຟ້າແຫ່ງນີ້ໄດ້ຮັບເງິນລົງທຶນຈາກ Masdar ບໍລິສັດໃນສະຫະລັດອາຣັບ ເອມິເຣດ ແລະ ມີກຳລັງການຜະລິດສູງສຸດ 192 ເມກະວັດ.
