ວັນທີ 29 ຕຸລາ ນີ້, ເມືອງສາລະວັນ ແຂວງສາລະວັນ ໄດ້ດຳເນີນກອງປະຊຸມຄົບຄະນະບໍລິຫານງານພັກເມືອງເປີດກວ້າງ ຄັ້ງທີ 17, ທີ່ສະໂມສອນເມືອງ, ໂດຍການເປັນປະທານຂອງສະຫາຍ ຈັນສີລອນ ສີສົມບູນ ກໍາມະການພັກແຂວງ ເລຂາຄະນະບໍລິຫານງານພັກເມືອງ ເຈົ້າເມືອງສາລະວັນ, ມີບັນດາຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າຫ້ອງການອ້ອມຂ້າງເມືອງ, ກອງກໍ່ສ້າງຮາກຖານປະຈຳເມືອງ, ເລຂາພັກ-ນາຍບ້ານເຂົ້າຮ່ວມ.

ສະຫາຍ ວັນນະລັກ ຫຼ້າລ່ຽມທະວີໄຊ ຮອງເລຂາພັກເມືອງ ຜູ້ຊີ້ນຳວຽກງານການເມືອງ-ແນວຄິດ, ວຽກພັກ-ພະນັກງານ ໄດ້ຜ່ານບົດສະຫຼຸບຕີລາຄາການນຳພາຮອບດ້ານຂອງຄະນະບໍລິຫານງານພັກເມືອງ 9 ເດືອນຜ່ານມາ ເຖິງວ່າສະພາບການພາຍໃນເມືອງສາລະວັນ ຍັງສືບຕໍ່ໄດ້ປະເຊີນໜ້າກັບສະພາບການທາງດ້ານເສດຖະກິດ ເປັນຕົ້ນ: ອັດຕາເງິນເຟີ້, ລາຄາສິນຄ້າແພງ, ໄພພິບັດທຳມະຊາດ, ພະຍາດລະດູການ ແລະ ອື່ນໆ, ແຕ່ພາຍໃຕ້ການນໍາພາ-ຊີ້ນໍາ ຂອງຄະນະບໍລິຫານງານພັກເມືອງ ສະໄໝທີ IX, ຄະນະພັກຂັ້ນຕ່າງໆ ໄດ້ຈັດຕັ້ງປະຕິບັດໜ້າທີ່ການເມືອງຂອງຕົນ ດ້ວຍຄວາມຮັບຜິດຊອບສູງ ແລະ ມີລັກສະນະບຸກທະລຸໃນຫຼາຍດ້ານ ຊຶ່ງສາມາດຕີລາຄາໄດ້ຄື: ຂົງເຂດວຽກງານປ້ອງກັນຊາດ-ປ້ອງກັນຄວາມສະຫງົບ ສາມາດຮັກສາໄດ້ສະຖຽນລະພາບທາງດ້ານການເມືອງ, ຄວາມເປັນລະບຽບຮຽບຮ້ອຍຂອງສັງຄົມໂດຍພື້ນຖານ, ສ້າງ ແລະ ຂະຫຍາຍຄັງແຮປ້ອງກັນຊາດ-ປ້ອງກັນຄວາມສະຫງົບ ມາຮອດປັດຈຸບັນມີຄັງແຮສະສົມ 222 ລ້ານກວ່າກີບ ແລະ ວຽກງານດ້ານອື່ນໆກໍມີຜົນສໍາເລັດ.

ຈາກນັ້ນ ກອງປະຊຸມກໍ່ໄດ້ຮັບຟັງການລາຍງານໃນຫົວຂໍ້ ຕີລາຄາຄືນການດຳເນີນກອງປະຊຸມໃຫຍ່ຮາກຖານພັກທີ່ສຳເລັດແລ້ວ, ລາຍງານການປະເມີນການສ້າງຄອບຄົວ ແລະ ບ້ານປ້ອງກັນຊາດ-ເຂັ້ມແຂງ, ລາຍງານການຈັດຕັ້ງປະຕິບັດການແກ້ໄຂບັນຫາປະກົດການຫຍໍ້ທໍ້ຂອງສັງຄົມ ແລະ ການສ້າງຄອບຄົວ ແລະ ບ້ານປ້ອງກັນຄວາມສະຫງົບດີ, ລາຍງານວຽກງານຂະບວນການກະກຽມດຳເນີນກອງປະຊຸມໃຫຍ່, ພ້ອມທັງຮ່ວມກັນປະກອບຄຳຄິດຄຳເຫັນໃຫ້ມີເນື້ຶອໃນຄົບຖ້ວນສົມບູນຂຶ້ນຕື່ມ.

(ພາບ-ຂ່າວ: ທິດລານີ ໂຄດໂຍທາ).