ໃນລະຫວ່າງວັນທີ 1-3 ພະຈິກ ຜ່າມາ, ໄດ້ເປີດງານວາງສະແດງ ແລະ ຈໍາໜ່າຍສິນຄ້າ ເພື່ອສົ່ງເສີມຜະລິດຕະພັນຂອງທ້ອງຖິ່ນ ປີ 2024 ຂຶ້ນຢູ່ບໍລິເວນເດີ່ນໂຮງແຮມເອຣາວັນ ນະຄອນປາກເຊ ແຂວງຈຳປາສັກ ໂດຍການເຂົ້າຮ່ວມຂອງ ທ່ານ ສົມບູນ ເຮືອງວົງສາ ຮອງເຈົ້າແຂວງຈໍາປາສັກ, ທ່ານ ນາງ ເຕດາວັນ ແກ້ວພິລາວັນ ປະທານສະຫະພັນແມ່ຍິງແຂວງ, ທ່ານ ຄໍາ ນິລະວົງ ວ່າການຫົວໜ້າພະແນກກະສິກໍາ ແລະ ປ່າໄມ້ແຂວງ., ມີນັກທຸລະກິດ, ຜູ້ປະກອບການ ແລະ ພາກສ່ວນກ່ຽວຂ້ອງເຂົ້າຮ່ວມ.
ງານວາງສະແດງຄັ້ງນີ້, ໄດ້ມີການຈໍາໜ່າຍບັນດາຜະລິດຕະພັນຫັດຖະກຳ ຈາກສີມືຄົນລາວທີ່ຫຼາກຫຼາຍ ມີທັງແບບພື້ນເມືອງ ແລະ ແບບປະຍຸກຈາກທຸກໆເມືອງ ຂອງແຂວງຈຳປາສັກ ມາວາງສະແດງ ແລະ ຊື້- ຂາຍ ເຊັ່ນ: ຜ້າໄໝ - ຜ້າຝ້າຍພື້ນເມືອງ, ເຄື່ອງຈັກສານ, ໄມ້ແກະສະຫຼັກ, ສະໝຸນໄພເພື່ອສຸຂະພາບ ແລະ ອື່ນໆ. ພ້ອມກັນນັ້ນ, ກໍມີການສະແດງສິລະປະດົນຕີ ແລະ ຟ້ອນພື້ນເມືອງລາວ ເອກະລັກຂອງແຂວງຈຳປາສັກ ແລະ ມີກິດຈະກໍາຖາມ - ຕອບແຈກລາງວັນ. ນອກນີ້, ຍັງມີຫົວຂໍ້ສົນທະນາແລກປ່ຽນກ່ຽວກັບການສົ່ງເສີມຜະລິດຕະພັນຂອງຊຸມຊົນ, ທຸລະກິດຂະໜາດນ້ອຍ - ຂະໜາດກາງ, ຊ່ອງທາງການເຂົ້າເຖິງແຫຼ່ງທຶນໃຫ້ແກ່ຜູ້ປະກອບການຂາດນ້ອຍ, ຂະໜາດກາງ, ການສົ່ງເສີມຜະລິດຕະພັນຂອງຊຸມຊົນ ແລະ ອື່ນໆ.
ການຈັດງານວາງສະແດງ ແລະ ຈໍາໜ່າຍສິນຄ້າຄັ້ງນີ້ ຖືເປັນການເປີດໂອກາດໃຫ້ຜູ້ຜະລິດສີນຄ້າຈາກເຄື່ອງປ່າຂອງດົງຂັ້ນຊຸມຊົນ ແລະ ຜູ້ຊື້ - ຂາຍຈາກພາກເອກະຊົນ ໄດ້ເຕົ້າໂຮມແລກປ່ຽນຄວາມຮູ້, ພັດທະນາຍຸດທະສາດການຕະຫຼາດຮ່ວມກັນ ແລະ ການເຊື່ອມໂຍມສ້າງເຄື່ອຂາຍທາງດ້ານຕະຫຼາດແບບຍືນຍົງ ເພື່ອເປັນບ່ອນໃຫ້ຜູ້ຜະລິດສີນຄ້າເຄື່ອງປ່າຂອງດົງ ໄດ້ນໍາສະເໜີຜະລິດຕະພັນສີນຄ້າຂອງຕົນເອງ ໃຫ້ເປັນທີ່ຮູ້ຈັກຫຼາຍຂຶ້ນ, ຕອບສະໜອງຜູ້ຊື້ທີ່ມີທ່າແຮງ, ປະເມີນຄວາມຕ້ອງການຂອງຕະຫຼາດໃນໄລຍະຍາວ.
(ຂ່າວ: ທູນທອງໃຈ , ພາບ: ພະແນກກະສິກໍາ ແລະ ປ່າໄມ້ແຂວງ)
