ກອງປະຊຸມໃຫຍ່ສະມາຊິກພັກສ່ວຍສາອາກອນປະຈຳແຂວງວຽງຈັນ ຄັ້ັງທີ IV ໄດ້ໄຂຂຶ້ນ ແລະ ອັດລົງດ້ວຍຜົນສຳເລັດອັນຈົບງາມໃນວັນທີ 5 ພະຈິກຜ່ານມາ ໂດຍການເປັນປະທານຂອງສະຫາຍ ນາງ ອ່ອນ ຈັນທະວົງ ເລຂາໜ່ວຍພັກສ່ວຍສາອາກອນປະຈຳແຂວງວຽງຈັນ, ມີສະຫາຍ ສົມດີ ແກ້ວດາລາວິນ ຄະນະປະຈຳພັກແຂວງ ປະທານກວດກາພັກ ປະທານອົງການກວດກາລັດແຂວງ, ມີແຂກຖືກເຊີນ ແລະ ຜູ້ແທນສົມບູນເຂົ້າຮ່ວມ.

ສະຫາຍ ພູເຂົາທອງ ທອງສະຫວັນ ຮອງເລຂາໜ່ວຍພັກ ໄດ້ຜ່ານຮ່າງບົດລາຍງານການເມືອງທັງສອງພາກ ຊຶ່ງສ່ອງແສງໃຫ້ເຫັນຜົນສຳເລັດໃນການຊີ້ນຳ-ນຳພາຕະຫຼອດໄລຍະ 5 ປີຜ່ານມາ ຄະນະພັກໄດ້ເອົາໃຈໃສ່ນຳພາສະມາຊິກພັກ ຈັດຕັ້ງຜັນຂະຫຍາຍມະຕິຂອງກອງປະຊຸມຄັ້ງກ່ອນ ເປັນຕົ້ນແມ່ນໄດ້ຕັ້ງໜ້າສຶກສາອົບຮົມການເມືອງ-ແນວຄິດ, ປັບປຸງການຈັດຕັ້ງພັກໃຫ້ມີຄວາມເຂັ້ມແຂງໜັກແໜ້ນ ຊີ້ນຳວຽກງານອົງການຈັດຕັ້ງມະຫາຊົນ ແລະ ວຽກງານວິຊາສະເພາະ ເຮັດໃຫ້ສະມາຊິພັກມີແນວຄິດອຸ່ນອ່ຽນທຸນທ່ຽງ ເອົາໃຈໃສ່ປະຕິບັດໜ້າທີ່ການເມືອງທີ່ພັກມອບໝາຍໃຫ້ ຢ່າງມີຜົນສຳເລັດເປັນຕົ້ນແມ່ນ ສາມາດຈັດເກັບລາຍຮັບໄດ້ທັງໝົດ 1,269 ຕື້ກວ່າກີບ ເທົ່າກັບ 118% ຂອງແຜນການ 5 ປີ.

ໃນກອງປະຊຸມ, ຜູ້ແທນສົມບູນໄດ້ໃຊ້ສິດປະຊາທິປະໄຕຂອງຕົນປ່ອນບັດເລືອກເອົາຄະນະໜ່ວຍພັກຊຸດໃໝ່ ຊຶ່ງກອງປະຊຸມຄັ້ງປະຖົມມະເລີກໄດ້ເປັນເອກະພາບເລືອກເອົາ ສະຫາຍ ນາງ ອ່ອນ ຈັນທະວົງ ເປັນເລຂາ, ສະຫາຍ ພູເຂົາທອງ ທອງສະຫວັນ ເປັນຮອງເລຂາ ທັງເປັນປະທານກວດກາ, ສະຫາຍ ສີສະໝຸດ ບຸນມີໄຊ ເປັນຄະນະ ທັງເປັນຮອງປະທານກວດກາ ແລະ ຜູ້ຊ່ວຍວຽກກວດກາອີກ 1 ສະຫາຍ, ກອງປະຊຸມຍັງໄດ້ລົງປະຊາມະຕິ ຮັບຮອງເອົາຮ່າງບົດລາຍງານການເມືອງ ແລະ ຮ່າງບົດສຳຫຼວດການນຳພາເພື່ອເປັນບ່ອນອີງໃນການຈັດຕັ້ງປະຕິບັດ 5 ປີຕໍ່ໜ້າ.

(ແຫຼ່ງຂ່າວ: ແຂວງວຽງຈັນ)