ກອງປະຊຸມຄົບຄະນະບໍລິຫານງານພັກ ເມືອງປະທຸມພອນ ແຂວງຈໍາປາສັກ ຄັ້ງທີ 18 ສະໄໝທີ VIII ກໍໄດ້ສຳເລັດໃນວັນທີ 6 ພະຈິກຜ່ານມາ ຢູ່ທີ່ຫ້ອງປະຊຸມຫ້ອງວ່າການເມືອງ, ພາຍໃຕ້ການເປັນປະທານຂອງສະຫາຍ ວຽງສະໄໝ ສີລິພອນພັນ ກຳມະການພັກແຂວງ ເລຂາຄະນະບໍລິຫານງານພັກເມືອງ ເຈົ້າເມືອງປະທຸມພອນ, ໂດຍເປັນກຽດເຂົ້າຮ່ວມຂອງສະຫາຍ ສະນັ່ນ ສີພາພົມມະຈັນ ຮອງເລຂາພັກແຂວງ ຫົວໜ້າຄະນະຈັດຕັ້ງແຂວງ ຜູ້ຊີ້ນຳວຽກງານຮອບດ້ານເມືອງປະທຸມພອນ, ມີບັນດາສະຫາຍໃນຄະນະບໍລິຫານງານພັກເມືອງ, ເລຂາຄະນະໜ່ວຍພັກອ້ອມຂ້າງເມືອງ, ຄະນະຫັນລົງກໍ່ສ້າງຮາກຖານແຂວງປະຈຳເມືອງ, ເລຂາຄະນະພັກຮາກຖານເຂົ້າຮ່ວມ.

ສະຫາຍ ສີທະນົນໄຊ ສີສະຫວ່າງວົງ ກຳມະການພັກເມືອງ ຫົວໜ້າຫ້ອງວ່າການເມືອງ ໄດ້ຂຶ້ນຜ່ານຮ່າງບົດຕີລາຄາການນຳພາຂອງຄະນະບໍລິຫານງານພັກເມືອງ ປະຈຳ 9 ເດືອນ ແລະ ຜ່ານທິດທາງ 3 ເດືອນທ້າຍປີ 2024 ສະໄໝທີ VIII ຊຶ່ງໄດ້ຍົກໃຫ້ເຫັນຜົນງານທີ່ພົ້ນເດັ່ນເປັນຕົ້ນ: ຄະນະພັກ-ອົງການປົກຄອງເມືອງໄດ້ສືບຕໍ່ເພີ່ມທະວີວຽກງານຕິດຕາມ, ຊຸກຍູ້ສົ່ງເສີມຂະບວນການຜະລິດເປັນສິນຄ້າ, ການສົ່ງເສີມການປູກ-ການລ້ຽງ, ຍາດແຍ່ງດືງດູດການລົງທຶນພາຍໃນ ແລະ ຕ່າງປະເທດເພື່ອຮັບປະກັນເຮັດໃຫ້ເສດຖະກິດໄດ້ຮັບການພັດທະນາຢ່າງຕໍ່ເນື່ອງ. ຈາກນັ້ນ, ບັນດາຫ້ອງການອ້ອມຂ້າງເມືອງ, ຄະນະພັກຮາກຖານກຸ່ມ ກໍໄດ້ຜັດປ່ຽນກັນຂຶ້ນລາຍງານ, ປະກອບຄຳຄິດ-ຄຳເຫັນຢ່າງກົງໄປກົງມາ, ຊີ້ແຈງຕໍ່ຄຳຖາມເຈາະຈີ້ມຂອງປະທານກອງປະຊຸມ ແລະ ບັນຫາຕ່າງໆທີ່ຖຶກນຳມາສະເໜີ. ຈາກນັ້ນ, ກໍໄດ້ຮັບຮອງເອົາມະຕິກອງປະຊຸມຄົບຄະນະບໍລິຫານງານພັກເມືອງ ຄັ້ງທີ 18 ສະໄໝທີ VIII ຢ່າງເປັນທາງການ.

(ຂ່າວ-ພາບ: ສີສົມບູນ ວົງວຽງຄຳ)