ທ່ານພູວຽງ ຖາວິວອນ ເກີດໃນຄອບຄົວພະນັກງານ ທີ່ມີມູນເຊື້ອຮັກການອອກແຮງງານ, ເອົາວຽກງານກະສິກໍາ ໄປຄຽງຄູ່ກັບອາຊີບພະນັກງານ ໂດຍການສ້າງເສດຖະກິດຄອບຄົວ ເພື່ອໃຫ້ມີຢູ່-ມີກິນ ຕາມແນວທາງນະໂຍບາຍ ຂອງພັກ,ລັດຖະບານ ໂດຍໄດ້ຖືເອົາແນວທາງ ຂອງປະທານໄກສອນ ພົມວິຫານ ຜູ້ນໍາທີ່ແສນເຄົາລົບຮັກ ມາເປັນແບບຢ່າງ ໃຫ້ກັບຄອບຄົວ ແລະ ສ່ວນຕົວ ທັງໄດ້ນໍາເອົາ ແນວທາງການສ້າງເສດຖະກິດຄອບຄົວ ມາໝູນໃຊ້ໃຫ້ສອດຄ່ອງກັບມະຕິ ສອຈ (ການສ້າງເສດຖະກິດເອກະລາດເປັນເຈົ້າຕົນເອງ)ໝາຍເຖິງ ເສດຖະກິດ ຂອງປະເທດໜຶ່ງ ທີ່ມີຄວາມພະຍາຍາມອອກຈາກລະບົບເສດຖະກິດ ເພິ່ງພາ ແລະ ເອື່ອຍອີງ ໃຫ້ກາຍເປັນເຈົ້າຕົນເອງ ຢ່າງໜັກແໜ້ນ.

ທ່ານ ພູວຽງ ຖາວິວອນ ກ່າວຕື່ມວ່າ: ການສ້າງແນວຄິດດຸໝັ່ນໃນການອອກແຮງງານເພີ່ມພູນຜະລິດຜົນ ຈາກການປູກຝັງ ແລະ ລ້ຽງສັດ ຫຼັງຈາກເວລາເລີກວຽກລັດຖະການ, ຮູ້ຈັກປະຢັດມັດທະຍັດ, ບົນຈິດໃຈ ເພິ່ງຕົນເອງ ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ, ສູ້ຊົນຕ້ານແນວຄິດຟຸມເຟືອຍ, ມີຄວາມຫ້າວຫັນ ຕັ້ງໃຈ ອົດທົນ ດຸໝັ່ນຮຽນຮູ້ ແລະ ຖອດຖອນບົດຮຽນຢູ່ເປັນປະຈໍາ ພ້ອມທັງມີແນວຄິດເອື້ອເຟື້ອເຜື່ອແຜ່ ຊ່ວຍເຫຼືອຊຶ່ງກັນ ແລະ ກັນ, ທາງດ້ານການຈັດຕັ້ງ: ຍາມໃດກໍມີຄວາມຫ້າວຫັນຕໍ່ກັບວຽກງານ ບໍ່ວ່າຈະເປັນວຽກງານສ່ວນລວມ ແລະ ວຽກງານວິຊາສະເພາະຂອງຕົນເອງ ໄດ້ມີການປະກອບສ່ວນເຂົ້າໃນວຽກຂະບວນການຢູ່ເປັນປະຈໍາ ຊຶ່ງມັນສະແດງອອກໃຫ້ເຫັນໂດຍສະເພາະວຽກງານອອກແຮງງານ ທີ່ການຈັດຕັ້ງຈັດຂຶ້ນ ເພື່ອຕ້ອນຮັບວັນສໍາຄັນຕ່າງໆ ຂອງພັກ-ຂອງຊາດ ແມ່ນມີໜ້າ ແລະ ບໍ່ເຄີຍປະຕິເສດ, ກິດຈະກໍາໃນການສ້າງເສດຖະກິດຄອບຄົວ ມີ: ດ້ານປູກຝັງ: ເລີ່ມຈາກການຖາມຕົນເອງວ່າ ຄອບຄົວມັກກິນຫຍັງ? ເມື່ອຮູ້ແລ້ວກໍໃຫ້ເລີ່ມການຜະລິດ ເພື່ອບໍລິໂພກພາຍໃນຄອບຄົວ ເຫຼືອກິນກໍແຈກຢາຍຍາດຕິພີ່ນ້ອງ ແລະ ຄົນໃກ້ຄຽງ.ໝາຍຄວາມວ່າບໍ່ຄວນຄິດເຖິງລາຍໄດ້ມາກ່ອນ. ນອກຈາກນັ້ນ ການປູກຝັງ ກໍຕ້ອງໄດ້ຄໍານຶງເຖິງການເລືອກພືດ ທີ່ຈະສ້າງເສດຖະກິດໃຫ້ຄອບຄົວໄປພ້ອມໆກັນ ໂດຍການແຍກພືດອອກເປັນ 3ປະເພດ ຄື: ພືດລ້ຽງຊີບ, ພືດສ້າງລາຍໄດ້ ແລະ ພືດສ້າງລາຍໄດ້ເປັນປີ, ດ້ານການລ້ຽງສັດ: ເປັນທາງເລືອກໜຶ່ງ ທີ່ສາມາດສ້າງລາຍໄດ້ໃຫ້ກັບຄອບຄົວຫຼາຍພໍສົມຄວນ ຊຶ່ງການລ້ຽງສັດ ຈະເນັ້ນໜັກເປັນ 3ໄລຍະ ຄື: ລ້ຽງເພື່ອສ້າງລາຍໄດ້ ແລະ ເປັນເງິນທ້ອນ-ເງິນເກັບເຊັ່ນ:ລ້ຽງປາ, ເປັດ,ໄກ່ ເພື່ອລ້ຽງຊີບ, ລ້ຽງກົບ,ໝູ ເພື່ອເປັນລາຍໄດ້ເສີມ ແລະ ລ້ຽງງົວ ເປັນເງິນເກັບ-ທ້ອນ ໄລຍະຍາວ.(ເນື້ອທີ່ເຮັດການຜະລິດ ມີ 2ຈຸດ ຄື: ຢູ່ບ້ານຫ້ວຍນໍ້າເຢັນ 1.5ໄລ່ແລະ ຢູ່ບ້ານແສນດິນ, ເມືອງນາຊາຍທອງ, ນະຄອນຫຼວງວຽງຈັນ 2.5 ເຮັກຕາ, ມີໝູ 15ໂຕ, ງົວ5ໂຕ, ສັດປີກ 200 ໂຕ.

ຄຽງຄູ່ກັບການປູກຝັງ-ລ້ຽງສັດແລ້ວ ຍັງໄດ້ມີການເຜີຍແຜ່ຄວາມຮູ້ ດ້ານການປູກຝັງ ແລະ ລ້ຽງສັດ ໃຫ້ກັບຜູ້ທີ່ມີຄວາມສົນໃຈ, ຊ່ວຍແນະນໍາ ແລະ ແກ້ໄຂບັນຫາຕ່າງໆ ໃຫ້ກັບຄົນທີ່ພົບບັນຫາຫຍຸ້ງຍາກ ແລະ ບາງຄັ້ງ ກໍໄດ້ລົງໄປຕິດຕາມຕົວຈິງ ໃຫ້ກັບຜູ້ທີ່ພົບບັນຫາ ຫຼື ຊ່ວຍອອກແບບ, ຈັດສວນ ແລະ ແນວທາງການຜະລິດ.

ສິ່ງທີ່ໄດ້ຮັບຈາການສ້າງເສດຖະກິດ: ໄດ້ຫຼຸດຜ່ອນຄ່າຊົມໃຊ້ພາຍໃນເຮືອນ ປະມານ 70%;ໄດ້ສຸຂະພາບຈິດທີ່ດີ, ໄດ້ສ້າງສາຍພົວພັນທີ່ດີໃນຄອບຄົວ ແລະ ສັງຄົມແລະ ໄດ້ສ້າງລາຍຮັບເຂົ້າຄອບຄົວ ບໍ່ຕໍ່າກວ່າ 90-150 ລ້ານຕໍ່ປີ ຈາການຂາຍແນວພັນພືດ ແລະ ສັດ, ເງິນທີ່ໄດ້ຈາກການຂາຍຜົນຜະລິດ ພືດ ແລະ ສັດ ແມ່ນນໍາໄປແກ້ໄຂບັນຫາໃຫ້ຜູ້ຜະລິດທາງດ້ານເຕັກວິຊາການ, ເຮັດໃຫ້ມີການຮຽນຮູ້, ຊອກຮູ້, ສະສົມປະສົບກັນ, ເຜີຍແຜ່ຕໍ່ຜູ້ທີ່ມີຄວາມສົນໃຈ ແລະ ເຮັດການຜະລິດດັ່ງກ່າວມາໄດ້ 5ປີ, ຈໍານວນສະມາຊິກພາຍໃນຄອບຄົວ ມີ 5ຄົນ, ແຮງງານຕົ້ນຕໍ 1ແຮງງານ, ແຮງງານສໍາຮອງ2ແຮງງານ.ທ່ານ ພູວຽງ ຖາວິວອນ ກ່າວຕື່ມວ່າ: ຈາກການສ້າງເສດຖະກິດຄອບຄົວ ເຫັນໄດ້ວ່າວຽກງານປູກຝັງ-ລ້ຽງສັດເປັນວຽກງານທີ່ມີຄວາມສໍາຄັນຫຼາຍ ແລະ ຢາກໃຫ້ບັນດາທ່ານນໍາໄປເປັນແນວທາງ ເພື່ອຈັດຕັ້ງປະຕິບັດ ແລະ ຢາກໃຫ້ເລີ່ມແຕ່ນ້ອຍໆ ແລະ ກ້າວຂຶ້ນເທື່ອລະຂັ້ນ ໂດຍການເບິ່ງຈາກທ່າແຮງຂອງຕົນເອງເປັນຫຼັກ ແລະ ໃນອະນາຄົດ ຈະເພີ່ມຄວາມເອົາໃຈໃສ່ວຽກງານທີ່ມີຢູ່ ພ້ອມນັ້ນ ກໍຈະສືບຕໍ່ໂຄງການເຊັ່ນ: ການເຮັດແກ໊ສຊີວະພາບຈາກຝຸ່ນຄອກ-ຂີ້ງົວ (Biomass Energy) ເພື່ອນໍາໃຊ້ໃນການຫຸງ, ຕົ້ມ ແລະ ນໍາໃຊ້ລະບົບໂຊລາເຊວ.