ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ 6 ພະຈິກ ຜ່ານມາຢູ່ນະຄອນຫຼວງຮ່າໂນ້ຍ, ທ່ານ ໂຕເລິມ ເລຂາທິການໃຫຍ່ພັກກອມມູນິດ ຫວຽດນາມຄະນະເລຂາທິການ ໄດ້ເປັນປະທານກອງປະຊຸມບັນດາອະດີດການນຳພັກ ແລະ ລັດ ປະກອບຄຳເຫັນໃສ່ຮ່າງເອກະສານຍື່ນສະເໜີຕໍ່ກອງປະຊຸມໃຫຍ່ຄັ້ງທີ XIV ຂອງພັກ.

ຂ່າວລະບຸວ່າ: ທ່ານ ໂຕເລິມ ກ່າວຄຳເຫັນເປີດກອງປະຊຸມ ວ່າ: ຄາດວ່າເດືອນມັງກອນປີ 2026 ຈະດຳເນີນກອງປະຊຸມໃຫຍ່ທົ່ວປະເທດຄັ້ງທີ XIV ຂອງພັກ, ນີ້ແມ່ນເຫດການການເມືອງທີ່ມີຄວາມໝາຍສຳຄັນຍິ່ງຂອງປະເທດ. ເພື່ອກະກຽມໃຫ້ແກ່ກອງປະຊຸມໃຫຍ່, ຄະນະບໍລິຫານງານສູນກາງພັກ, ກົມການເມືອງ, ຄະນະເລຂາທິການຊຸດທີ XIII ໄດ້ຈັດກອງປະຊຸມເພື່ອສຸມໃສ່ກະກຽມ 2 ວຽກງານທີ່ສຳຄັນນັ້ນແມ່ນ ຮ່າງເອກະສານສະບັບຕ່າງໆເພື່ອຍື່ນສະເໜີຕໍ່ກອງປະຊຸມໃຫຍ່ ແລະ ກະກຽມບຸກຄະລາກອນທີ່ດີ ໃຫ້ແກ່ກອງປະຊຸມ.

ທ່ານ ໂຕເລິມ ຊີ້ແຈ້ງວ່າ: ບັນດາເອກະສານຍື່ນສະເໜີຕໍ່ກອງປະຊຸມໃຫຍ່ຄັ້ງທີ XIV ຕ້ອງແມ່ນຜະລິດຕະພັນຍອດຢ້ຽມທາງດ້ານພູມປັນຍາຂອງທົ່ວພັກ, ທົ່ວປວງຊົນ, ທົ່ວກອງທັບ. ດັ່ງນັ້ນຕ້ອງເສີມຂະຫຍາຍລັກສະນະປະຊາທິປະໄຕພູມປັນຍາລວມໝູ່, ຕ້ອງມີການເຂົ້າຮ່ວມຂອງບັນດາອົງການ, ຄະນະ, ຂະແໜງການສູນກາງ, ບັນດາທ້ອງຖິ່ນ, ອົງການຈັດຕັ້ງການເມືອງສັງຄົມ ແລະ ປະຊາຊົນ, ພິເສດແມ່ນການເຂົ້າຮ່ວມປະກອບສ່ວນຂອງບັນດາອະດີດການນຳພັກ, ລັດ ແມ່ນຜູ້ທີ່ມີພູມປັນຍາສຸຂຸມເລິກເຊິ່ງກ່ຽວກັບທິດສະດີ, ມີຄວາມເຂົ້າໃຈແຈ້ງກ່ຽວກັບພຶດຕິກຳຕົວຈິງ ແລະ ໄດ້ເຂົ້າຮ່ວມການຊີ້ນຳ-ນຳພາໃນວຽກງານຕ່າງໆຂອງພັກ ແລະ ລັດມາເປັນຫຼາຍປີ.