ຂ່າວສານຫວຽດນາມລາຍງານວ່າ: ກຸ່ມນັກວິໄຈຈາກGoogle,Temasek Holdings ແລະ Bain & Co.ເປີດເຜີຍໃຫ້ຮູ້ວ່າ: ໃນປີ 2024 ນີ້ມູນຄ່າຂອງເສດຖະກິດດີຈີຕອນໃນພາກພື້ນອາຊີຕາເວັນອອກສ່ຽງໃຕ້ ຫຼື ອາຊຽນ ມີອັດຕາການຂະຫຍາຍຕົວຫຼຸດຊ້າລົງຕ່ຳສຸດນັບຕັ້ງແຕ່ປີ 2017, ອີກທັງຍັງມີລະດັບການລົງທຶນພາກເອກະຊົນຕໍ່າ ແລະ ຄວາມອ່ອນແອຂອງພາກການບໍລິໂພກ.

ໂດຍພາຍໃນປີ 2024​ ນີ້ ເສດຖະກິດດີຈີຕອນຈະຂະຫຍາຍຕົວເພີ່ມຂຶ້ນ 15% ເປັນ 263,000 ລ້ານໂດລາຊຶ່ງຫຼຸດຊ້າລົງຈາກລະດັບການເຕີບໂຕ 17% ໃນປີ 2023. ເຖິງຢ່າງໃດກໍຕາມ, ຫາກເບິ່ງໃນພາບລວມຂອງຕະຫຼາດອອນລາຍຍັງຖືວ່າມີການຂະຫຍາຍຕົວຢ່າງຕໍ່ເນື່ອງ.

ຜູ້ບໍລິໂພກໃນພາກພື້ນອາຊີຕາເວັນອອກສ່ຽງໃຕ້ ຫຼາຍກວ່າ 650 ລ້ານຄົນ ກຳລັງຄວບຄຸມລາຍຈ່າຍເພື່ອຮັບມືກັບເງິນເຟີ້ ແລະ ອັດຕາດອກເບ້ຍທີ່ສູງຂຶ້ນ. ສິ່ງ​ດັ່ງກ່າວ​ນຳ​ມາ​ຊຶ່ງ​ຄຳ​ຖາມ​ກ່ຽວ​ກັບ​ການ​ລົງທຶນ​ຫຼາຍ​ຕື້​ໂດ​ລາ​ໃນ​ບັນດາ​ຕະຫຼາດ​ເຕີບ​ໂຕ​ໃໝ່​ຂອງ​ອາຊີ ​ຄື: ​​ອິນ​ໂດ​ເນ​ເຊຍ, ສິງກະ​ໂປ, ​ໄທ, ຫວຽດນາມ ​ເພື່ອ​ຊົດ​ເຊີຍ​ບັນດາ​ພື້ນຖານ​ເສດຖະກິດ​ໃຫຍ່ກວ່າ​ຄື: ຈີນ ​ແລະ ຍີ່​ປຸ່ນ.