ຂ່າວຕ່າງປະເທດລາຍງານ ໃນວັນທີ 5 ພະຈິກ ຜ່ານມາ, ທ່ານ ໂຣຊານ ໂຣເອສລານີ ລັດຖະມົນຕີກະຊວງການລົງທຶນ ຂອງອິນໂດເນເຊຍ ເປີດເຜີຍວ່າ: ອິນໂດເນເຊຍມີເປົ້າໝາຍຈັດຫາເງິນລົງທຶນຈາກພາຍໃນ ແລະ ຕ່າງປະເທດໃຫ້ບັນລຸ 120 ລ້ານໂດລາໃນປີ 2025 ເພື່ອຊຸກຍູ້ເສດຖະກິດພາຍໃນປະເທດ.
ທ່ານ ໂຣຊານ ໂຣເອສລານີ ເນັ້ນໜັກວ່າ:ລັດຖະບານໃຫ້ຄວາມສຳຄັນກັບການດຶງດູດການລົງທຶນ. ໂດຍສະເພາະໃນຂົງເຂດພະລັງງານໝູນວຽນເພື່ອສົ່ງອອກ. ທ່ານກ່າວຕື່ມວ່າ:ທ່າແຮງດ້ານພະລັງງານໝູນວຽນຂອງອິນໂດເນເຊຍມີປະມານ 3.700 ກິກາວັດ ແມ່ນມາຈາກແຜງໂຊລາເຊວ, ພະລັງງານແສງຕາເວັນ, ພະລັງງານນ້ໍາ, ພະລັງງານຊີວະມວນ (Biomass energy) ແລະແຫຼ່ງຄວາມຮ້ອນໃຕ້ດິນ.
ທ່ານ ໂຣຊານ ໂຣເອສລານີເນັ້ນໜັກເຖິງຖານະຂອງອິນໂດເນເຊຍ ໃນການເປັນຜູ້ນຳລະດັບໂລກດ້ານຄວາມສາມາດພະລັງງານຄວາມຮ້ອນໃຕ້ດິນ ໂດຍສະເພາະໃນພາກພື້ນຊາວາ.ແຕ່ວ່າອິນໂດເນເຊຍບໍ່ສາມາດພັດທະນາຂະແໜງອຸດສາຫະກຳດັ່ງກ່າວໄດ້ພຽງລຳພັງ ຈຶ່ງໄດ້ສະແຫວງຫາຄູ່ຮ່ວມລົງທຶນລະຫວ່າງປະເທດ.
ທ່ານ ໂຣຊານ ໂຣເອສລານີກ່າວວ່າ: ການເພີ່ມການລົງທຶນດ້ານພະລັງງານໝູນວຽນ ຖືເປັນສິ່ງສຳຄັນຕໍ່ການບັນລຸເປົ້າໝາຍຂອງອິນໂດເນເຊຍໃນການປ່ອຍແກັສເຮືອນແກ້ວເປັນສູນ ພາຍໃນປີ 2060.
ຂໍ້ມູນຈາກກະຊວງການລົງທຶນ ຂອງອິນໂດເນເຊຍເປີດເຜີຍວ່າ: ອິນໂດເນເຊຍມີການລົງທຶນ 27.3 ຕື້ໂດລາ ໃນໄຕມາດທີ 3(ກໍລະກົດ-ກັນຍາ) ຂອງປີ 2024 ເພີ່ມຂຶ້ນ 15.24% ຈາກໄລຍະດຽວກັນຂອງປີ 2023.
