ຂ່າວຕ່າງປະເທດລາຍງານ, ຜົນການສຶກສາທີ່ເຜີຍແຜ່ໃນວັນທີ 6 ພະຈິກ ຜ່ານມາ ລະບຸວ່າ: ມີການຄົ້ນຄວ້າຂອງອົສຕຣາລີ ຄາດຄະເນວ່າຈໍານວນຜູ້ເສຍຊີວິດຈາກໂຣກມະເຮັງໃນທົ່ວໂລກແຕ່ລະປີຈະເພີ່ມຂຶ້ນເກືອບສອງເທົ່າພາຍໃນ2050.

ການສຶກສາດັ່ງກ່າວຄາດຄະເນວ່າ: ຈະມີຜູ້ເສຍຊີວິດຈາກພະຍາດມະເຮັງທົ່ວໂລກເຖິງ18.5 ລ້ານຄົນໃນປີ 2050, ເພີ່ມຂຶ້ນ 89.7% ຈາກ 9.7 ລ້ານຄົນໃນປີ 2022.

ການສຶກສາດັ່ງກ່າວ ຊຶ່ງນໍາໂດຍ ທ່ານ ດຣ. ຮັບຕາມູ ບິຊູອາເຍຮູ ຈາກມະຫາວິທະຍາໄລ ຄວີນແລນ ລະບຸວ່າ: ນັກຄົ້ນຄວ້າໄດ້ວິເຄາະຄົນເຈັບ ແລະ ອັດຕາການເສຍຊີວິດຈາກພະຍາດມະເຮັງ36ຊະນິດ ໃນ185 ປະເທດແລະ ໄດ້ຄາດຄະເນຈຳນວນຄົນເຈັບ ແລະການເສຍຊີວິດໃນອະນາຄົດໂດຍໃຊ້ອັດຕາຂ້າງເທິງ ປັບໃຊ້ກັບອັດຕາການຄະເນຈຳນວນປະຊາກອນຂອງອົງການສະຫະປະຊາຊາດ (UN) ໃນປີ 2025 ພົບວ່າຈໍານວນຄົນເຈັບທີ່ເປັນມະເຮັງໃນທົ່ວໂລກຈະເພີ່ມຂຶ້ນ 76.6%, ຈາກ 20 ລ້ານຄົນໃນປີ 2022 ເປັນ 35.3 ລ້ານຄົນໃນປີ 2050.

ການສຶກສາຄາດວ່າ: ຈໍານວນຄົນເຈັບ ແລະຜູ້ເສຍຊີວິດຈາກພະຍາດມະເຮັງຈະເພີ່ມຂຶ້ນເກືອບສາມເທົ່າພາຍໃນປີ 2050 ໃນປະເທດທີ່ດັດຊະນີການພັດທະນາຊັບພະຍາກອນມະນຸດ (HDI) ຂອງອົງການສະຫະປະຊາຊາດຢູ່ໃນອັນດັບຕໍ່າ ເມື່ອທຽບກັບປະເທດທີ່ມີດັດຊະນີການພັດທະນາຊັບພະຍາກອນມະນຸດສູງ​​ ຊຶ່ງໂຕ​ເລກ​ຈະເພີ່ມ​ຂຶ້ນໃນລະດັບ​ປານ​ກາງ.

ບົດ​ລາຍ​ງານ​ຄາດ​ວ່າ​: ມະ​ເຮັງ​ປອດ​ຈະ​ຍັງ​ຄົງ​ເປັນ​ສາ​ເຫດ​ຫຼັກ​ຂອງ​ການ​ເສຍ​ຊີ​ວິດ​ຈາກ​ມະ​ເຮັງ​ໃນ​ປີ 2050, ກວມ​ເອົາ​ປະ​ມານ 19.2% ຂອງ​ການ​ເສຍ​ຊີ​ວິດ​ຈາກ​ມະ​ເຮັງ​ທັງ​ໝົດ​ໃນ​ທົ່ວ​ໂລກ ເພີ່ມຂຶ້ນຈາກ 18.7% ໃນປີ 2022.

ການຄົ້ນຄວ້າດັ່ງກ່າວຍັງຄາດວ່າຈຳນວນຄົນເຈັບ ແລະ ຜູ້ເສຍຊີວິດຈາກພະຍາດມະເຮັງ ລະຫວ່າງປີ 2022 ຫາ 2050 ຈະເພີ່ມຂຶ້ນໃນກຸ່ມຜູ້ຊາຍຫຼາຍກວ່າແມ່ຍິງເລັກນ້ອຍ.