ໃນວັນທີ 7 ພະຈິກຜ່ານມາ, ສານປະຊາຊົນ ແຂວງສະຫວັນນະເຂດ ໄດ້ຈັດພິທີມອບ-ຮັບໜ້າທີ່ລະຫວ່າງປະທານສານປະຊາຊົນແຂວງສະຫວັນນະເຂດຜູ້ເກົ່າ ແລະ ຮັກສາການປະທານສານປະຊາຊົນແຂວງຜູ້ໃໝ່ ພາຍໃຕ້ການເປັນປະທານຂອງ ທ່ານ ພູວັງ ເກດແກ້ວພົມພອນ ຮອງເລຂາພັກແຂວງ ຜູ້ຊີ້ນຳວຽກງານການເມືອງ-ແນວຄິດ, ວຽກພັກ-ພະນັກງານ ແລະ ອົງການຈັດຕັ້ງມະຫາຊົນ, ມີປະທານ-ຮອງປະທານ ສານປະຊາຊົນແຂວງ, ຜູ້ພິພາກສາ, ຜູ້ຊ່ວຍຜູ້ພິພາກສາ ແລະ ຕາງໜ້າຈາກພະແນກການກ່ຽວຂ້ອງຂອງແຂວງເຂົ້າຮ່ວມ.

ໃນພິທີ, ທ່ານ ກຽງສັກ ບຸນທາວົງ ປະທານສານປະຊາຊົນ ຜູ້ເກົ່າ ໄດ້ຂຶ້ນລາຍງານສະພາບການເຄື່ອນໄຫວປະຕິບັດໜ້າທີ່ວຽກງານໂດຍຫຍໍ້ຕະຫຼອດໃນໄລຍະ 5 ປີ ຜ່ານມາວ່າ: ຕະຫຼອດໄລຍະ ຜ່ານມາ ສານປະຊາຊົນແຂວງໄດ້ພິພາກສາຄະດີຂອງສານມີຄວາມຖືກຕ້ອງ ແລະ ເປັນທຳ, ການພິຈາລະນາຕັດສິນ ແລະ ພິພາກສາຄະດີຂອງສານປະຊາຊົນທົ່ວແຂວງແກ້ໄຂແລ້ວ 3,431 ເລື່ອງ, ເທົ່າກັບ 92.67%, ສ່ວນຄະດີຄ້າງ ມີຈຳນວນ 140 ເລື່ອງ, ໃນນີ້, ເປັນຄະດີອາຍາ 54 ເລື່ອງ (ອຸທອນ 4 ເລື່ອງ), ຄະດີແພ່ງ 51 ເລື່ອງ (ອຸທອນ 18 ເລື່ອງ), ຄະດີການຄ້າ 14 ເລື່ອງ. ຈາກນັ້ນ, ກໍໄດ້ມີພິທີເຊັນບົດບັນທຶກມອບ-ຮັບໜ້າທີ່ລະຫວ່າງທ່ານ ກຽງສັກ ບຸນທາວົງ ແລະ ທ່ານ ວົງວິໄລ ຈິດປະເສີດ ຜູ້ຮັກສາການປະທານສານປະາຊົນແຂວງ ຜູ້ໃໝ່.

(ຫຼ່ງຂ່າວ: ແຂວງສະຫວັນນະເຂດ)