ໃນວັນທີ 12 ພະຈິກ ນີ້ ສະຖາບັນການຕ່າງປະເທດກະຊວງການຕ່າງປະເທດຮ່ວມກັບສະຖານເອກອັກຄະລັດຖະທູດແຫ່ງ ສາທາລະນະລັດກູບາປະຈໍາ ສປປ ລາວໄດ້ຈັດປາຖະກະຖາພາຍໃຕ້ຫົວຂໍ້: “ການພົວພັນສອງຝ່າຍລະຫວ່າງສປປລາວແລະສາທາລະນະລັດກູບາ”ທີ່ສູນການຮ່ວມມືສາກົນແລະການຝຶກອົບຮົມ(ICTC).ການຈັດປາຖະກະຖາໃນຄັ້ງນີ້ແມ່ນເປັນໜຶ່ງໃນກິດຈະກໍາເພື່ອສະເຫຼີມສະຫຼອງວັນສ້າງຕັ້ງສາຍພົວພັນການທູດລະຫວ່າງສປປລາວແລະສກູບາຄົບຮອບ 50 ປີ (4 ພະຈິກ 1974-4 ພະຈິກ 2024), ໂດຍມີບັນດາຜູ້ເຂົ້າຮ່ວມຈາກກະຊວງການຕ່າງປະເທດ, ຄະນະພົວພັນຕ່າງປະເທດສູນກາງພັກ, ສະຖານທູດກູບາປະຈໍາລາວແລະບັນດາກະຊວງອ້ອມຂ້າງທັງໝົດຫຼາຍກວ່າ 120 ທ່ານ.

ໃຫ້ກຽດເປັນປະທານກ່າວເປີດພິທີໃນຄັ້ງນີ້ໂດຍທ່ານໂພໄຊໄຂຄໍາພິທູນຮອງລັດຖະມົນຕີກະຊວງການຕ່າງປະເທດໂດຍໄດ້ສະແດງຄວາມຊົມເຊີຍແລະຕີລາຄາສູງຕໍ່ສາຍພົວພັນຂອງສອງປະເທດ ຊຶ່ງມີມູນເຊື້ອມາແຕ່ຍາວນານບົນພື້ນຖານແຫ່ງການເຂົ້າອົກເຂົ້າໃຈແລະ ຊ່ວຍເຫຼືອຊຶ່ງກັນແລະກັນ ລະຫວ່າງສອງພັກ, ສອງລັດ ກໍຄືປະຊາຊົນລາວ-ກູບາ. ຫຼັງຈາກນັ້ນ, ຜູ້ເຂົ້າຮ່ວມໄດ້ຮັບຟັງການປາຖະກະຖາຈາກທ່ານນາງແອນນາ ແອັສເທີ ວຽນ ວັນເດສເອກອັກຄະລັດຖະທູດວິສາມັນຜູ້ມີອໍານາດເຕັມແຫ່ງສກູບາປະຈໍາສປປລາວ, ໂດຍທ່ານໄດ້ທົບທວນຕີລາຄາຜົນສໍາເລັດຂອງການພົວພັນຮ່ວມມືຂອງສອງປະເທດຕະຫຼອດໄລຍະ 50 ປີຜ່ານມາຊຶ່ງເປັນສາຍສໍາພັນທີ່ໝັ້ນຄົງ, ແໜ້ນແຟ້ນ, ມີຄວາມໄວ້ເນື້ອເຊື່ອໃຈແລະ ສະໜັບສະໜູນຊຶ່ງກັນ ແລະ ກັນ ສະເເດງອອກໃນການຜັດປ່ຽນຢ້ຽມຢາມກັນຢ່າງເປັນປົກກະຕິຕັ້ງແຕ່ການນໍາຂັ້ນສູງສຸດຈົນເຖິງຂັ້ນວິຊາການແລະ ໄດ້ມີການເຊັນບົດບັນທຶກການຮ່ວມມືກັນໃນຫຼາຍຂົງເຂດ ບໍ່ວ່າຈະເປັນດ້ານການເມືອງ, ເສດຖະກິດ-ສັງຄົມ, ສາທາລະນະສຸກ, ສຶກສາທິການ, ກິລາແລະ ອື່ນໆ.ສໍາລັບຂະແໜງການການຕ່າງປະເທດໃນປີ 2023 ຜ່ານມາ,ສອງກະຊວງ ກໍໄດ້ມີການເຊັນສັນຍາການຮ່ວມມືກັນກ່ຽວກັບການຮ່ວມມືດ້ານພັດທະນາຊັບພະຍາກອນມະນຸດກໍຄືການຝຶກອົບຮົມແລະຍົກລະດັບທັກສະວິຊາຊີບຂອງນັກການທູດລະຫວ່າງສອງກະຊວງແລະເປັນການເສີມຂະຫຍາຍການພົວພັນແລະການຮ່ວມມືແບບມິດຕະພາບຖານອ້າຍນ້ອງລະຫວ່າງສອງປະເທດ,ໂດຍສະເພາະທ່າມກາງສະພາບການພາກພື້ນແລະສາກົນທີ່ມີການຜັນແປໄປຢ່າງໄວວາ, ສັບສົນແລະຄາດຄະເນໄດ້ຍາກ.

ສປປລາວແລະສກູບາໄດ້ສ້າງຕັ້ງ ແລະ ຮັກສາການພົວພັນທາງການທູດເປັນມູນເຊື້ອໃນໄລຍະກວ່າເຄິ່ງສະຕະວັດ. ມາເຖິງປັດຈຸບັນ, ການພົວພັນລະຫວ່າງສອງປະເທດໄດ້ຮັບການເສີມຂະຫຍາຍ, ພັດທະນາຢ່າງຕໍ່ເນື່ອງແລະເປັນຮູບປະທໍາ.ການປາຖະກະຖາໄດ້ດໍາເນີນໄປດ້ວຍບັນຍາກາດຟົດຟື້ນ,ໂດຍມີການແລກປ່ຽນຄໍາຄິດຄໍາເຫັນຈາກບັນດາຜູ້ເຂົ້າຮ່ວມຢ່າງສ້າງສັນ,ເປັນນິມິດໝາຍທີ່ດີແລະ ມີຄວາມໝາຍສໍາຄັນປະກອບສ່ວນໃຫ້ແກ່ການສະເຫຼີມສະຫຼອງວັນສ້າງຕັ້ງສາຍພົວພັນການທູດ ສປປລາວ- ສາທາລະນະລັດ ກູບາ ຄົບຮອບ50ປີ.

(ຂ່າວ:ສະຖາບັນການຕ່າງປະເທດ; ພາບ:ສຳນານ)