ໂດຍ: ວັນເພັງ

ການລົງທຶນຂອງ​ລັດ​ໃນ ປີ 2025 ລັດ​ຖະ​ບານ​ຈະສຸມ​ໃສ່ແກ້ໄຂໄພພິບັດທຳມະຊາດ, ສະໜອງພື້ນຖານໂຄງລ່າງເສດຖະກິດ-ສັງຄົມ, ໂຄງລ່າງໃນເຂດຈຸດສຸມພັດທະນາຊົນນະບົດ ແລະ ແກ້ໄຂຄວາມທຸກຍາກ.

ທ່ານ ເພັດ ພົມພິພັກ ລັດຖະມົນຕີກະຊວງແຜນການ ແລະ ການລົງທຶນ ໄດ້ລາຍງານກ່ຽວກັບການຈັດຕັ້ງປະຕິບັດແຜນການລົງທຶນຂອງລັດ ປະຈໍາປີ 2024 ໂດຍສັງເຂບ ແລະ ແຜນການລົງທຶນຂອງລັດ ປະຈໍາປີ 2025 ຕໍ່ກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX ໃນວັນທີ 18 ພະຈິກຜ່ານມານີ້ ໂດຍການເປັນປະທານຂອງ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ.

ທ່ານ ເພັດ ພົມພິພັກ ກ່າວວ່າ: ເປົ້າໝາຍໃນການລົງທຶນຂອງລັດ ປີ 2025ຈະສືບຕໍ່ແກ້ໄຂໄພພິບັດທຳມະຊາດ, ສະໜອງພື້ນຖານໂຄງລ່າງເສດຖະກິດ-ສັງຄົມ, ໂຄງລ່າງໃນເຂດຈຸດສຸມພັດທະນາຊົນນະບົດ ແລະ ແກ້ໄຂຄວາມທຸກຍາກເຊັ່ນ: ບຸກເບີກເນື້ອທີ່ທໍາການຜະລິດ, ການສະໜອງເຕັກນິກ, ແນວພັນ, ຊົນລະປະທານ ຫຼື ຝາຍເກັບນໍ້າຂະໜາດນ້ອຍ, ການສະໜອງຕາຂ່າຍໄຟຟ້າ, ນໍ້າສະອາດ, ສຸກສາລາ, ໂຮງຮຽນ, ຫໍພັກນັກຮຽນກິນນອນຊົນເຜົ່າເຂດຫ່າງໄກສອກຫຼີກ ແລະ ຈຸດສຸມຕ່າງໆ, ເສັ້ນທາງດິນແດງເຂົ້າບ້ານ ຫຼື ກຸ່ມບ້ານ ຊຶ່ງໂຄງການເຫຼົ່ານີ້ມູນຄ່າບໍ່ສູງ (ມູນຄ່າບໍ່ເກີນ 7 ຕື້ກີບ); ເສັ້ນທາງເຂົ້າສູ່ເຂດການຜະລິດ, ບໍລິການ ທີ່ຕິດພັນກັບການນໍາໃຊ້ລົດໄຟລາວ-ຈີນ ແລະ ການຂົນສົ່ງສິນຄ້າໄປຕ່າງປະເທດ; ໂຄງການປັບປຸງກິດຈະກຳພື້ນຖານໂຄງລ່າງທີ່ຕິດພັນກັບການຊຸກຍູ້ການເກັບລາຍຮັບ ທີ່ສະໜັບສະໜູນວຽກງານການທ່ອງທ່ຽວ; ໂຄງການທີ່ຈໍາເປັນທາງດ້ານຍຸດທະສາດປ້ອງກັນຊາດ-ປ້ອງກັນຄວາມສະຫງົບ;ຝຶກອົບຮົມສີມືແຮງງານ ແລະ ການສົ່ງເສີມການສ້າງວຽກເຮັດງານທໍາໃຫ້ແຮງງານລາວ, ຝຶກອົບຮົມວຽກງານວິຊາການ, ການຖ່າຍທອດວິທະຍາສາດ-ເຕັກໂນໂລຊີ ແລະ ການຫັນເປັນທັນສະໄໝດ້ວຍລະບົບດີຈີຕອນ; ການສະໜອງອຸປະກອນການເເພດ, ອຸປະກອນການສຶກສາ, ອຸປະກອນສໍາລັບຊຸກຍູ້ການເກັບລາຍຮັບ ແລະ ອຸປະກອນສໍາລັບການພັດທະນາສີມືແຮງງານ; ການຕິດຕາມກວດກາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນການລົງທຶນ (ສະເພາະຂະແໜງການທີ່ລະບຸໄວ້ຕາມກົດໝາຍວ່າດ້ວຍການລົງທຶນລັດ); ການສ້າງຕົວແບບການຜະລິດ, ການສົ່ງເສີມການຜະລິດພາຍໃນຢ່າງແຂງແຮງ ແລະ ການຄໍ້າປະກັນສະບຽງອາຫານ; ການສ້ອມແປງພື້ນຖານໂຄງລ່າງທີ່ເປ່ເພ ແລະ ຊຸດໂຊມ ເພື່ອໃຫ້ສາມາດນໍາໃຊ້ໄດ້ປົກກະຕິ. ໃນນັ້ນ, ສໍາລັບສໍານັກງານຫ້ອງການບ່ອນເຮັດວຽກ ແມ່ນຕ້ອງເປັນບ່ອນທີ່ຈໍາເປັນແທ້ໆເຊັ່ນ: ສ້ອມແປງລະບົບໄຟຟ້າ, ລະບົບນໍ້າປະປາ, ຫຼັງຄາເປ່ເພເສຍຫາຍ ເພື່ອໃຫ້ອາຄານສໍານັກງານສາມາດນໍາໃຊ້ໄດ້.