ງານວາງສະແດງການສຶກສາຈີນ-ອາຊຽນຄັ້ງທີ III ປະຈໍາປີ 2024 ໄດ້ຈັດຂຶ້ນໃນວັນທີ 7 ທັນວານີ້ ທີ່ສະຖາບັນຂົງຈື ມະຫາວິທະຍາໄລແຫ່ງຊາດ (ມຊ) ໂດຍການເຂົ້າຮ່ວມເປັນກຽດຂອງທ່ານ ສໍາລານ ພັນຄະວົງ ຮອງລັດຖະມົນຕີກະຊວງສຶກສາທິການ ແລະ ກິລາ (ສສກ), ມີບັນດາຄະນະບໍດີ, ຜູ້ອໍານວຍການສະຖາບັນ, ຫົວໜ້າຫ້ອງການ ແລະ ຄະນະຈາກສະຖາບັນການສຶກສາຊັ້ນສູງຂອງ ສປ ຈີນ, ຄູ-ອາຈານ, ນັກສຶກສາເຂົ້າຮ່ວມ.

ທ່ານ ສິນທະວອນ ດາລາວົງ ຮອງອະທິການບໍດີ ມຊ ກ່າວວ່າ: ງານວາງສະແດງໃນຄັ້ງນີ້ມີຄວາມໝາຍສຳຄັນ ເປັນການເປີດໂອກາດໃຫ້ນັກສຶກສາໄດ້ມີໂອກາດເຂົ້າໃຈສະພາບການສຶກສາຂອງ ສປ ຈີນ ທັງເປັນການຊອກໂອກາດໄປຮຽນຕໍ່ພາຍຫຼັງຮຽນຈົບການສຶກສາຂອງຕົນ, ມຊ ໄດ້ເຊັນສັນຍາກັບສະຖາບັນການສຶກສາຊັ້ນສູງຂອງ ສປ ຈີນ ຈຳນວນ 76 ແຫ່ງ, ພວກເຮົາໄດ້ມີການແລກປ່ຽນຮ່ວມມືລະຫວ່າງນັກຮຽນ-ນັກສຶກສາ, ແລກປ່ຽນຄູ-ອາຈານ, ເຮັດການຄົ້ນຄວ້າຮ່ວມກັນ ແລະ ເປີດກອງປະຊຸມສຳມະນາວິທະຍາສາດລະດັບສາກົນຮ່ວມກັນຫຼາຍຄັ້ງ, ຫວັງວ່າຜ່ານງານວາງສະແດງການສຶກສາຄັ້ງນີ້ຈະເຮັດໃຫ້ ມຊ ແລະ ສະຖາບັນການສຶກສາຊັ້ນສູງທີ່ມາວາງສະແດງໃນຄັ້ງນີ້ ຈະໄດ້ມີໂອກາດຮ່ວມມືກັນໃນຂົງເຂດການແລກປ່ຽນການສຶກສາ, ການຄົ້ນຄວ້າວິທະຍາສາດຕ່າງໆຮ່ວມກັນໃນອະນາຄົດ.

ພາຍຫຼັງ, ທ່ານ ເສີນສີ ຮອງຫົວໜ້າຫ້ອງການພົວພັນຕ່າງປະເທດສຶກສາແຂວງກວາງຕຸ້ງ ໄດ້ຂຶ້ນແນະນຳການສຶກສາຢູ່ແຂວງດັ່ງກ່າວ. ຈາກນັ້ນ, ທ່ານ ສົມພອນ ສອນດາລາ ຫົວໜ້າພະແນກສຶກສາທິການ ແລະ ກິລາ ນະຄອນຫຼວງວຽງຈັນ ໄດ້ກ່າວວ່າ: ຜ່ານງານວາງສະແດງການສຶກສາຈີນ-ອາຊຽນຄັ້ງນີ້ ຈະເຮັດໃຫ້ສະຖາບັນການສຶກສາຊັ້ນສູງຂອງລາວ. ເວົ້າລວມ ເວົ້າສະເພາະ ມຊ ຈະມີການຮ່ວມມືຫຼາຍຂຶ້ນນໍາສະຖາບັນການສຶກສາຊັ້ນສູງຂອງ ສປ ຈີນ ພ້ອມທັງເປັນການເພີ່ມບົດບາດຕົນເອງໃນເວທີສາກົນ. ໃນລະຫວ່າງວັນທີ 10 ຫາ 14 ກັນຍາ ຜ່ານມາ ກໍໄດ້ມີໂອກາດໄປນະຄອນເຊີນເຈີ້ນເພື່ອຮ່ວມມືແລກປ່ຽນບົດຮຽນດ້ານການສຶກສາທີ່ນະຄອນເຊີນເຈີ້ນ ສປ ຈີນ ຊຶ່ງເປັນເມືອງໜຶ່ງທີ່ນອນໃນແຂວງກວາງຕຸ້ງທີ່ໄດ້ມາວາງສະແດງການສຶກສາໃນມື້ນີ້ ເຫັນໄດ້ວ່າປັດຈຸບັນການສຶກສາຂອງ ສປ ຈີນ ໄດ້ພັດທະນາຢ່າງກ້າວກະໂດດ ໂດຍສະເພາະການນໍາໃຊ້ເຕັກໂນໂລຊີໃໝ່ໆ ການນໍາໃຊ້ AI ເຂົ້າມາຮັບໃຊ້ເຂົ້າໃນວຽກງານການຮຽນ-ການສອນ ແລະ ການສ້າງໃຫ້ນັກ ຮຽນນັກສຶກສາໄດ້ມີຈິນຕະນາການໃໝ່ເພື່ອສ້າງນະວັດຕະກໍາຕາມທິດການພັດທະນາການສຶກສາສູ່ອະນາຄົດຂອງ ສປຈີນ,ໃນພິທີ, ຄະນະປະທານໄດ້ໃຫ້ກຽດເປີດງານວາງສະແດງຢ່າງເປັນທາງການ ໂດຍການກົດປຸ່ມເອເລັກໂຕຣນິກ.

ຂ່າວ: ພູວັນ+ບຸນອູ້ມ