ຂ່າວສານຊີອາໄອລາຍງານ ໃນວັນທີ 8 ທັນວາ ຜ່ານມາວ່າ: ກອງປະຊຸມໃຫຍ່ປະເທດພາຄີສົນທິສັນຍາກ່ຽວກັບການດູແລປ້ອງກັນທີ່ດິນກາຍເປັນດິນເຮື້ອດິນຊາຍແຫ່ງອົງການສະຫະປະຊາຊາດຄັ້ງທີ 16 ຫຼື COP16 ໄດ້ຈັດເວທີປຶກສາຫາລືຂັ້ນເຈົ້າຄອງນະຄອນ, ໂດຍມີເຈົ້າໜ້າທີ່ຂັ້ນທ້ອງຖິ່ນຈາກຫຼາຍປະເທດໄດ້ເຂົ້າຮ່ວມປຶກສາຫາລືກ່ຽວກັບຫົວຂໍ້ວ່າ: ອົງການປົກຄອງທ້ອງຖິ່ນຈະຮັບມືກັບບັນຫາທີ່ດິນທີ່ຊຸດໂຊມ,ທີ່ດິນກາຍເປັນດິນເຮື້ອ ແລະດິນຊາຍ, ບັນຫາການຂາດເຂີນຊັບພະຍາກອນນ້ຳ ແລະ ບັນຫາອື່ນໆແນວໃດ. ໂດຍເນັ້ນໜັກໃຫ້ຕົວເມືອງແລະຊົນນະບົດປະສານສົມທົບກັນໃນການຊຸກຍູ້ການຄຸ້ມຄອງດູແລທີ່ດິນແບບຍືນຍົງ, ເນັ້ນໜັກເຖິງຄວາມຈຳເປັນໃນການດູແລຮ່ວມກັນ,ແບ່ງປັນຄວາມຮູ້ແລະນຳໃຊ້ແຜນການແກ້ໄຂແບບຍືນຍົງຮ່ວມກັນແລະຮຽກຮ້ອງໃຫ້ສົ່ງເສີມບົດບາດຂອງອົງການປົກຄອງທ້ອງຖິ່ນຕໍ່ຂອບ “ສົນທິສັນຍາກ່ຽວກັບການດູແລປ້ອງກັນທີ່ດິນກາຍເປັນດິນເຮື້ອແລະດິນຊາຍແຫ່ງອົງການສະຫະປະຊາຊາດ”.
