ໃນວັນທີ 10 ທັນວາ ນີ້, ທີ່ຫ້ອງການສາທາລະນະສຸກ ເມືອງຊະນະຄາມ ແຂວງວຽງຈັນ ໄດ້ມີພິ ທີ ມອບ-ຮັບຢາປິ່ນປົວພະຍາດ ຈາກສະມາຄົມມິດຕະພາບ ລາວ - ສ. ເກົາຫຼີ (LKFA) ແລະ ສະມາຄົມມິດຕະພາບ ສ. ເກົາຫຼີ - ລາວ (KLFA) ໃຫ້ເມືອງຊະນະຄາມ. ຕາງໜ້າໃຫ້ສອງສະມາຄົມ ກ່າວມອບໂດຍທ່ານ ສາລີ ພິມພິນິດ ເລຂາທິການ LKFA ພ້ອມຄະນະ ແລະ ກ່າວຮັບໂດຍ ທ່ານ ໂພຄຳ ແສງລະດີ ຫົວ ໜ້າຫ້ອງການສາທາລະນະສຸກເມືອງ, ໂດຍມີພາກສ່ວນກ່ຽວຂ້ອງທັງສອງຝ່າຍເຂົ້າ ຮ່ວມເປັນສັກຂີພິຍານ.

ຢາທີ່ມາມອບຄັ້ງນີ້, ປະກອບດ້ວຍຢາປິ່ນປົວພະຍາດເບົາຫວານ 5 ແກັດ ແລະ ຢາຢອດຕາ 5 ແກັດ ລວມມູນຄ່າ 242 ລ້ານກີບ, ຊຶ່ງຢາຈໍານວນດັ່ງກ່າວ ແມ່ນໄດ້ມາຈາກການຊ່ວຍເຫຼືອລ້າ ຂອງສະມາຄົມມິດຕະພາບ ສ. ເກົາຫຼີ - ລາວ ໂດຍມອບ ໃຫ້ຫ້ອງ ການສາທາລະນະສຸກ ເມືອງຊະນະຄາມ ນຳໄປແຈກຢາຍຕໍ່ໃຫ້ໂຮງໝໍ ແລະ ບັນດາສຸກສາລາໃນທົ່ວເມືອງ ເພື່ອປິ່ນປົວຄົນເຈັບ.

ໂອກາດດັ່ງກ່າວ, ທ່ານ ເລຂາທິການ LKFA ສາລີ ພິມພິນິດ ໄດ້ຕາງໜ້າໃຫ້ສະມາຄົມມິດຕະພາບ ລາວ - ສ. ເກົາຫຼີ ແລະ ສະມາຄົມມິດຕະພາບ ສ. ເກົາຫຼີ - ລາວ ກ່າວວ່າ: ຍາມໃດພວກເຮົາ ກໍໄດ້ເປັນຫ່ວງເປັນໄຍນຳພໍ່ແມ່ພີ່ນ້ອງ, ພະນັກງານ, ທະຫານ, ຕຳຫຼວດ ແລະ ປະຊາຊົນບັນດາເຜົ່າພາຍໃນເມືອງຊະນະຄາມ; ເຖິງແມ່ນວ່າເຄື່ອງທີ່ນຳມາຊ່ວຍເຫຼືອຄັ້ງນີ້ຈະມີມູນຄ່າບໍ່ສູງ ແຕ່ມັນໄດ້ສະແດງອອກໃຫ້ເຫັນເຖິງນ້ຳໃຈສາມັກຄີ, ມິດຕະພາບ ແລະ ຄວາມເປັນຫວ່າງເປັນໃຍຂອງສະມາຄົມ ເພື່ອໃຫ້ພີ່ນ້ອງເຮົາທີ່ນອນໂຮງໝໍ ຫຼື ປິ່ນປົວຢູ່ບ້ານ-ເຮືອນ ນຳເອົາຢາເຫຼົ່ານີ້ໄປປິ່ນປົວ ເພື່ອເຮັດໃຫ້ສຸຂະພາບກັບຄືນສູ່ປົກກະຕີໂດຍໄວ ແລະ ໄດ້ກັບມາເຮັດໜ້າທີ່ວຽກ ງານຂອງໃຜລາວ.

ທ່ານ ໂພຄຳ ແສງລະດີ ໄດ້ກ່າວສະແດງຄວາມຂອບ ໃຈຢ່າງລົ້ນເຫຼືອມາຍັງ 2 ສະມາຄົມມິດຕະພາບ ແລະ ຈະນຳໃຊ້ຢາດັ່ງກ່າວ ເຂົ້າໃນການປິ່ນປົວຜູ້ທີ່ເຈັບປ່ວຍໃຫ້ເກີດປະໂຫຍດສູງສຸດ

(ແຫຼ່ງຂ່າວ: ເມືອງຊະນະຄາມ)