ຄະນະພັກຮາກຖານ ກອງບັນຊາການ ປກສ ເມືອງທຸລະຄົມ ແຂວງວຽງຈັນ ໄດ້ຈັດກອງປະຊຸມຄົບຄະນະຄັ້ງທີ 1 ສະໄໝທີ II ຂຶ້ນໃນວັນທີ 17 ທັນວາຜ່ານມານີ້ ທີ່ຫ້ອງປະຊຸມຂອງກອງບັນຊາການ, ພາຍໃຕ້ການເປັນປະທານຂອງ ສະຫາຍ ພັນໂທ ສິນນະຄອນ ແສງສັກດາ ຄະນະປະຈໍາພັກເມືອງ ເລາຂາຄະນະພັກຮາກຖານ ຫົວໜ້າກອງບັນຊາການ ປກສ ເມືອງ, ເປັນກຽດເຂົ້າຮ່ວມມີສະຫາຍ ບຸນເລີດ ສີຫາປັນຍາ ຮອງເລຂາພັກເມືອງ, ມີແຂກຖືກເຊີນ ແລະ ພາກສ່ວນກ່ຽວຂ້ອງເຂົ້າຮ່ວມ.
ສະຫາຍ ພັນໂທ ສິນນະຄອນ ແສງສັກດາ ຂຶ້ນກ່າວໄຂກອງປະຊຸມຢ່າງເປັນທາງການ, ພ້ອມທັງແຈ້ງວາລະກອງປະຊຸມ ກໍຄືບັນດາເອກະສານທີ່ຕ້ອງໄດ້ພ້ອມກັນເຊື່ອມຊຶມ ເປັນຕົ້ນ: ຮັບຟັງການສະເໜີຜ່ານຮ່າງບົດລາຍງານການເມືອງ ໄລຍະ 3 ເດືອນ ແລະ ທິດທາງແຜນການເຄື່ອນໄຫວຕໍ່ໜ້າ, ຜ່ານຂໍ້ຕົກລົງວ່າດ້ວຍການສ້າງຕັ້ງກອງທຶນສະຫວັດດີການຂອງກົມກອງເພື່ອນໍາໃຊ້ເຂົ້າໃນຊ່ວຍເຫຼືອເບິ່ງແຍງ ປະຕິບັດນະໂຍບາຍຂອງພະນັກງານນັກຮົບ ແລະ ຄອບຄົວ ໃນເວລາເຈັບເປັນ, ການປະກອບຄໍາເຫັນກ່ຽວກັບວຽກພັກ, ພະນັກງານ ແລະ ວຽກງານກວດກາພັກ, ການຈັດຕັ້ງປະຕິບັດວຽກງານກໍ່ສ້າງຮາກຖານການເມືອງຕາມສາຍຕັ້ງ ຕິດພັນກັບການຜັນຂະຫຍາຍການຈັດຕັ້ງປະຕິບັດ 4 ເນື້ອໃນ, 4 ຄາດໝາຍ, ການປະກອບຄໍາຄິດເຫັນກ່ຽວກັບວຽກງານວິຊາສະເພາະຕໍາຫຼວດ, ວຽກງານຄຸ້ມຄອງ-ປົກປ້ອງ ການເຄື່ອນໄຫວຂອງສາສະໜາ, ການຈັດຕັ້ງປະຕິບັດກົດລະບຽບພັກ ແລະ ກົດລະບຽບຂອງກໍາລັງ ປກສ.
ບັນດາຜູ້ເຂົ້າຮ່ວມ ໄດ້ປະກອບຄໍາເຫັນວຽກງານທີ່ຕົນຮັບຜິດຊອບ, ປະທານກອງປະຊຸມໄດ້ມີຄໍາເຫັນເຈາະຈີ້ມຫຼາຍບັນຫາ ພ້ອມທັງສະເໜີແນວທາງການປັບປຸງແກ້ໄຂວຽກຄົງຄ້າງຜ່ານຈາກພຶດຕິກໍາຕົວຈິງ. ຈາກນັ້ນ, ສະຫາຍ ບຸນເລີດ ສີຫາປັນຍາ ໄດ້ມີຄໍາເຫັນໂອ້ລົມ, ຊີ້ນໍາຫຼາຍຈຸດທີ່ສໍາຄັນ ເພື່ອເປັນບ່ອນອີງ ແລະ ເປັນພື້ນຖານໃຫ້ແກ່ການເຄື່ອນໄຫວວຽກງານໃນຕໍ່ໜ້າ.
(ຂ່າວ: ບ່າວຫາດໄຊ)