ເມື່ອບໍ່ດົນມານີ້, ທ່ານ ບຸນໂຈມ ອຸບົນປະເສີດ ກຳມະການສູນກາງພັກ ເລຂາພັກແຂວງເຈົ້າແຂວງສະຫວັນນະເຂດ ແລະ ທ່ານ ນາງ ບຸດສະດີ ທະນະເມືອງ ກຳມະການສູນກາງພັກ ຮອງຫົວໜ້າຈັດຄັ້ງສູນກາງພັກ ພ້ອມດ້ວຍຄະນະນໍາຂອງແຂວງ, ໄດ້ໄປຢ້ຽມຢາມແມ່ເຖົ້າຄຳທອງ ວົງຄຳອ່ອນ ນັກຮົບແຂ່ງຂັນແຫ່ງຊາດ.

ໂອກາດນີ້, ທ່ານເຈົ້າແຂວງ ໄດ້ຮັບຟັງການເລົ່າປະຫວັດການເຄື່ອນໄຫວການປະຕິວັດຂອງແມ່ເຖົ້າດ້ວຍຄວາມຕັ້ງໃຈ ແລະ ຮັກແພງແມ່ເຖົ້າຄືດັ່ງພີ່ນ້ອງທີ່ໃກ້ຊິດ; ພ້ອມດຽວກັນນີ້, ທ່ານ ເຈົ້າແຂວງ, ຄະນະນໍາຂັ້ນສູນກາງໄດ້ມອບເງິນ, ເຂົ້າສານ, ເຄື່ອງນຸ່ງຫົ່ມ ແລະ ເຄື່ອງບໍລິໂພກຈໍານວນໜຶ່ງໃຫ້ແມ່ເຖົ້າ ແລະ ຄອບຄົວ; ແມ່ເຖົ້າຄຳທອງ ວົງຄຳອ່ອນ ແມ່ນບຸກຄົນໜຶ່ງທີ່ໄດ້ເຂົ້າຮ່ວມຂະບວນການປະຕິວັດຊາດປະຊາທິປະໄຕອັນລະອິດລະອ້ຽວຮ່ວມກັບຜູ້ນຳການປະຕິວັດຫຼາຍທ່ານ; ແມ່ເຖົ້າໄດ້ເຂົ້າຮ່ວມເຮັດການປະຕິວັດແຕ່ອາຍຸ 18 ປີ, ເພີ່ນແມ່ນຜູ້ໜຶ່ງທີ່ຮ່ວມໃນຈໍານວນຜູ້ຊ່ວຍທ່ານຜູ້ນໍາໂຕນຄຸກໂພນເຄັງ ແລະ ຜົນງານດ້ານອື່ນໆ ອີກຢ່າງຫຼວງຫຼາຍ, ແມ່ເຖົ້າຜູ້ທີ່ໄດ້ຮັບຄວາມໄວ້ວາງໃຈຍ້ອນຄວາມຊື່ສັດ ແລະ ຈິງໃຈຂອງແມ່ເຖົ້າຕະຫຼອດເວລາຂອງການປະຕິວັດ.

ສະນັັ້ນ, ພັກ ແລະ ລັດຖະບານຈິ່ງໄດ້ມອບນາມມະຍົດນັກຮົບແຂ່ງຂັນແຫ່ງຊາດໃຫ້ແກ່ແມ່ເຖົ້າຄໍາທອງ ວົງຄຳອ່ອນ; ປັດຈຸບັນແມ່ເຖົ້າມີອາຍຸ 90 ປີ, ອາໃສຢູ່ກັບລູກຫຼານຂອງຕົນຢູ່ບ້ານນາເຕີ້ ເມືອງວິລະບູລິ ແຂວງສະຫວັນນະເຂດ.

(ແຫຼ່ງຂ່າວ: ແຂວງສະຫວັນນະເຂດ)