ພາຍຫຼັງທີ່ໄດ້ດໍາເນີນກອງປະຊຸມໃຫຍ່ຜູ້ແທນອົງຄະນະພັກເມືອງພຽງ ແຂວງໄຊຍະບູລີ ຄັ້ງທີ່ IX ມາເປັນເວລາ 2 ວັນ ຈຶ່ງໄດ້ອັດລົງດ້ວຍຜົນສໍາເລັດໃນຕອນບ່າຍຂອງວັນທີ 15 ມັງກອນຜ່ານມາ ທີ່ຫ້ອງປະຊຸມໃຫຍ່ຂອງເມືອງ, ໂດຍການເປັນປະທານຂອງ ສະຫາຍ ບຸດສະກອນ ອິນທະລັງສີ ກໍາມະການພັກແຂວງ ເລຂາຄະນະບໍລິຫານງານພັກເມືອງ ເຈົ້າເມືອງໆພຽງ, ເປັນກຽດເຂົ້າຮ່ວມຂອງ ສະຫາຍ ພົງສະຫວັນ ສິດທະວົງ ກໍາມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງໄຊຍະບູລີ, ມີສະຫາຍ ສີໄນ ມຽງລາວັນ ຮອງປະທານຄະນະກວດກາສູນກາງພັກ, ມີແຂກຖືກເຊີນ ແລະ ຜູ້ແທນສົມບູນຈໍານວນ 141 ສະຫາຍ ຍິງ 19 ສະຫາຍ ທີ່ເປັນຕົວແທນໃຫ້ແກ່ສະມາຊິກພັກ ແລະ ປະຊາຊົນບັນດາເຜົ່າໃນທົ່ວເມືອງ.

ກອງປະຊຸມໄດ້ຄົ້ນຄວ້າ ແລະ ປະກອບຄຳຄິດຄຳເຫັນໃສ່ຮ່າງລາຍງານການເມືອງ, ແຜນພັດທະນາເສດຖະກິດ-ສັງຄົມ ແລະ ບົດສຳຫຼວດການນຳພາລວມຂອງຄະນະພັກຊຸດເກົ່າ; ໄດ້ພ້ອມກັນຕີລາຄາດ້ານດີ, ດ້ານອ່ອນ, ຂໍ້ຄົງຄ້າງ, ສາເຫດ, ບົດຮຽນໃນການນໍາພາ-ຊີ້ນໍາ ແລະ ການຈັດຕັ້ງປະຕິບັດມະຕິກອງປະຊຸມໃຫຍ່ 5 ປີຜ່ານມາ, ພ້ອມນີ້ຍັງໄດ້ເປັນເອກະສັນກັນຮັບຮອງເອົາທິດທາງແຜນການ 5 ປີ (2025 ຮອດ 2029). ຈາກນັ້ນ, ກອງປະຊຸມແມ່ນໄດ້ດຳເນີນການປ່ອນບັດເລືອກຕັ້ງເອົາຄະນະບໍລິຫານງານພັກເມືອງຊຸດໃໝ່ ຊຶ່ງມີຜູ້ຮັບສະໝັກເລືອກຕັ້ງທັງໝົດ 31 ສະຫາຍ, ຍິງ 7 ສະຫາຍ, ເລືອກໄດ້ 27 ສະຫາຍ, ຍິງ 6 ສະຫາຍ. ກອງປະຊຸມຄັ້ງປະຖົມມະລຶກໄດ້ເລືອກເອົາສະຫາຍ ບຸດສະກອນ ອິນທະລັງສີ ເປັນເລຂາ, ສະຫາຍ ຄໍາພັນ ຄໍາພູບົວ ແລະ ສະຫາຍ ນາງ ດາວັນ ພະວົງຈິດ ເປັນຮອງເລຂາ, ເລືອກເອົາ ສະຫາຍ ທອງໄຊ ລິປະມາ ເປັນຄະນະປະທານກວດກາ, ສະຫາຍ ຄໍາໝັ້ນ ສອນສຸພາບ ແລະ ສະຫາຍ ຄໍາປ່ວນ ທອງພຸດ ເປັນຮອງປະທານ.

ໂອກາດນີ້, ສະຫາຍ ພົງສະຫວັນ ສິດທະວົງ ໄດ້ເນັ້ນໜັກໃຫ້ຄະນະພັກຂັ້ນຕ່າງໆ ຕ້ອງຖືສໍາຄັນ ໃນການຄົ້ນຄວ້າ, ເຊື່ອມຊຶມ ກໍາແໜ້ນ ແລະ ຮູ້ຜັນຂະຫຍາຍ ແນວທາງນະໂຍບາຍ ມະຕິ, ຄໍາສັ່ງ, ນິຕິກໍາຕ່າງໆ ທີ່ວາງອອກໃນແຕ່ລະໄລຍະໃຫ້ເລິກເຊິ່ງ-ທົ່ວເຖິງ, ຄະນະບໍລິຫານງານພັກເມືອງທຸກສະຫາຍ, ຄະນະພັກທຸກຂັ້ນໃນທົ່ວເມືອງຕ້ອງເພີ່ມທະວີການສຶກສາອົບຮົມການເມືອງ-ແນວຄິດ ໃຫ້ແກ່ຖັນແຖວພະນັກງານ, ສະມາຊິກພັກ ແລະ ປະຊາຊົນບັນດາເຜົ່າໃຫ້ມີຄວາມໜັກແໜ້ນ ແລະ ເຂັ້ມແຂງ, ສືບຕໍ່ເຜີ້ມທະວີ ຊີ້ນໍາ-ນໍາພາຕໍ່ວຽກງານປ້ອງກັນຊາດ-ປ້ອງກັນຄວາມສະຫງົບ ຕ້ອງຮັບປະກັນໃຫ້ມີຄວາມສະຫງົບຢ່າງໜັກແໜ້ນ, ສືບຕໍ່ຄົ້ນຄ້ວາຜັນຂະຫຍາຍຍຸດທະສາດການພັດທະນາເມືອງພຽງໃນ 5 ປີຕໍ່ໜ້າ, ສືບຕໍ່ນໍາພາການພັດທະນາຊັບພະຍາກອນມະນຸດຮັບໃຊ້ການພັດທະນາເສດຖະກິດ-ສັງຄົມ ແລະ ສ້າງເງື່ອນໄຂໃນການເຊື່ອມໂຍງສາກົນ ແລະ ພາກພື້ນ ແລະ ສືບຕໍ່ການປັບປຸງລະບົບການເມືອງ, ການສ້າງພັກ-ພະນັກງານຕາມທິດນຳຂອງພັກເຮົາແມ່ນຖືເອົາຄຸນນະພາບເປັນກົກ, ຮັບເອົາຜູ້ທີ່ດີເດັ່ນ ມີມາດຖານ ແລະ ມີເງື່ອນໄຂຄົບຖ້ວນເຂົ້າພັກ.

(ຂ່າວ-ພາບອຸ່ນເຮືອນ ໂພທິລັກ)