ເພື່ອຕອບສະໜອງສະບຽງອາຫານປະເພດຊີ້ນປາອາຫານ ໃຫ້ພຽງພໍກັບຄວາມຕ້ອງການຂອງຜູ້ບໍລິໂພກ ພະແນກກະສິກໍາ-ປ່າໄມ້ ແຂວງໄຊຍະບູລີ ໄດ້ມີຄວາມພະຍາຍາມ ໃນການປຸກລະດົມປະຊາຊົນລ້ຽງສັດໃຫຍ່ ແລະ ນ້ອຍ ຈາກການລ້ຽງແບບທໍາມະຊາດຂອງປະຊາຊົນ ຫັນມາລ້ຽງເປັນຟາມ,ເປັນກຸ່ມ ຕິດ​ພັນ​ກັບ​ການ​ປູກ​ຫຍ້າ​​ອາຫານ​ສັດ ​ແລະ ຕາໜ່າງສັດຕະວະ​ແພດ.ນໍາໃຊ້ເຕັກນິກວິຊາການເຂົ້າຊ່ວຍ ຈຶ່ງເຮັດໃຫ້ສັດລ້ຽງປະເພດຕ່າໆ ຂະຫຍາຍຕົວດີພໍສົມຄວນ.ໃນປີ 2024 ຜ່ານມາ, ການຂະຫຍາຍຕົວຂອງຝູງສັດພາຍໃນແຂວງ ເທົ່າກັບ 7.86% ທຽບໃສ່ແຜນການປີ (7%) ປະຕິບັດໄດ້ 101%, ມາ​ເຖິງ​ປັດຈຸ​ບັນ​ທົ່ວ​ແຂວງ​ ມີ​ສັດລ້ຽງ​ທັງ​ໝົດ 6,263.931 ໂຕ, ທຽບໃສ່ປີຜ່ານມາ ສັດລ້ຽງເພີ່ມຂຶ້ນ 492,474 ໂຕ,

ການລ້ຽງສັດໃຫຍ່ໄດ້ຕິດພັນກັບທົ່ງຫຍ້າທໍາມະຊາດ ໃນທົ່ວແຂວງມີທົ່ງຫຍ້າທໍາມະຊາດ ທັງໝົດ 794 ແຫ່ງ, ມີເນື້ອທີ່ທັງໝົດ 24,884.54 ເຮັກຕາ. ນອກນັ້ນ,ຍັງມີຄອບຄົວປູກຫຍ້າອາຫານສັດທັງ​ໝົດ 9,849 ຄອບຄົວ, ມີເນື້ອທີ່ສາມາດປູກໄດ້ 30,195.89 ເຮັກຕາ, ໃນປັດຈຸບັນ,ປູກຫຍ້າແລ້ວ 23,017 ເຮັກຕາ.

ໄປຄ່ຽງຄູ່ກັນນີ້, ແຂວງຍັງປຸກລະດົມການ​ລ້ຽງ​ປາ​ໃນ​ໜອງ ​ຢ່າງ​ແຜ່​ຫຼາຍ​ໃນ​ຂອບ​ເຂດ​ທົ່ວ​ແຂວງ. ຈຶ່ງ​ເຮັດ​ໃຫ້ການ​ຜະລິດ​ທາດ​ຊີ້ນ, ປາ, ໄຂ່ ໄດ້ທັງໝົດ 31,388 ໂຕນ ແລະ ສາມາດ​ຕອບ​ສະໜອງການບໍລິໂພກໄດ້ 25,272.96 ໂຕນ, ສະເລ່ຍໃສ່ຫົວຄົນໜຶ່ງໃຫ້ໄດ້ 58.36 ກິໂລ/ຄົນ/ປີ. ທຽບໃສ່ແຜນປີ 2024 (55 ກິໂລ/ຄົນ/ປີ ປະຕິບັດໄດ້ເທົ່າກັບ 106.10% ໃນນີ້: ຈຳນວນສັດທີ່ນຳມາບໍລິໂພກສະແດງໃຫ້ເຫັນຄື: ຊີ້ນຄວາຍ ຈຳນວນ 1,272.98 ໂຕນ ເທົ່າກັບ ຄວາຍຈໍານວນ 7,715 ໂຕ,ຊີ້ນງົວ ຈຳນວນ 1,827.09 ໂຕນ ເທົ່າກັບງົວ ຈໍານວນ 13,317 ໂຕ,ຊີ້ນໝູ 2,521.16 ໂຕນ ເທົ່າກັບໝູ ຈໍານວນ 45,182 ໂຕ,ຊີ້ນສັດປີກ 7,111.96 ໂຕນ ເທົ່າກັບສັດປີກ ຈໍານວນ 5,926,633 ໂຕ,ຊີ້ນແບ້ 195.85 ໂຕນເທົ່າກັບແບ້ຈຳນວນ 9,371 ໂຕ,ປາ 6,057.38 ໂຕນ (ປາລ້ຽງໃນໜອງດິນ 4,415.05 ໂຕນ, ປາກະຊັງ 475.88 ໂຕນ ແລະ ປາທຳມະຊາດ 1,166.45 ໂຕນ) ອາຫານຈາກທຳມະຊາດ ເຊັ່ນ: ກຸ້ງ, ຫອຍ, ປູ ແລະ ອື່ນໆ 3,582.05 ໂຕນ,ຈາກການນຳເຂົ້າ ແລະ ອື່ນໆ 24.06 ໂຕນ ແລະ ໄຂ່40,206,690 ໜ່ວຍ, ເທົ່າກັບ 2,680.45 ໂຕນ.

ສໍາລັບວຽກງານສັກ​ຢາ​ກັນ​ພະຍາ​ດສັດ​ໃນປີ 2024 ຜ່ານມາ,ພະແນກກະສິກໍາແຂວງໄດ້ລົງເຄື່ອນໄຫວ

ສັກຢາກັບພະຍາດສັດ ປະ​ເພດ​ຕ່າງໆ​ໄດ້​ທັງ​ໝົດ1,572,349 ​ໂຕ, ກວມເອົາ 25.10% ຂອງສັດລ້ຽງທັງໝົດ​ພາຍໃນແຂວງ,ໃນ​ນັ້ນ ສັກຢາກັນພະຍາດງົວ 140,816 ​ໂຕ ທຽບ​ໃສ່​​ແຜນການ​ປີ (80% ຂອງຝູງສັດ) ປະຕິບັດ​ໄດ້ 55.46 %,ຄວາຍ 54,817 ​ໂຕ ທຽບ​ໃສ່​​ແຜນການ​ປີ(80% ຂອງຝູງສັດ) ປະຕິບັດ​ໄດ້ 82.49%​,ໝູ 86.785 ​ໂຕ ທຽບ​ໃສ່​​ແຜນການປີ (45% ຂອງຝູງສັດ),​ປະຕິບັດ​ໄດ້ 103.85%,ສັດ​ປີກ 1,261,141 ໂຕ ທຽບ​ໃສ່​ແຜນການປີ (18% ຂອງຝູງສັດ),​​ປະຕິບັດ​ໄດ້ 126.53%,ວໍ້ໝາ 16,343 ໂຕ ທຽບ​ໃສ່​ແຜນການ ປີ (26% ຂອງຝູງສັດ), ​ປະຕິບັດ​ໄດ້ 64.74%,ແບ້ 12,447ໂຕ ເທົ່າກັບ 28.93% ຂອງຝູງສັດລ້ຽງ.

ປັດຈຸບັນ,ທົ່ວ​ແຂວງ​ ມີ​ຮ້ານ​ຂາຍ​ຢາ ​ແລະ ອຸປະກອນ​ສັດຕະວະ​ແພດ ​ທັງ​ໝົດ 31 ແຫ່ງ; ໃນ​ນັ້ນ​ຂອງ​ລັດ 4 ​ແຫ່ງ​ ​ແລະ ຮ້ານ​ເອກະ​ຊົນ 27 ​ແຫ່ງ ມີສັດຕະວະແພດທັງໝົດ 384 ຄົນ.

ເຖິງຢ່າງໃດກໍຕາມ, ຖ້າທຽບໃສ່ແຜນການສັກຢາກັນພະຍາດສັດໃນປີຜ່ານມາ ແມ່ນບໍ່ໄດ້ຕາມແຜນການ, ປະຊາຊົນຈໍານວນໜຶ່ງ ລ້ຽງສັດຢູ່ເຂດຫ່າງໄກສອກຫຼີກ, ການເດີນທາງໄປສັກຢາພົບຄວາມຫຍຸ້ງຍາກ, ເຮັດໃຫ້ສັດລ້ຽງຂອງປະຊາຊົນບໍ່ໄດ້ຮັບການສັກຢາກັນພະຍາດຢ່າງຕໍ່ເນື່ອງ,ຈຳນວນຢາປ້ອງກັນຍັງມີຈຳກັດ ຈຶ່ງເຮັດໃຫ້ສັດເກີດພະຍາດໄດ້ງ່າຍ ຊຶ່ງສະແດງອອກຄື: ປີ 2024 ຜ່ານມາ,ມີສັດເຈັບປ່ວຍທີ່ໄດ້ຮັບການສັກຢາປິ່ນປົວພະຍາດປາກເປື່ອຍລົງເລັບ, ເຕົ້າໂຮມເລືອດ, ພະຍາດອະຫິວາໝູ, ພະຍາດອະຫິວາສັດປີກ, ພະຍາດນິວຄາເຊິນ ແລະ ພະຍາດລຳໄສ້ອັກເສບໝາ ທັງໝົດ 54,200 ໂຕ ໃນນັ້ນ: ຄວາຍ 4,627 ໂຕ, ງົວ 8,367 ໂຕ, ໝູ 6,440 ໂຕ, ແບ້ 1,682 ໂຕ, ໝາ 2,741 ໂຕ, ສັດປີກ 30,343 ໂຕ.