ໃນວັນທີ 14 ມັງກອນຜ່ານມານີ້, ກອງພັນໃຫຍ່ 202 ກອງພົນທີ 2, ໄດ້ຈັດຕັ້ງປາຖະກະຖາມູນເຊື້ອວັນສ້າງຕັ້ງກອງທັບປະຊາຊົນລາວ ຄົບຮອບ 76 ປີ ຢູ່ທີ່ສະໂມສອນກອງພັນໃຫຍ່ 202, ໂດຍການໃຫ້ກຽດເປັນປະທານຂອງສະຫາຍ ພັນເອກ ສົມໝາຍ ດອນພະຈັນ ຫົວໜ້າການເມືອງກອງພັນໃຫຍ່ 202, ມີຄະນະພັກ-ຄະນະບັນຊາພະແນກການ, ກົມກອງ, ພ້ອມດ້ວຍພະນັກງານຫຼັກແຫຼ່ງເຂົ້າຮ່ວມຮັບຟັງ.

ສະຫາຍ ພັນໂທ ຄຳໄບ ວິໄລພອນ ຮອງຫົວໜ້າພະແນກການເມືອງ ກອງພັນໃຫຍ່ 202 ໄດ້ຍົກໃຫ້ເຫັນປະຫວັດສາດ, ມູນເຊື້ອແຫ່ງການກຳເນີດເຕີບໃຫຍ່ຂະຫຍາຍຕົວ, ຜົນງານ ແລະ ໄຊສະນະທີ່ກອງທັບປະຊາຊົນລາວ ຍາດມາໄດ້ຕະຫຼອດໄລຍະ 76 ປີ, ຊຶ່ງກອງທັບປະຊາຊົນລາວໄດ້ຮັບການສ້າງຕັ້ງຂື້ນ ໃນວັນທີ 20 ມັງກອນ 1949 ຢູ່ເຂດຕາແສງລາວຮຸ່ງເມືອງຊຽງຄໍ້ແຂວງຫົວພັນ ຊອ່ງແມ່ນປະທານ ໄກສອນ ພົມວິຫານ ເປັນຜູ້ປະກາດສ້າງຕັ້ງ ແລະ ຊີ້ນຳ-ນຳພາໂດຍກົງຮອບດ້ານ, ນັບແຕ່ມື້ສ້າງຕັ້ງກອງທັບເຮົາກໍໄດ້ຮັບພາລະອັນໜັກໜ່ວງຕໍ່ສູ້ຕ້ານການຮຸກຮານຂອງຈັກກະພັດທັງເກົ່າ ແລະ ໃໝ່ທີ່ມີອາວຸດ, ພາຫະນະສົງຄາມ ແລະ ກຳລັງພົນເໜືອກວ່າ, ແຕ່ກອງທັບເຮົາກໍໄດ້ຕໍ່ສູ້ຢ່າງອົງອາດກ້າຫານ, ຍອມເສຍສະຫຼະເລືອດເນື້ອເພື່ອປະເທດຊາດ ແລະ ເພື່ອປະຊາຊົນສາມາດຍາດໄດ້ໄຊຊະນະເປັນກ້າວໆມາ, ພ້ອມນັ້ນກໍສະຖາປະນາສາທາລະນະລັດ ປະຊາທິປະໄຕ ປະຊາຊົນລາວ ຢ່າງເອກອ້າງທະນົງໃຈຂຶ້ນໃນວັນທີ 2 ທັນວາ 1975 ຢ່າງສະຫງ່າງາມ, ນັບແຕ່ນັ້ນມາກອງທັບປະຊາຊົນລາວ ໄດ້ເຮັດໜ້າທີ່ເປັນກຳລັງຫຼັກແຫຼ່ງໃນການປົກປັກຮັກສາປະເທດຊາດໃຫ້ມີຄວາມສະຫງົບ, ປອດໄພ ແລະ ມີຄວາມເປັນລະບຽບຮຽບຮ້ອຍທາງສັງຄົມສ້າງເງື່ອນໄຂໃຫ້ປະເທດຊາດມີການພັດທະນາຢ່າງຮອບດ້ານ, ນັບທັງຊີວິດການເປັນຢູ່ຂອງປະຊາຊົນນັບມື້ດີຂຶ້ນເປັນກ້າວໆມາ.

ການປາຖະກະຖາດັ່ງກ່າວ, ກໍເພື່ອເປັນການສືກສາອົບຮົມໃຫ້ພະນັກງານ-ນັກຮົບໄດ້ຮັບຮູ້ເຂົ້າໃຈ ແລະ ກຳແໜ້ນເຖິງມູນເຊື້ອ, ການເຕີບໃຫຍ່ຂະຫຍາຍຕົວຂອງວັນສ້າງຕັ້ງກອງທັບປະຊາຊົນລາວ ໃຫ້ກວ້າງຂວາງເລີກເຊິ່ງ, ເພື່ອພ້ອມກັນປຸກລະດົມ ແລະ ເສີມຂະຫຍາຍມູນເຊື້ອ, ທາດແທ້ປະຕິວັດຂອງກອງທັບ, ໃນການຕໍ່ສູ້ກູ້ຊາດເຂົ້າໃນການຈັດຕັ້ງປະຕິບັດແຜນນະໂຍບາຍຕ່າງໆຂອງພັກ ແລະ ແຜນພັດທະນາເສດຖະກິດ-ສັງຄົມຂອງລັດ ໃຫ້ປະກົດຜົນເປັນຈິງ, ຕັ້ງໜ້າປັບປຸງຮັດແໜ້ນຄວາມສາມັກຄີປອງດອງພາຍໃຕ້ຮົ່ມທຸງຂອງພັກ, ເພີ້ມທະວີການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍ, ເຊີດຊູນຳໃຈເພີ່ງຕົນເອງກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ ເພື່ອນຳພາຕົນເອງ, ຄອບຄົວ ແລະ ປະເທດຊາດຫຼຸດພົ້ນອອກຈາກສະຖານະພາບດ້ອຍພັດທະນາເທື່ອລະກ້າວ.

(ຂ່າວ-ພາບ: ຄຳຊາຍ ກວ່າງຄຸນສີ)