ພິທິເຊັນບົດບັນທຶກຄວາມເຂົ້າໃຈ (MOU) ລະຫວ່າງ ສະຖາບັນການແພດ ແລະ ການຢາພື້ນເມືອງກະຊວງສະທະລະນະສຸກ ແລະ ສະມາຄົມນັກທຸລະກິດໜຸ່ມ ເມືອງຈັນທະບູລີ ໄດ້ຈັດຂຶ້ນໃນວັນທີ 20 ມັງກອນນີ້ ທີ່ສະຖາບັນການແພດ ແລະ ການຢາພື້ນເມືອງ, ໂດຍຮ່ວມເຊັນບົດບັນທຶກລະຫວ່າງ ທ່ານ ອ່ອນວິໄລສຸລິຍາ ຮອງສະຖາບັນການແພດ ແລະ ການຢາພື້ນເມືອງແລະ ທ່ານປຸກ ຕາມ່ອງ ປະທານສະມາຄົມນັກທຸລະກິດໜຸ່ມ ເມືອງຈັນທະບູລີ ໂດຍຊ້ອງໜ້າຂອງທ່ານ ບຸນເລືອນ ດວງເດືອນ ຫົວໜ້າສະຖາບັນການແພດ ແລະ ການຢາພື້ນເມືອງ ກະຊວງສະທະລະນະສຸກ,ພ້ອມດ້ວຍພະນັກງານທີ່ກ່ຽວຂ້ອງທັງສອງຝ່າຍເຂົ້າຮ່ວມ.
ຈຸດປະສົງໃນການເຊັ່ນບົດບັນທຶກຄວາມເຂົ້າໃຈສະບັບນີ້ແມ່ນເພື່ອຮ່ວມມືວຽກງານດ້ານການຢາພື້ນເມືອງລາວໃນການອະນຸລັກ,ຄົ້ນຄວ້າ-ພັດທະນາ,ສົ່ງເສີມຜະລິດຕະພັນ ແລະ ສະໜັບສະໜູນການບໍລິການ ໃຫ້ແກ່ສັງຄົມ, ການສົ່ງເສີມການແລກປ່ຽນບົດຮຽນ, ປະສົບການຄວາມຮູ້ພູມປັນຍາດ້ານການຢາພື້ນເມືອງ, ຕຳລາຢາພື້ນເມືອງ ແລະ ບຳລຸງສ້າງບຸກຄະລາກອນການຢາພື້ນເມືອງ ໃນການສຶກສາຄົ້ນຄວ້າ ແລະ ພັດທະນາສູດຕຳລາຢາພື້ນເມືອງ ແລະ ການຜະລິດປຸງແຕ່ງຜະລິດຕະພັນ;ສົ່ງເສີມການອະນຸລັກຊີວະນາໆພັນທີ່ເປັນຢາ, ການປູກ-ຂະຫຍາຍພັນພືດເປັນຢາ ເພື່ອການອະນຸລັກ ແລະ ການສະໜອງວັດຖຸດິບໃຫ້ແກ່ການຄົ້ນຄວ້າທົດລອງ ແລະ ການຜະລິດ, ການສຶກສາ,ຄົ້ນຄວ້າ,ວິໄຈ, ພັດທະນາ ແລະ ຢັ້ງຢືນສູດຕຳລາ ແລະ ນຳຜົນການຄົ້ນຄວ້າຈົດທະບຽນສິດທິບັດ ຮ່ວມກັນ;ຮ່ວມມືໃນການນໍາເອົາຜົນການສຶກສາຄົ້ນຄວ້າມາຈັດຕັ້ງເຜີຍແຜ່ພັດທະນາ ແລະ ສົ່ງເສີມການຜະລິດ, ຮ່ວມກັນລົງເລິກດ້ານການຕະຫຼາດ ແລະ ບໍລິການ ອອກຮັບໃຊ້ສັງຄົມ.
ສະຖາບັນການແພດ ແລະ ການຢາພື້ນເມືອງ ຈະເປັນຜູ້ດຳເນີນການດ້ານວິຊາການຄື: ຈັດຕັ້ງການຝຶກອົບຮົມຄວາມຮູ້ພື້ນຖານດ້ານການຢາພື້ນເມືອງ, ການຜະລິດປຸງແຕ່ງຢາພື້ນເມືອງ, ການສືບຄົ້ນພູມປັນຍາດ້ານຢາພື້ນເມືອງ, ຕຳລາຢາພື້ນເມືອງ, ການສໍາຫຼວດພືດເປັນຢາ, ການຄັດເລືອກສູດຕຳລາ ເຂົ້າໃນການສຶກສາຄົ້ນຄວ້າພັດທະນາສູດຕໍາລາໃໝ່; ການສຶກສາ ຄົ້ນຄວ້າວິໄຈຢັ້ງຢືນຄຸນນະພາບ ແລະ ຄວາມປອດໄພ ຂອງຢາພື້ນເມືອງ ແລະ ຜະລິດຕະພັນເສີມສຸຂະພາບ, ການຜະລິດ ແລະ ສົ່ງເສີມການນໍາໃຊ້ຢາພື້ນເມືອງເຂົ້າໃນຕາໜ່າງສາທາລະນະສຸກ; ສະມາຄົມນັກທຸລະກິດໜຸ່ມເມືອງຈັນທະບູລີ ຕາງໜ້າໂດຍ ໂຮງງານປຸງແຕ່ງຢາພື້ນເມືອງ ແລະ ເຄື່ອງສໍາອາງ ມັງກອນລ້ານຊ້າງ ຈະເປັນຜູ້ສະໜອງງົບປະມານໃຫ້ຄວາມສະດວກ, ສະໜອງຂໍ້ມູນທີ່ຈຳເປັນດ້ານວິຊາການ, ດ້ານການຕະຫຼາດ, ຈໍາໜ່າຍຜະລິດຕະພັນອອກສູ່ສັງຄົມ; ການຮ່ວມມືແມ່ນບໍ່ມີການກ້າວກາຍພາລະບົດບາດ, ສິດ ແລະ ໜ້າທີ່ ຂອງກັນ ແລະ ກັນ; ເພື່ອເຮັດໃຫ້ການຈັດຕັ້ງປະຕິບັດບົດບັນທຶກຄວາມເຂົ້າໃຈສະບັບນີ້ມີປະສິດທິຜົນ, ຄູ່ຮ່ວມມືສອງຝ່າຍ ຈະຮ່ວມກັນອອກແບບແຜນປະຕິບັດງານ ແລະ ແຜນລະອຽດ ໂດຍແຕ່ລະຝ່າຍຈະຮັບຜິດຊອບສໍາລັບການປະສານງານ ແລະ ຈັດຕັ້ງປະຕິບັດ ແຜນການ ແລະ ແຜນງານຮ່ວມມືດັ່ງກ່າວຈະມີການຈັດປະຊຸມປຶກສາຫາລື ກັນສອງຝ່າຍ ໂດຍມີການຜັດປ່ຽນກັນດ້ານສະຖານທີ່ການຈັດຕັ້ງປະຕິບັດແມ່ນຈະມີສັນຍາຍ່ອຍການຮ່ວມມືສະເພາະ ຂອງແຕ່ລະກິດຈະກຳງົບປະມານສໍາລັບການຈັດຕັ້ງປະຕິບັດບັນດາກິດຈະກຳການຮ່ວມມືທີ່ຢູ່ພາຍໃຕ້ບົດບັນທຶກຄວາມເຂົ້າໃຈສະບັບນີ້ ແມ່ນທາງສະມາຄົມນັກທຸລະກິດໜຸ່ມເມືອງຈັນທະບູລີ ເປັນຜູ້ສະໜອງໃຫ້;ສໍາລັບສະຖານທີ່, ອຸປະກອນຮັບໃຊ້ ທາງດ້ານການວິໄຈ, ການຜະລິດ, ປຸງແຕ່ງ ໃນສະຖາບັນ ແລະ ສະມາຄົມ ມີແຜນຮ່ວມກັນໃນການສຶກສາ, ຄົ້ນຄວ້າ ໂດຍອີງຕາມສະພາບເງື່ອນໄຂ ແລະ ຄວາມເປັນຈິງ.
ຂ່າວ-ພາບ:ບຸນຕອມ-ບຸນອຸ້ມ.
