ກອງປະຊຸມສໍາມະນາວິຊາການກ່ຽວກັບການຮ່າງນິຕິກຳລຸ່ມກົດໝາຍປົກຄອງໄດ້ປິດລົງໃນວັນທີ 19 ມີນາຜ່ານມາ ທີ່ນະຄອນຫຼວງວຽງຈັນ ໃນໂອກາດສະເຫຼີມສະຫຼອງວັນສ້າງຕັ້ງສາຍພົວພັນທາງການທູດລາວ-ໄທ ຄົບຮອບ 75 ປີໂດຍມີທ່ານ ຄໍາພັນ ບຸນພາຄົມ ຮອງປະທານສານປະຊາຊົນສູງສຸດແຫ່ງ ສປປ ລາວ; ທ່ານ ສຸຊາດ ມົງຄົນເລີດລົບຮອງປະທານສານປົກຄອງສູງສຸດແຫ່ງຣາຊະອານາຈັກໄທ ພ້ອມດ້ວຍຄະນະແລະ ເຈົ້າໜ້າທີ່ຕຸລາການ, ວິທະຍາກອນ ແລະ ພະນັກງານທີ່ກ່ຽວຂ້ອງເຂົ້າຮ່ວມ.

ການປະຊຸມຄັ້ງນີ້ໄດ້ຮັບຟັງການເຜີຍແຜ່ໃຫ້ຄວາມຮູ້ດ້ານການດໍາເນີນຄະດີປົກຄອງ ພາຍໃຕ້ໂຄງການສະໜັບສະໜູນຂອງສານປົກຄອງສູງສຸດແຫ່ງຣາຊະອະນາຈັກໄທ ຊຶ່ງຈັດຂຶ້ນໃນໂອກາດສະເຫຼີມສະຫຼອງວັນສ້າງຕັ້ງສາຍພົວພັນທາງການທູດລາວ-ໄທ ຄົບຮອບ 75 ປີ ໂດຍສະເພາະໃນລະບົບຕຸລາການຂອງສອງປະເທດ.ນັບຕັ້ງແຕ່ການຈັດຕັ້ງຄະນະສານປົກຄອງໃນສານປະຊາຊົນສູງສຸດຂອງ ສປປ ລາວ ໃນປີ 2019 ໄທ ແລະ ລາວ ໄດ້ຮ່ວມມືກັນຢ່າງໃກ້ຊິດຜ່ານການສໍາມະນາ ແລະ ການຝຶກອົບຮົມ ເພື່ອຍົກລະດັບເສີມສ້າງສັກກະຍະພາບບຸກຄະລາກອນຂອງສານປົກຄອງ ໃຫ້ສາມາດພິຈາລະນາຄະດີປົກຄອງ ແລະ ຮ່າງກົດໝາຍທີ່ກ່ຽວຂ້ອງໄດ້ຢ່າງມີປະສິດທິພາບ, ໂຄງການນີ້ຈຶ່ງເປັນການຮ່ວມມືທີ່ສຳຄັນຂອງສອງປະເທດ ສະແດງເຖິງຄວາມສຳພັນອັນແໜ້ນແຟ້ນທັງເປັນເວທີແລກປ່ຽນປະສົບການດ້ານວຽກງານຍຸຕິທຳ ແລະ ເປັນນິຕິກໍາພື້ນຖານທີ່ສໍາຄັນໃຫ້ແກ່ບັນດາຜູ້ພິພາກສາ ທີ່ເຮັດວຽກຢູ່ຄະນະສານປົກຄອງ, ເປັນຄູ່ມືໃນການຈັດຕັ້ງປະຕິບັດການດໍາເນີນຄະດີປົກຄອງ ທັງເປັນບ່ອນອີງໃນການພິຈາລະນາຕັດສິນ ຫຼືພິພາກສາຄະດີໃຫ້ຖືກຕ້ອງຕາມຂັ້ນຕອນຢ່າງເຂັ້ມງວດປະກອບສ່ວນຕ້ານ, ສະກັດກັ້ນການສໍ້ລາດບັງຫຼວງໃນສັງຄົມໃຫ້ຫຼຸດໜ້ອຍຖອຍລົງເທື່ອລະກ້າວ; ຮັບປະກັນການປະຕິບັດໜ້າທີ່ຂອງຜູ້ພິພາກສາຂອງສານປະຊາຊົນໃຫ້ມີຄວາມຖືກຕ້ອງ, ໂປ່ງໃສ, ວ່ອງໄວ ແລະ ຍຸຕິທໍາ; ສ້າງຄວາມເຊື່ອໝັ້ນໃຫ້ສັງຄົມທັງພາຍໃນ ແລະ ຕ່າງປະເທດ, ເຊື່ອມໂຍງກັບພາກພື້ນ ແລະ ສາກົນ.

ໂອກາດດັ່ງກ່າວ, ທ່ານ ຄໍາພັນ ບຸນພາຄົມ ໄດ້ຕາງໜ້າຄະນະນໍາສານປະຊາຊົນສູງສຸດສະແດງຄວາມຮູ້ບຸນຄຸນຢ່າງລົ້ນເຫຼືອ ແລະ ຂອບໃຈເປັນຢ່າງສູງມາຍັງອາຈານ, ຄະນະນໍາສານປົກຄອງສູງສຸດ ແລະ ກະຊວງການຕ່າງປະເທດແຫ່ງຣາຊະອານາຈັກໄທ ທີ່ໄດ້ໃຫ້ການສະໜັບສະໜູນດ້ານງົບປະມານ ແລະ ຊ່ຽວຊານ ຫວັງຢ່າງຍິ່ງວ່າໂອກາດໜ້າຈະໄດ້ຮັບການສະໜັບສະໜູນຊ່ວຍເຫຼືອຕໍ່ໆໄປ,ພາຍຫຼັງສຳເລັດກອງປະຊຸມຄັ້ງນີ້ຄະນະຮັບຜິດຊອບຈະໄດ້ນໍາເອົາເນື້ອໃນຈິດໃຈ ແລະ ຜົນຂອງກອງປະຊຸມຄັ້ງນີ້ໄປຄົ້ນຄວ້າຜັນຂະຫຍາຍເຂົ້າສູ່ການຈັດຕັ້ງປະຕິບັດວຽກງານການດໍາເນີນຕົວຈິງໃຫ້ເກີດດອກອອກຜົນ ແລະ ປັບປຸງວຽກງານໃຫ້ມີຜົນສໍາເລັດໃໝ່ໃຫຍ່ຫຼວງກວ່າເກົ່າ ຊຶ່ງເປັນບາດກ້າວຕໍ່ໄປທີ່ສໍາຄັນຍິ່ງໃນການເສີມສ້າງຂີດຄວາມສາມາດທາງດ້ານວິຊາການໃຫ້ແກ່ຜູ້ຮັບຜິດຊອບໃນການດໍາເນີນຄະດີປົກຄອງເປັນຕົ້ນ ຜູ້ພິພາກສາ, ຜູ້ຊ່ວຍຜູ້ພິພາກສາ ແລະ ພະນັກງານວິຊາການທີ່ກ່ຽວຂ້ອງ ແນໃສ່ປະກອບສ່ວນເຂົ້າໃນການຄຸ້ມຄອງລັດ-ຄຸ້ມຄອງສັງຄົມດ້ວຍລະບຽບກົດໝາຍ ຫຼືລັດທີ່ປົກຄອງດ້ວຍກົດໝາຍ ກໍຄືການຈັດຕັ້ງປະຕິບັດແຜນພັດທະນາລະບົບສານປະຊາຊົນ 5 ປີ ຄັ້ງທີ IV ໃຫ້ມີຜົນສໍາເລັດ.

ຂ່າວ: ຍຸພິນທອງ