ໃນວັນທີ22ມີນາ ຜ່ານມາ,ທ່ານລິນຄໍາດວງສະຫວັນລັດຖະມົນຕີກະຊວງກະສິກໍາແລະປ່າໄມ້ພ້ອມດ້ວຍຄະນະໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານນາງເມວບຣາໂລ (Mel Barlow) ເອກອັກຄະລັດຖະທູດວິສາມັນຜູ້ມີອໍານາດເຕັມແຫ່ງຣາຊະອານາຈັກອັງກິດແລະອຽກລັງເໜືອປະຈໍາສປປລາວ.

ໃນໂອກາດນີ້, ທ່ານລັດຖະມົນຕີກະຊວງກະສິກໍາແລະປ່າໄມ້ໄດ້ສະແດງຄວາມຍິນດີຕ້ອນຮັບທ່ານເອກອັກຄະລັດຖະທູດແລະໄດ້ຕີລາຄາສູງຕໍ່ສາຍພົວພັນອັນດີລະຫວ່າງລາວແລະອັງກິດຕະຫຼອດໄລຍະ70ປີຊຶ່ງໄດ້ປະກອບສ່ວນສໍາຄັນໃນການພັດທະນາເສດຖະກິດ-ສັງຄົມ; ໄດ້ສະແດງຄວາມຂອບໃຈຕໍ່ລັດຖະບານແລະປະຊາຊົນອັງກິດທີ່ໃຫ້ການຊ່ວຍເຫຼືອແກ່ລັດຖະບານແລະປະຊາຊົນລາວໂດຍສະເພາະຂະແໜງການກະສິກໍາແລະປ່າໄມ້; ໄດ້ສະແດງຄວາມເຊື່ອໝັ້ນວ່າໃນໄລຍະທີ່ທ່ານທູດມາປະຕິບັດໜ້າທີ່ຢູ່ສປປລາວຈະມີການຮ່ວມມືກັນຢ່າງໃກ້ຊິດກັບຂະແໜງການກະສິກໍາແລະປ່າໄມ້ເພື່ອປະກອບສ່ວນເຂົ້າໃນການສົ່ງເສີມສາຍພົວພັນຮ່ວມມືໃຫ້ເຕີບໃຫຍ່ຂະຫຍາຍຕົວຫຼາຍຂຶ້ນ. ພ້ອມນີ້, ທ່ານລັດຖະມົນຕີໄດ້ສະເໜີແລກປ່ຽນການຊ່ວຍເຫຼືອຈາກລັດຖະບານອັງກິດໂດຍຜ່ານທ່ານເອກອັກຄະລັດຖະທູດເພື່ອການພົວພັນຮ່ວມມືກັບສາກົນໃນການດຶງດູດການລົງທຶນ, ການຊ່ວຍເຫຼືອຊຶ່ງເປັນທ່າແຮງທີ່ສໍາຄັນໃນການບັນລຸເປົ້າໝາຍແຜນພັດທະນາກະສິກໍາແລະປ່າໄມ້ຂອງກະຊວງກະສິກໍາແລະປ່າໄມ້ເຊັ່ນ: ແຜນງານຄໍ້າປະກັນສະບຽງອາຫານ, ແຜນງານຜະລິດເປັນສິນຄ້າ, ແຜນງານຄຸ້ມຄອງປ່າໄມ້ແບບຍືນຍົງແລະແຜນງານພັດທະນາຊົນນະບົດແກ້ໄຂຄວາມທຸກຍາກ.

ທ່ານນາງເມວບຣາໂລໄດ້ສະແດງຄວາມຂອບໃຈຕໍ່ທ່ານລິນຄໍາດວງສະຫວັນພ້ອມດ້ວຍຄະນະທີ່ໄດ້ໃຫ້ການຕ້ອນຮັບອັນອົບອຸ່ນໃນຄັ້ງນີ້ແລະທັງໃຫ້ຄໍາໝັ້ນສັນຍາວ່າຈະພະຍາຍາມຢ່າງສຸດຄວາມສາມາດເພື່ອຊຸກຍູ້ການພົວພັນຮ່ວມມືລາວ-ອັງກິດກໍຄືຊຸກຍູ້ການພົວພັນຮ່ວມມື, ການຊ່ວຍເຫຼືອກະຊວງກະສິກໍາແລະປ່າໄມ້ໃຫ້ສືບຕໍ່ໄດ້ຮັບການເສີມຂະຫຍາຍຍິ່ງໆຂຶ້ນໃນຕໍ່ໜ້າ.

(ຂ່າວ: ກະຊວງກະສິກຳ ແລະ ປ່າໄມ້)