ໃນໂອກາດເຄື່ອນໄຫວວຽກງານຢູ່ແຂວງອຸດົມໄຊ ໃນວັນທີ 21 ພຶດສະພາຜ່ານມາ, ສະຫາຍ ບຸນທອງ ຈິດມະນີ ກໍາມະການກົມການເມືອງສູນກາງພັກຜູ້ປະຈຳການຄະນະເລຂາທິການສູນກາງພັກຮອງປະທານປະເທດ ໄດ້ພົບປະໂອ້ລົມພະນັກງານການນຳແຂວງອຸດົມໄຊ ໂດຍລົງເລິກການຕິດຕາມ, ຊຸກຍູ້ການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນຂອງພັກ ໂດຍມີ ສະຫາຍບຸນຄົງ ຫຼ້າຈຽມພອນ ກຳມະການສຳຮອງສູນກາງພັກເລຂາພັກແຂວງເຈົ້າແຂວງອຸດົມໄຊ, ມີຄະນະປະຈຳພັກແຂວງ, ກຳມະການພັກແຂວງ, ເລຂາພັກເມືອງ, ເຈົ້າເມືອງ-ຮອງເຈົ້າເມືອງ ເຂົ້າຮ່ວມ.
ໂອກາດນີ້, ສະຫາຍ ບຸນຄົງ ຫຼ້າຈຽມພອນ ໄດ້ລາຍງານສະພາບການນໍາພາ-ຊີ້ນໍາ ຈັດຕັ້ງປະຕິ ບັດວຽກງານຮອບດ້ານ ຂອງຄະນະບໍລິຫານງານພັກແຂວງອຸດົມໄຊ ໃນໄລຍະ 5 ເດືອນຜ່ານມາ ໂດຍສະເພາະວຽກງານການເມືອງ-ແນວຄິດ, ວຽກງານປ້ອງກັນຊາດ, ປ້ອງກັນຄວາມສະຫງົບ, ແຜນພັດທະນາເສດຖະກິດ-ສັງຄົມ ປະຈໍາປີ 2024, ວຽກງານວັດທະນະທໍາ-ສັງຄົມ, ວຽກງານກໍ່ສ້າງຮາກຖານການເມືອງ ໂດຍຕິດພັນກັບຄວາມຄືບໜ້າຂອງການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນຂອງພັກ. ມາຮອດປັດຈຸບັນ, ແຂວງອຸດົມໄຊ ໄດ້ມີການຜັນຂະຫຍາຍນິຕິກຳຂອງຂັ້ນເທິງ, ແຕ່ງຕັ້ງຄະນະຊີ້ນຳ, ອະນຸກຳມະການກະກຽມ ແລະ ດຳເນີນກອງປະຊຸມໃຫຍ່ ອົງຄະນະພັກແຂວງຄັ້ງທີ X, ກອງປະຊຸມໃຫຍ່ອົງຄະນະພັກເມືອງ, ກອງບັນຊາການ ປກຊ-ປກສ ແຂວງ, ຮາກຖານ ສຳນັກງານອ້ອມຂ້າງແຂວງ, ເມືອງ ແລະ ຮາກຖານບ້ານ, ມອບວຽກໃຫ້ບັນດາພະແນກການ, ອົງການຈັດຕັ້ງທີ່ກ່ຽວຂ້ອງ, ສ້າງເປັນປຶ້ມຄູ່ມື, ບົດແນະນຳຂັ້ນຕອນໃນການຈັດຕັ້ງປະຕິບັດ ແຕ່ລະດ້ານຢ່າງລະອຽດ, ໄດ້ເຜີຍແຜ່, ເຊື່ອມຊຶມ ບັນດານິຕິກຳຕ່າງໆທີ່ກ່ຽວຂ້ອງ ທັງຂັ້ນສູນກາງ ແລະ ຂັ້ນແຂວງ ໃຫ້ບັນດາພະນັກງານຫຼັກແຫຼ່ງໄດ້ຈັດຕັ້ງການທົດລອງ ດຳເນີນກອງປະຊຸມໃຫຍ່ຢູ່ບ້ານເທດສະບານແຂວງຈຳນວນໜຶ່ງ, ມອບໃຫ້ການນຳເມືອງ ນຳເອົາເນື້ອໃນຈິດໃຈ ການດຳເນີນກອງປະຊຸມໃຫຍ່ 3 ຂັ້ນຂອງພັັກ ໄປຈັດຕັ້ງຜັນຂະຫຍາຍໃຫ້ເລິກເຊິ່ງກວ້າງຂວາງ. ໃນນີ້, ຢູ່ຂັ້ນຮາກຖານບ້ານ, ສຳນັກງານ-ອົງການອ້ອມຂ້າງເມືອງ ຈໍານວນ 743 ຮາກຖານ ເທົ່າກັບ 77,40% ແມ່ນສຳເລັດໃນການດຳເນີນກອງປະຊຸມໃຫຍ່ຂອງຕົນແລ້ວ ແລະ ຍັງສືບຕໍ່ດຳເນີນ ຈຳນວນ 217 ຮາກຖານ ເທົ່າກັບ 22,60%, ກອງປະຊຸມໃຫຍ່ອົງຄະນະພັກເມືອງ ຄາດວ່າຈະໄດ້ຈັດຕັ້ງປະຕິບັດ ແລະ ດຳເນີນຕົວຈິງໃນຕົ້ນປີ 2025 ນີ້.ສ່ວນກອງປະຊຸມໃຫຍ່ ອົງຄະນະພັກແຂວງ ແມ່ນຈະໄດ້ດຳເນີນ ໃນໄລຍະກາງປີ 2025.
ການພົບປະໂອ້ລົມຄັ້ງນີ້, ສະຫາຍ ບຸນທອງ ຈິດມະນີ ໄດ້ຍ້ອງຍໍຊົມເຊີຍ ຕໍ່ຜົນສຳເລັດທີ່ແຂວງອຸດົມໄຊ ຍາດມາໄດ້ໃນໄລຍະ 5 ເດືອນຜ່ານມາ, ພ້ອມທັງໃຫ້ສືບຕໍ່ສູ້ຊົນຈັດຕັ້ງປະຕິບັດວຽກງານຮອບ ດ້ານ ໃຫ້ບັນລຸຕາມລະດັບຄາດໝາຍ ແລະ ທິດທາງແຜນການທີ່ກຳນົດໄວ້. ພ້ອມທັງ, ເນັ້ນບາງບັນຫາ ກ່ຽວກັບການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນ ຂອງພັກ ໂດຍສະເພາະການນຳເອົານິຕິກຳຂັ້ນສູນກາງມາຈັດຕັ້ງຜັນຂະຫຍາຍ, ກຳນົດ ແລະ ຈັດຕັ້ງ ແບ່ງຄວາມຮັບຜິດຊອບໃຫ້ແຕ່ລະພາກສ່ວນ; ສຶກສາອົບຮົມທາງດ້ານວຽກງານການເມືອງ-ແນວຄິດ ພະນັກງານຫຼັກແຫຼ່ງໃຫ້ຮັບຮູ້, ເຂົ້າໃຈ ຕໍ່ແນວທາງ ແລະ ກົດລະບຽບຂອງພັກ, ໜ້າທີ່ ແລະ ຂໍ້ຫ້າມຂອງສະມາຊິກພັກ; ມີແນວຄິດແຂ່ງຂັນໃນການສ້າງສາພັດທະນາ ແລະ ສ້າງຄວາມເຂັ້ມແຂງທາງດ້ານເສດຖະກິດຄອບຄົວ; ຄະນະພັກ, ຄະນະນຳ ຕ້ອງຕິດຕາມ ແລະ ຊຸກຍູ້ຢ່າງໃກ້ຊິດຕິດແທດ ໃນການດຳເນີນກອງປະຊຸມໃຫຍ່ແຕ່ລະຂັ້ນ ແນໃສ່ເຮັດໃຫ້ການຈັດຕັ້ງປະຕິບັດ ການດຳເນີນກອງປະຊຸມໃຫຍ່ 3 ຂັ້ນຂອງພັກ ຢູ່ໃນແຂວງອຸດົມໄຊ ມີຜົນສຳເລັດຕາມລະດັບຄາດໝາຍ.
(ຂ່າວ-ພາບ: ຄານມະນີ ຮຽນດໍຈັນ)