ພີທີມອບ-ຮັບໜ້າທີ່ຫົວໜ້າການທະຫານ, ຫົວໜ້າການເມືອງ ກອງສີລະປະກອນກອງທັບ ຜູ້ເກົ່າ ແລະ ຜູ້ໃໝ່ ຈັດຂຶ້ນໃນວັນທີ 29 ພຶດສະພາ ນີ້, ໂດຍການເປັນປະທານຂອງ ສະຫາຍ ພັນເອກ ແກ້ວສຸວັນ ຜາງພິລາວົງ ຮອງຫົວໜ້າກົມໂຄສະນາອົບຮົມ ກົມໃຫຍ່ການເມືອງກອງທັບ, ມີຄະນະພັກ-ຄະນະບັນຊາ ແລະ ພະນັກງານຫຼັກແຫຼ່ງເຂົ້າຮ່ວມ.
   ສະຫາຍ ພັນເອກ ສຸວັນນີ ດວງປະເສີດ ຫົວໜ້າການເມືອງ (ຜູ້ເກົ່າ) ໄດ້ຜ່ານບົດສະຫຼຸບຫຍໍ້ ໃນການນຳພາ-ຊີ້ນຳ ບັນດາໜ້າວຽກທີ່ໄດ້ຈັດຕັ້ງປະຕິບັດຕາມພາລະບົດບາດ, ສິດ ແລະ ໜ້າໃນໄລຍະຜ່ານມາ,  ໂດຍປະຕິບັດຕາມ 4 ໜ້າທີ່ໃຫຍ່ 26 ແຜນງານຂອງຄະນະພັກກະຊວງປ້ອງປະເທດ, ມະຕິກອງປະຊຸມໃຫຍ່ຄັ້ງທີ V ຂອງຄະນະພັກກົມໃຫຍ່ການເມືອງກອງທັບ ແລະ ທິດທາງແຜນການຂອງກົມກອງວາງອອກໝູນໃຊ້ເຂົ້າໃນເງື່ອນໄຂສະພາບຕົວຈິງຂອງກົມກອງແມ່ນໄດ້ເອົາໃຈໃສ່ຊີ້ນໍາ-ນໍາພາ, ສຶກສາອົບຮົມ ພະນັກງານ-ນັກຮົບເຊື່ອໝັ້ນຕໍ່ການນໍາພາຂອງພັກ, ໜ້າທີ່ການເມືອງຂອງກອງທັບ ແລະ ສະພາບການ ຜັນແປຂອງໂລກ, ພາກພື້ນ ລວມທັງພາຍໃນປະເທດ ຮັບຮູ້, ເຂົ້າໃຈເລິກເຊິ່ງ-ທົ່ວເຖິງ, ຈໍາແນກໄດ້ ມິດ-ສັດຕູຈະແຈ້ງ, ເຄື່ອນໄຫວເກັບກຳສະພາບ ຂອບເຂດກົມກອງຮັບຜິດຊອບ, ສະພາບການເມືອງ ພາຍໃນ, ຄວາມເປັນລະບຽບຮຽບຮ້ອຍຂອງກົມກອງ ແລະ ນໍາພາດໍາເນີນຊີວິດການເມືອງ, ສ່ອງແສງ ລາຍງານສະພາບການເປັນປົກກະຕິ ຮັບປະກັນໃຫ້ກົມກອງມີຄວາມສະຫງົບປອດໄພໂດຍພື້ນຖານ ແລະ ເຮັດສຳເລັດໜ້າທີ່ການເມືອງຂອງຕົນ ດ້ວຍຄວາມຮັບຜິດຊອບສູງ.
   ຈາກນັ້ນກໍໄດ້ເຊັນບົດບັນທຶກ ມອບ-ຮັບ ໜ້າທີ່ ລະຫວ່າງ ສະຫາຍ ພັນເອກ ຄຳພາ ດວງພະຈັນ ຫົວໜ້າການທະຫານ ກອງສີລະປະກອນກອງທັບ (ຜູ້ເກົ່າ) ແລະ ສະຫາຍ ພັນໂທ ອຸດົມ ບຸດຕະວົງ ຫົວໜ້າການທະຫານ (ຜູ້ໃໝ່), ສະຫາຍ ສຸວັນນີ ດວງປະເສີດ ຫົວໜ້າການເມືອງ (ຜູ້ເກົ່າ) ແລະ ສະຫາຍ ພັນໂທ ຈັນທີ ບຸດດາແກ້ວ ຫົວໜ້າການເມືອງ (ຜູ້ໃໝ່). 
ຂ່າວ-ພາບ: ນົກ ບຸນມາເລີດ