ພີທີມອບ-ຮັບໜ້າທີ່ຫົວໜ້າຫ້ອງການເມືອງ ກົມໃຫຍ່ການເມືອງກອງທັບລະຫວ່າງຜູ້ເກົ່າ ແລະ ຜູ້ໃໝ່ໄດ້ຈັດຂຶ້ນໃນ 3 ມິຖຸນານີ້ໂດຍການເປັນປະທານຂອງສະຫາຍພົນຈັດຕະວາ ພູມີ ດາລາເພັດ ກຳມະການຄະນະພັກກະຊວງປ້ອງກັນປະເທດ ຮອງຫົວໜ້າກົມໃຫຍ່ການເມືອງກອງທັບ, ມີຄະນະຫ້ອງການເມືອງພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
    ສະຫາຍພົນຈັດຕະວາ ບຸນເຫຼືອ ໄຊຍະເພັນ ຫົວໜ້າຫ້ອງການເມືອງ (ຜູ້ເກົ່າ) ໄດ້ຜ່ານບົດສະຫຼຸບຫຍໍ້ໃນການນຳພາ-ຊີ້ນຳໆພາຈັດຕັ້ງເຄື່ອນໄຫວຕະຫຼອດໄລຍະຜ່ານມາ ຍົກໃຫ້ເຫັນທີ່ຕັ້ງ, ພາລະບົດບາດໃນການເປັນເສນາທິການດ້ານວຽກງານພັກ-ວຽກງານການເມືອງໃຫ້ແກ່ຄະນະພັກກົມໃຫຍ່ການເມືອງກອງທັບ ໂດຍສະເພາະແມ່ນວຽກງານການສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ, ການໂຄສະນາເຜີຍແຜ່ວຽກງານດ້ານຕ່າງໆໂດຍປິ່ນອ້ອມ 4 ໜ້າທີ່ໃຫຍ່ 26 ແຜນງານທີ່ຄະນະພັກກະຊວງປ້ອງກັນປະເທດວາງອອກ. ຈາກນັ້ນ, ໄດ້ເຊັນບົດບັນທຶກມອບ-ຮັບໜ້າທີ່ລະຫວ່າງສະຫາຍພົນຈັດຕະວາ ບຸນເຫຼືອ ໄຊຍະເພັນ ຫົວໜ້າຫ້ອງການເມືອງ (ຜູ້ເກົ່າ) ແລະ ສະຫາຍ ພັນເອກ ແພງສີ ເສັງວິໄຊ ຫົວໜ້າຫ້ອງການເມືອງຜູ້ໃໝ່ (ຜູ້ໃໝ່).
    ໂອກາດນີ້, ສະຫາຍພົນຈັດຕະວາ ພູມີ ດາລາເພັດ ໄດ້ສະແດງຄວາມຍ້ອງຍໍຊົມເຊີຍຕໍ່ສະຫາຍຫົວໜ້າຫ້ອງການເມືອງ (ຜູ້ເກົ່າ) ທີ່ໄດ້ສຸມເຫື່ອແຮງ, ສະຕິປັນຍາປະກອບສ່ວນເຂົ້າໃນວຽກງານຊີ້ນຳ-ນໍາພາຈົນເຮັດສໍາເລັດໜ້າທີ່ອັນມີກຽດສະຫງ່າຂອງຕົນທີ່ຂັ້ນເທິງມອບໝາຍໃຫ້ໃນໄລຍະຜ່ານມາພ້ອມນີ້ຍັງໄດ້ເນັ້ນໃຫ້ຫົວໜ້າຫ້ອງການ(ຜູ້ໃໝ່) ຈົ່ງເອົາໃຈໃສ່ຍົກສູງຄວາມຮັບຜິດຊອບຕໍ່ໜ້າທີ່ການເມືອງຂອງຕົນໃຫ້ໜັກແໜ້ນ, ສຶກສາອົບຮົມແນວຄິດ-ການເມືອງໃຫ້ພະນັກງານເປັນຫຼັກ, ຮັກສາຄວາມສາມັກຄີຢູ່ພາຍໃນໃຫ້ແໜ້ນແຟ້ນ, ມີແບບແຜນວິທີເຮັດວຽກແບບລວມສູນປະຊາທິປະໄຕເປັນໝູ່ຄະນະ, ແບ່ງບຸກຄົນຮັບຜິດຊອບເພື່ອພ້ອມກັນເຮັດສຳເລັດໜ້າທີ່ວຽກງານທີ່ການຈັດຕັ້ງມອບໜາຍໃຫ້ໄດ້ຮັບໝາກຜົນສູງກວ່າເກົ່າ. 
ຂ່າວ-ພາບ: ນົກ ບຸນມາເລີດ