ໃນວັນທີ 29 ພຶດສະພາ 2024 ຜ່ານມານີ້, ທ່ານ ບຸນໂຈມ ອຸບົນປະເສີດ ກຳມະການສູນກາງພັກ, ເລຂາພັກແຂວງ, ເຈົ້າແຂວງສະຫວັນນະເຂດ, ພ້ອມດ້ວຍຄະນະ, ມີຫົວໜ້າກອງບັນຊາການ ປກສ ແຂວງ, ຫົວໜ້າພະແນກແຜນການ ແລະ ການລົງທຶນແຂວງ, ພະແນກກະສິກຳ ແລະ ປ່າໄມ້, ຫ້ອງວ່າການແຂວງ, ພະແນກຖະແຫຼງຂ່າວ-ວັດທະນະທຳ ແລະ ທ່ອງທ່ຽວແຂວງ, ພະແນກໂຍທາທິການ ແລະຂົນສົ່ງ, ໄດ້ໄປພົບປະໂອລົມອຳນາດການປົກຄອງ ແລະ ພະນັກງານຫຼັກແຫຼ່ງ ເມືອງອາດສະພອນ ແລະ ເມືອງໄຊບູລີ ໂດຍມີຄະນະນຳທັງສອງເມືອງໃຫ້ການຕ້ອນຮັບ.

ໂອກາດດັ່ງກ່າວ, ທ່ານ ນາງ ບຸນທະລັງສີ ຄຳມະນີວົງ ກຳມະການພັກແຂວງ ເລຂາພັກເມືອງເຈົ້າເມືອງອາດສະພອນ, ໄດ້ລາຍງານໂດຍສັງເຂບຕໍ່ກັບການນຳພາ-ຊີ້ນຳຮອບດ້ານ, ເມືອງອາດສະພອນ, ທົ່ວເມືອງປະກອບມີ 70 ບ້ານ, ມີ 10,134 ກວ່າຄອບຄົວ, ພົນລະເມືອງ 67,474 ຄົນ, ການພັດທະນາຊົນນະບົດ ແລະ ລຶບລ້າງຄວາມທຸກຍາກ, ຜ່ານການປະເມີນຕາມມາດຖານເງື່ອນໄຂຕາມດຳລັດ 348/ລບ ວ່າດ້ວຍມາດຖານພົ້ນທຸກ, ມາດຖານພັດທະນາ ມີບ້ານພົ້ນທຸກແລ້ວ 47 ບ້ານ, ເທົ່າກັບ 67,14%, ມີຄອບຄົວພົ້ນທຸກ 3,696 ຄອບຄົວ.

ສຳລັບການກະກຽມກອງປະຊຸມໃຫຍ່ 3 ຂັ້ນທົ່ວເມືອງມີສະມາຊິກພັກທັງໝົດ 2, 016 ສະຫາຍ, ຍິງ 484 ສະຫາຍ, ມີຮາກຖານພັກທີ່ຂຶ້ນກັບອົງຄະນະພັກເມືອງ 115 ຮາກຖານ. ໃນນັ້ນ, ປະກອບມີ 06 ຄະນະພັກຮາກຖານ ແລະ 112 ໜ່ວຍພັກ, ປັດຈຸບັນໄດ້ປັບປຸງລະບົບການຈັດຕັ້ງຂັ້ນບ້ານສຳເລັດ 70 ບ້ານ, 89 ໜ່ວຍພັກ ແລະ 04 ຮາກຖານ, ກຳລັງສືບຕໍ່ປັບປຸງໜ່ວຍພັກທີ່ຍັງບໍ່ທັນສຳເລັດ.

ໃນການພົບປະຄັ້ງນີ້,ໄດ້ເປີດໂອກາດໃຫ້ບັນດາພະແນກການໂດຍມີທ່ານ ຫົວໜ້າພະແນກແຜນການ ແລະການລົງທຶນແຂວງ, ພະແນກໂຍທາທິການ ແລະ ຂົນສົ່ງແຂວງ ແລະ ຫົວໜ້າກອງບັນຊາການ ປກສ ແຂວງມີຄຳຄິດຄຳເຫັນໃນວຽກງານຂະແໜງການຕົນ, ເພື່ອເປັນທິດທາງໃນການພັດທະນາ, ຈາກນັ້ນທ່ານ ເຈົ້າແຂວງສະຫວັນນະເຂດ, ໄດ້ສະແດງຄວາມຊົມເຊີຍຕໍ່ຜົນງານຫຼາຍດ້ານທີ່ຄະນະພັກ-ອຳນາດການປົກຄອງເມືອງນຳພາ-ຊີ້ນຳໄດ້ຮັບຜົນສໍາເລັດ, ຜົນງານອັນຍິ່ງໃຫຍ່ກໍ່ຄືການສ້າງເມືອງອາດສະພັງທອງໃຫ້ເປັນເມືອງພົ້ນທຸກ ແລະ ຕໍ່ໄປກໍ່ແມ່ນການສ້າງເມືອງໃຫ້ເປັນເມືອງເຂັ້ມແຂງຮອບດ້ານ.

ພ້ອມດຽວກັນນີ້, ເພື່ອແນະນຳກະກຽມການເປີດກອງປະຊຸມໃຫຍ່ 3 ຂັ້ນຂອງພັກ, ໃຫ້ຄະນະພັກເມືອງກວດກາປະເມີນຄືນບັນດາໜ່ວຍພັກ, ຮາກຖານພັກທີ່ໄດ້ສຳເລັດການດຳເນີນກອງປະຊຸມໃຫຍ່,ເນັ້ນໃຫ້ຄະນະພັກ-ອຳນາດການປົກຄອງເມືອງປັບປຸງຮາກຖານການເມືອງໃຫ້ມີຄວາມໜັກແໜ້ນເຂັ້ມແຂງ, ເພາະຮາກຖານການເມືອງຢູ່ບ່ອນໃດເຂັ້ມແຂງກໍ່ສາມາດແກ້ໄຂປະກົດການຫຍໍ້ທໍ້ໄດ້ໂດຍໄວ, ຈາກນັ້ນໃຫ້ເບິ່ງຄືນຮາກຖານພັກທີ່ບໍ່ໄດ້ປັບປຸງຜ່ານມາຄວນມີການປັບປຸງກົງຈັກການຈັດຕັ້ງພາຍໃນບ້ານ ແລະ ອົງການຈັດຕັ້ງມະຫາຊົນ, ຜູ້ທີ່ຈະລົງສະໝັກໃນອົງຄະນະພັກເມືອງຊຸດຈະມາເຖິງນີ້, ຕ້ອງໄດ້ຜ່ານການລົງກໍ່ສ້າງຮາກຖານຕົວຈິງຢູ່ຂັ້ນບ້ານນຳພາແກ້ໄຂປະກົດການຫຍໍ້ທໍ້, ນຳພາແນວຄິດການເມືອງຂອງປະຊາຊົນໃຫ້ເຊື່ອມຊືມແນວທາງນະໂຍບາຍຂອງພັກແຜນພັດທະນາເສດ ຖະກິດ-ສັງຄົມ,ໃຫ້ປະຊາຊົນມີສ່ວນຮ່ວມໃຫ້ຫຼາຍ, ມີການສະຫຼຸບຕີລາຄາການປະຕິບັດແຜນພັດທະນາເສດ ຖະກິດ-ສັງຄົມໃນ 5 ປີຜ່ານມາໃຫ້ເລິກເຊິ່ງ, ສາມາດຕີລາຄາຈຸດອ່ອນ, ຂໍ້ຄົງຄ້າງ, ເພື່ອສ້າງແຜນໃນ 5 ປີຕໍ່ໜ້າໃຫ້ມີຄວາມລະອຽດ ແລະ ພ້ອມກັນແກ້ໄຂໃຫ້ຖືກຕ້ອງປະຕິບັດໃຫ້ເກີດຜົນແທ້ຈິງໃນແຕ່ລະຂົງເຂດວຽກງານ,ພ້ອມກັນສ້າງຂວນການໃຫ້ພົ້ນເດັ່ນເພື່ອກະກຽມໃຫ້ແກ່ກອງປະຊຸມໃຫຍ່ຂັ້ນຂອງຕົນ.