ວັນທີ6ມິຖຸນາ ຜ່ານມາທີ່ສະໂມສອນແຂວງຫຼວງນໍ້າທາທ່ານນາງສີໃສລືເດດມູນສອນກໍາມະການກົມການເມືອງສູນກາງພັກຄະນະເລຂາທິການສູນກາງພັກຫົວໜ້າຄະນະຈັດຕັ້ງສູນກາງພັກພ້ອມຄະນະໄດ້ພົບປະໂອ້ລົມການນໍາແຂວງຫຼວງນໍ້າທາເນື່ອງໃນໂອກາດທີ່ໄດ້ມາຢ້ຽມຢາມແລະເຮັດວຽກຢູ່ແຂວງຫຼວງນໍ້າທາເຂົ້າຮ່ວມມີທ່ານວຽງສະຫວັດສີພັນດອນກໍາມະການສູນກາງພັກເລຂາພັກແຂວງເຈົ້າແຂວງຫຼວງນໍ້າທາ, ມີຄະນະບໍລິຫານງານພັກແຂວງ, ຮອງເຈົ້າແຂວງ, ກໍາມະການພັກແຂວງ, ເຈົ້າເມືອງ, ຫົວໜ້າພະແນກ-ຮອງພະແນກການ,ກອງບັນຊາການ ປກຊ-ປກສ.

ທ່ານວຽງສະຫວັດສີພັນດອນໄດ້ລາຍງານສະພາບລວມໂດຍຫຍໍ້ຂອງແຂວງໃນການປົກປັກຮັກສາແລະສ້າງສາພັດທະນາແຂວງຫຼວງນໍ້າທາຊຶ່ງໄດ້ສຸມໃສ່ຜັນຂະຫຍາຍແລະຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີXI ຂອງພັກ, ມະຕິກອງປະຊຸມໃຫຍ່ຄັ້ງທີVIII ຂອງອົງຄະນະພັກແຂວງແລະແຜນພັດທະນາເສດຖະກິດ-ສັງຄົມ5ປີຄັ້ງທີIX ຂອງແຂວງແລະຈັດຕັ້ງຜັນຂະຫຍາຍ2ວາລະແຫ່ງຊາດລົງເຖິງທ້ອງຖິ່ນ-ຮາກຖານໃຫ້ສໍາເລັດ, ສັງຄົມມີຄວາມສະຫງົບ, ເສດຖະກິດຂະຫຍາຍຕົວຕໍ່ເນື່ອງ, ລວມຍອດຜະລິດຕະພັນພາຍໃນ (GDP) ບັນລຸໄດ້9.179,27ຕຶື້ກີບ, ໃນນີ້ຂະແໜງກະສິກໍາແລະປ່າໄມ້ກວມ50,40%, ອຸດສາຫະກໍາກວມ28,92%, ການບໍລິການກວມ20,08%, ສະເລ່ຍລາຍຮັບຕໍ່ຫົວຄົນໄດ້2.298,53ໂດລາຕໍ່ຄົນຕໍ່ປີ, 4ເດືອນຕົ້ນປີ2024ສາມາດເກັບລາຍຮັບເຂົ້າງົບປະມານໄດ້776,95ຕື້ກີບ, ເທົ່າກັບ48,65%ຂອງແຜນການປີ, ໃນນີ້ພູດສູນກາງປະຕິບັດໄດ້720,52ຕື້ກີບ, ເທົ່າກັບ50,46%ຂອງແຜນການປີ, ພູດທ້ອງຖິ່ນປະຕິບັດໄດ້56,43ຕື້ກີບ, ເທົ່າກັບ33,39%ຂອງແຜນການປີ, ປະຕິບັດລາຍຈ່າຍໄດ້147,76ຕື້ກີບ, ເທົ່າກັບ37,61%ຂອງແຜນການປີ, ດຸ່ນດຽງງົບປະມານປະຕິບັດໄດ້90,74ຕື້ກີບ, ເທົ່າກັບ40,52%ຂອງແຜນການປີ, ດ້ານພື້ນຖານໂຄງລ່າງໄດ້ປົກປັກຮັກສາ, ກໍ່ສ້າງແລະສ້ອມແປງເສັ້ນທາງກໍໄດ້ຮັບການປັບປຸງແລະຍົກລະດັບເຮັດໃຫ້ການສັນຈອນໄປມາໄດ້ເປັນປົກກະຕິ, ບ້ານທີ່ມີເສັ້ນທາງລົດເຂົ້າເຖິງກວມ100%ຂອງຈໍານວນບ້ານໃນທົ່ວແຂວງ, ໄດ້ນໍາໃຊ້ນໍ້າສະອາດກວມ88,61%, ໄດ້ນໍ້າໃຊ້ນໍ້າປະປາກວມ35%ຂອງຈໍານວນປະຊາກອນໃນທົ່ວແຂວງ, ທົ່ວແຂວງມີທັງໝົດ352ບ້ານ34.616ຄອບຄົວ, ໃນນີ້ມີເມືອງພົ້ນທຸກ2ເມືອງ, ບ້ານພົ້ນທຸກ265ບ້ານ, ບ້ານທຸກຍາກ87ບ້ານ, ບ້ານພັດທະນາ224ບ້ານ, ຄອບຄົວພົ້ນທຸກ30.873ຄອບຄົວ, ຄອບຄົວທຸກຍາກ3.743ຄອບຄົວ, ຄອບຄົວພັດທະນາ28.103ຄອບຄົວ.

ໂອກາດນີ້, ທ່ານນາງສີໃສລືເດດມູນສອນກໍໄດ້ໃຫ້ກຽດໂອ້ລົມຕໍ່ຄະນະບໍລິຫານງາພັກແຂວງຫຼວງນໍ້າທາຊຶ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ການນໍາຂອງແຂວງທີ່ມີຜົນງານອັນພົ້ນເດັ່ນໃນໄລຍະຜ່ານມາກ່ຽວກັບການຈັດຕັ້ງປະຕິບັດວຽກງານຮອບດ້ານພາຍໃນແຂວງລົງເລິກວຽກງານກໍ່ສ້າງພັກ-ພະນັກງານ, ການກະກຽມແລະດໍາເນີນກອງປະຊຸມໃຫຍ່3 ຂັ້ນຂອງພັກຊຶ່ງສະແດງໃຫ້ເຫັນຜົນສໍາເລັດຫຼາຍດ້ານ, ບາງບົດຮຽນແລະຂໍ້ຫຍຸ້ງຍາກໃນການປະຕິບັດວຽກງານດັ່ງກ່າວແລະທ່ານຍັງໄດ້ເນັ້ນໜັກໃຫ້ຄະນະພັກ, ຄະນະນໍາຕ້ອງມີຄວາມເປັນເອກະພາບກັນສູງ, ເສີມຂະຫຍາຍມູນເຊື້ອຄວາມສາມັກຄີພາຍໃນພັກ, ພ້ອມກັນແກ້ໄຂບັນຫາອຸປະສັກຕ່າງໆຮ່ວມກັນກໍ່ສ້າງຊ່ວຍເຫຼືອຊຶ່ງກັນແລະກັນພ້ອມທັງຕ້ານແນວຄິດອັກກະຕິ, ການຈັດຕັ້ງຂອງພັກກໍຄືອົງການບໍລິຫານທຸກຂັ້ນໂດຍສະເພາະຊຸກຍູ້ໃຫ້ປະຊາຊົນເຮັດການຜະລິດໃຫ້ກຸ້ມຕົນເອງ, ຜະລິດໃຫ້ຫຼາຍສົ່ງອອກເປັນສິນຄ້າເພື່ອພັດທະນາຊີວິດການເປັນຢູ່ໃຫ້ນັບມື້ດີຂຶ້ນເປັນກ້າວໆ.

(ຂ່າວ-ພາບ: ອຸ້ມສົມນໍວັນ)