ຕອນເຊົ້າວັນທີ 5 ພະຈິກ ຜ່ານມາ ຢູ່ເທດສະບານນະຄອນ ຫຼວງພະບາງ ໄດ້ຈັດຂະບວນການຍ່າງເພື່ອສຸຂະພາບ ຕ້ອນຮັບພິທີປະກາດແຂວງຫຼວງພະບາງເປັນແຂວງຢຸດຕິການຖ່າຍຊະຊາຍ ໂດຍມີທ່ານ ບຸນເລື່ອມ ມະນີວົງ ຮອງເຈົ້າແຂວງຫຼວງພະບາງ, ພ້ອມດ້ວຍຜູ້ຕາງໜ້າພະແນກການ-ກົມກອງ ເຂົ້າຮ່ວມ.

ທ່ານ ຄໍາສອນ ພົງສະຫວັດດີ ຫົວໜ້າພະແນກສາທາລະນະສຸກແຂວງ ກ່າວວ່າ: ການປະກາດແຂວງຢຸດຕິການຖ່າຍຊະຊາຍມີຄວາມສຳຄັນ ແລະ ຈຳເປັນ ຕໍ່ວຽກງານຊຸມຊົນເປັນເຈົ້າການດ້ານສຸຂະອະນາໄມ ຫຼື ຊຈສ ເພາະການຂາດຫຼັກອະນາໄມ ໂດຍສະເພາະແມ່ນການຖ່າຍຊະຊາຍ ມີຜົນກະທົບຕໍ່ສຸຂະພາບຂອງຊຸມຊົນ ແລະ ສັງຄົມເຊັ່ນ: ການເກີດພະຍາດຖອກທ້ອງ, ແມ່ກາຝາກ, ລ່ອຍແຫຼວ ໂປລີໂອ, ໂລກອະຫິວາ, ການຂາດສານອາຫານໃນເດັກ ແລະ ອື່ນໆ. ມາຮອດປັດຈຸບັນ ໄດ້ສຳເລັດໃນກາດປະກາດເມືອງຢຸດຕິການຖ່າຍຊະຊາຍໃນ 11 ເມືອງ ໜຶ່ງນະຄອນ ຫຼວງພະບາງ ແລະ ພ້ອມທີ່ຈະປະກາດແຂວງຫຼວງພະບາງ ເປັນແຂວງຢຸດຕິການຖ່າຍຊະຊາຍ ຢ່າງເປັນທາງການ ໃນວັນທີ 8 ພະຈິກ 2024 ຜ່ານມານີ້.

ໂອກາດນີ້ ຜູ້ເຂົ້າຮ່ວມ ໄດ້ພ້ອມກັນຍ່າງເພື່ອສຸຂະພາບ ຊຶ່ງເລີ້ມຈາກຂະບວນກອງດູລິຍາງຂອງເຍົາວະຊົນ, ຂະບວນນາງສາວຖືປ້າຍຄຳຂັວນ, ຂະບວນການນຳ ແລະ ຜູ້ເຂົ້າຮ່ວມ ຊຶ່ງເລີ້ມຕົ້ນຈາກໜ້າສວນອາຫານລາດແລງ ໄປຫາ ເສັ້ນທາງໄກສອນພົມວິຫານ, ແລ້ວລ້ຽວຊ້າຍມາເສັ້ນທາງບ້ານມະໂນ ແລະ ມາສີ້ນສຸດຢູ່ສວນອາຫານລາດແລງ.

(ຂ່າວ: ອາພຸດເດດ)