ກົມທະບຽນວິສາຫະກິດ ກະຊວງອຸດສາຫະກໍາ ແລະ ການຄ້າ ຮ່ວມກັບ ພະແນກອຸດສາຫະກໍາ ແລະ ການຄ້າ ແຂວງສາລະວັນ ຈັດຝຶກອົບຮົມການນໍາໃຊ້ລະບົບຂຶ້ນທະບຽນແບບເອເລັກໂຕຣນິກ ຂຶ້ນໃນວັນທີ 5 ພະຈິກ ນີ້, ທີ່ສູນໄອຊີທີ ໂຮງຮຽນ ມສ ສາລະວັນ, ໂດຍການເຂົ້າຮ່ວມຂອງ ທ່ານ ນາງ ກຸແກ້ວ ທອງມະນີລາ ຮອງຫົວໜ້າພະແນກອຸດສາຫະກໍາ ແລະ ການຄ້າ ແຂວງສາລະວັນ, ມີທ່ານ ວັນມີໄຊ ດວງພະຈັນ ຮອງຫົວໜ້າກົມທະບຽນວິສາຫະກິດ ກະຊວງອຸດສາຫະກໍາ ແລະ ການຄ້າ, ມີສໍາມະນາກອນ ຈາກພະແນກອຸດສາຫະກໍາ ແລະ ການຄ້າ ແຂວງສາລະວັນ, ແຂວງເຊກອງເຂົ້າຮ່ວມ.

ໃນການຝຶກອົບຮົມຄັ້ງນີ້, ນັກສໍາມະນາກອນ ຈະໄດ້ຮຽນຮູ້ກ່ຽວກັບການຂຶ້ນທະບຽນວິສາຫະກິດໃໝ່ (ວິສາຫະກິດສ່ວນບຸກຄົນ, ວິສາຫະກິດຮຸ້ນສ່ວນ, ບໍລິສັດຈຳກັດ), ການແກ້ໄຂຂໍ້ມູນວິສາຫະກິດທີ່ບໍ່ຖືຶກຕ້ອງ, ການປ່ຽນແປງເນື້ອໃນທະບຽນວິສາຫະກິດ, ການຍຸບເລີກວິສາຫະກິດ ແລະ ການບໍລິການສະໜອງຂໍ້ມູນທະບຽນວິສາຫະກິດ. ທັງນີ້ ກໍເພື່ອເປັນການສ້າງຄວາມຮັບຮູ້ ເຂົ້າໃຈພາວະວິໄສ ຂອງຄວາມຈຳເປັນຕໍ່ກັບລະບົບດັ່ງກ່າວ ໃນການຮຽນຮູ້ເຕັກນິກອັນໃໝ່ໃຫ້ພະນັກງານວິຊາການນຳໃຊ້ເຂົ້າໃນການຈັດຕັ້ງປະຕິບັດວຽກງານຕົວຈິງຢ່າງເລິກເຊິ່ງ.

(ພາບ-ຂ່າວ: ທິດລານີ ໂຄດໂຍທາ).