ຂ່າວຕ່າງປະເທດລາຍງານ ຫວ່າງມໍ່ໆມານີ້ວ່າ: ຜົນການສຶກສາທີ່ຕີພິມໃນວາລະສານວິທະຍາສາດ Nature ຊຶ່ງແມ່ນໜຶ່ງໃນຄວາມພະຍາຍາມຄັ້ງໃຫຍ່ທີ່ສຸດໃນການປະເມີນຮູບແບບການກິນອາຫານແບບຕາເວັນຕົກມີຜົນກະທົບແນວໃດຕໍ່ສຸຂະພາບຂອງຜູ້ຄົນໃນທົ່ວໂລກ,ໂດຍລະບຸວ່າ: ການບໍລິໂພກເຄື່ອງດື່ມທີ່ມີນ້ໍາຕານເປັນສາເຫດຂອງການເສຍຊີວິດຈາກພະຍາດເບົາຫວານຊະນິດທີ 2, ໂຣກຫົວໃຈ ແລະ ຫຼອດເລືອດ ຂອງຜູ້ຄົນ ປະມານ 340,000 ຄົນຕໍ່ປີໃນທົ່ວໂລກ.

ຜົນການສຶກສາຍັງພົບວ່າ: ເຄື່ອງດື່ມທີ່ມີນໍ້າຕານມີສ່ວນພົວພັນກັບຈຳນວນຄົນເຈັບທີ່ເປັນພະຍາດເບົາຫວານຊະນິດທີ 2 ທີ່ເພີ່ມຂຶ້ນ 2,200,000ຄົນ ແລະ ໂຣກຫົວໃຈ, ຫຼອດເລືອດ 1,200,000ຄົນ ໃນປີ 2020,ໂດຍອັດຕາສ່ວນທີ່ບໍ່ສົມດຸນຂອງກໍລະນີເຫຼົ່ານີ້ຢູ່ໃນພາກພື້ນອາຟຣິກາໃຕ້, ທະເລຊາຍຊາຮາວາ (sub-Saharan Africa)ແລະ ອາເມຣິກາລາຕິນ ຊຶ່ງເປັນສອງທະວີບທີ່ມີການບໍລິໂພກເຄື່ອງດື່ມອັດລົມເພີ່ມຂຶ້ນຫຼາຍທີ່ສຸດໃນຊຸມປີມໍ່ໆມານີ້. ເນື່ອງຈາກ​ບໍ​ລິ​ສັດ​ນ້ຳ​ອັດລົມຕ້ອງປະ​ເຊີນ​ກັບ​ຈຳນວນການ​ຂາຍ​ທີ່​ຫຼຸດ​ລົງ​ໃນ​ອາ​ເມ​ຣິກາ​ເໜືອ ແລະ​ເອີ​ຣົບ. ດັ່ງນັ້ນ, ຈຶ່ງພະຍາຍາມຊອກຫາລູກຄ້າໃໝ່ໃນປະເທດທີ່ກໍາລັງພັດທະນາ.

ໜັງສືພິມ New York Times ​ໄດ້​ລາຍ​ງານ​ກ່ຽວ​ກັບຜົນ​ການ​ສຶກສາ​ດັ່ງກ່າວວ່າ: ຈຳນວນຜູ້ເສຍຊີວິດທີ່ມີການຄາດ​ຄະ​ເນ​ໄວ້ 340,000 ຄົນນັ້ນ ​​ເພີ່ມ​ຂຶ້ນ​ຢ່າງ​ຫຼວງ​ຫຼາຍ​ຈາກ​ການ​ປະເມີນ​​ວ່າເຄື່ອງດື່ມທີ່ມີນໍ້າຕານສົ່ງ​ຜົນ​ກະທົບ​ຕໍ່​ສຸຂະພາບ​ຂອງ​ຄົນ​ໃນ​ທົ່ວ​ໂລກ​ໃນຄັ້ງກ່ອນແບບໃດແນ່. ໂດຍການຄົ້ນຄວ້າວິໄຈ ໃນປີ 2015 ທີ່ຕີພິມໃນວາລະສານ Circulation ຄາດ​ຄະ​ເນ​ວ່າອາດມີຜູ້ເສຍຊີວິດຈາກການບໍລິໂພກເຄື່ອງດື່ມທີ່ມີນໍ້າຕານທົ່ວໂລກ 184,000 ຄົນ​ໃນ​ປີ 2010.