ໂຄງການພັດທະນາໄຟຟ້າພະລັງງານລົມ ມອນຊູນວິນພາວເວີ້ ໂດຍໄດ້ເລີ່ມລົງມືກໍ່ສ້າງມາແຕ່ເດືອນມີນາ 2023 ມີມູນຄ່າການກໍ່ສ້າງທັງໝົດ 900 ລ້ານກວ່າໂດລາສະຫະລັດ. ປັດຈຸບັນສໍາເລັດແລ້ວ 90.14% ຄາດຄະເນຈະໃຫ້ສໍາເລັດ ແລະ ເປີດນໍາໃຊ້ຢ່າງເປັນທາງການໃນປີ 2025.

ທ່ານ ຊາຄິດ ດວງໃຈ ຜູ້ຈັດການດ້ານສັງຄົມ ບໍລິສັດມອນຊູນວິນ ພາວເວີ້ ໄດ້ລາຍງານໃນໂອກາດທ່ານ ນາງ ປິ່ງຄໍາ ລາຊະສິມມາ ປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ສະພາແຫ່ງຊາດ ພ້ອມຄະນະ ໄດ້ລົງເຄື່ອນໄຫວຢ້ຽມຢາມ, ຕິດຕາມ ແລະ ຊຸກຍູ້ການພັດທະນາ ໂຄງການດັ່ງກ່າວ ເມື່ອບໍ່ດົນມານີ້ວ່າ: ໂຄງການດັ່ງກ່າວ ຕັ້ງຢູ່ເມືອງດາກຈຶງ ແຂວງເຊກອງ ແລະ ສ່ວນໜຶ່ງຂອງເມືອງຊານໄຊ ແຂວງອັດຕະປື ມີເສົາກັງຫັນລົມທັງໝົດ 133 ຕົ້ນ, ມີກໍາລັງຕິດຕັ້ງທັງໝົດ 600 ເມກາວັດ, ປັດຈຸບັນສໍາເລັດແລ້ວ 114 ຕົ້ນ. ເສົາກັງຫັນລົມແຕ່ລະຕົ້ນ ແມ່ນຕັ້ງຢູ່ພື້ນຖານທີ່ແຂງແກ່ນ ແລະ ໝັ້ນຄົງ, ກວ້າງປະມານ 22 ແມັດ, ເລິກ 35 ແມັດ, ລວງສູງຂອງເສົາ 110 ແມັດ ແລະ ໃບພັດຍາວ 84 ແມັດ, ຢູ່ເທິງສຸດ ຈະເປັນເຄື່ອງຍົນຮອງຮັບນໍ້າໜັກໄດ້ຫຼາຍກວ່າ 100 ໂຕນ ແລະ ແຕ່ລະເສົາສາມາດຜະລິດກະແສໄຟຟ້າໄດ້ 4.51 ເມກາວັດ.

ໃນໂອກາດນີ້, ທ່ານ ນາງ ປິ່ງຄໍາ ລາຊະສິມມາ ຍັງໄດ້ຊີ້ນໍາບໍລິສັດ ຜູ້ພັດທະນາໂຄງການ ແລະ ຜູ້ຮັບເໝົາກໍ່ສ້າງໂຄງການ ຈົ່ງສືບຕໍ່ປະຕິບັດບັນດາກິດຈະກໍາຕ່າງໆ ຂອງໂຄງການໃຫ້ດໍາເນີນໄປຢ່າງມີປະສິດທິພາບ ແລະ ປະສິດທິຜົນ, ຮັບປະກັນຄວາມປອດໄພ, ຖືກຕ້ອງຕາມລະບຽບກົດໝາຍ; ເອົາໃຈໃສ່ໃນການແກ້ໄຂບັນດາຜົນກະທົບຕ່າງໆ ໂດຍສະເພາະຕໍ່ຊີວິດການເປັນຢູ່ຂອງປະຊາຊົນ ແລະ ສິ່ງແວດລ້ອມ; ເອົາໃຈໃສ່ອະນຸລັກສິ່ງແວດລ້ອມ ແລະ ມີສ່ວນຮ່ວມໃນການຟື້ນຟູຊີວິດການເປັນຢູ່ ແລະ ພັດທະນາຊຸມຊົນ; ປຸກລະດົມປະຊາຊົນໃນທ້ອງຖິ່ນໃຫ້ຮັບຮູ້ເຂົ້າໃຈ ແລະ ມີສ່ວນຮ່ວມພັດທະນາໂຄງການ ເນື່ອງຈາກວ່າ ໂຄງການດັ່ງກ່າວ ເປັນໂຄງການຍຸດທະສາດສໍາຄັນ ຂອງພັກ-ລັດຖະບານ ກໍຄືຂອງແຂວງເຊກອງ ແລະ ເປັນໂຄງການໄຟຟ້າພະລັງລົມແຫ່ງທໍາອິດ ຂອງ ສປປ ລາວ ແລະ ໃຫຍ່ທີ່ສຸດໃນຂົງເຂດອາຊີຕາເວັນອອກສ່ຽງໃຕ້. ສະນັ້ນ, ການກໍ່ສ້າງໂຄງການນີ້ ຈຶ່ງມີຄວາມໝາຍສໍາຄັນປະກອບສ່ວນເຂົ້າໃນການສ້າງສາ ແລະ ພັດທະນາປະຊາຊາດ ກໍຄືການພັດທະນາ ເສດຖະກິດ-ສັງຄົມ, ສ້າງວຽກເຮັດງານທໍາ ແລະ ແກ້ໄຂຄວາມທຸກຍາກຂອງປະຊາຊົນ ໃນທ້ອງຖິ່ນໃຫ້ຫຼຸດລົງເທື່ອລະກ້າວ.

(ຂ່າວ: ສັນຍາ, ພາບ: ນາລີວັນ)