ໃນໂອກາດສະເຫຼີມສະຫຼອງວັນສ້າງຕັ້ງກອງທັບປະຊາຊົນປະຕິວັດລາວ (ປປລາວ) ຄົບຮອບ 76 ປີ (20ມັງກອນ 1949-20 ມັງກອນ 2025) ທີ່ຈະໝູນວຽນບັນຈົບຄົບຮອບອີກວາລະໜຶ່ງ ໃຫ້ມີບັນຍາກາດຟົດຟື້ນແຂວງຫຼວງນໍ້າທາ ໄດ້ສ້າງຂະບວນການແຂ່ງຂັນກິລາບານເຕະຮຸ້ນອາວຸໂສຂຶ້ນ ຢູ່ທີ່ເດີ່ນກິລາຂອງແຂວງ ໃນວັນວັນທີ 13 ມັງກອນ 2025, ໃຫ້ກຽດເຂົ້າຮ່ວມຂອງທ່ານ ວຽງສະຫວັດ ສີພັນດອນ ເຈົ້າແຂວງໆຫຼວງນ້ຳທາ,ມີຕາງໜ້າຈາກພະແນກການທີ່ກ່ຽວຂ້ອງຂອງແຂວງ ຕະຫຼອດຮອດນັກກິລາເຂົ້າຮ່ວມ.

ການແຂ່ງຂັນກິລາບານເຕະໃນຄັ້ງນີ້ ປະກອບມີທິມກິລາເຂົ້າຮ່ວມທັງໝົດ 4 ທິມຄື: ທີມການນຳຂອງແຂວງ, ທີມກອງບັນຊາການທະຫານແຂວງ, ທີມກອງບັນຊາການ ປກສ ແຂວງ ແລະ ທີມນັກທຸລະກິດແຂວງ. ຜ່ານການແຂ່ງຂັນສາມາດສະຫຼຸບໄດ້ວ່າ: ທີ 1 ທີມການນໍາຂອງແຂວງ, ທີ 2 ນັກທຸລະກິດ, ທີ 3 ກອງບັນຊາການ ປກສ ແຂວງ ແລະ ທີ 4 ກອງບັນຊາການ ທະຫານແຂວງ, ໃຫ້ກຽດມອບຂັນ ແລະ ລາງວັນໂດຍທ່ານເຈົ້າແຂວງຫຼວງນ້ຳທາ.

(ຂ່າວ: ແກ້ວ ກ໋ວາງບັນແຄັດ)