ເພື່ອຂະຫຍາຍແລະຊອກຫາຕະຫຼາດການທ່ອງທ່ຽວໃໝ່ໃຫ້ເປັນທີ່ຮູ້ຈັກໃຫ້ຫຼາຍຂຶ້ນຂອງບັນດາປະເທດສະມາຊິກອາຊຽນ ກໍຄືພາກພື້ນແລະສາກົນ. ສປປ ລາວໄດ້ນຳເອົາຜະລິດຕະພັນການທ່ອງທ່ຽວ ເຂົ້າຮ່ວມວາງສະແດງໃນງານວາງສະແດງຜະລິດຕະພັນການທ່ອງທ່ຽວອາຊຽນ 2025 (TRAVEX 2025) ຊຶ່ງໄດ້ຈັດຂຶ້ນໃນລະຫວ່າງວັນທີ 15-20 ມັງກອນ 2025 ທີ່ລັດຈໍຮໍ ບາຣູ ປະເທດມາເລເຊຍ ໂດຍການນຳເອົາຜະລິດຕະພັນການທ່ອງທ່ຽວມາວາງສະແດງຊຶ່ງເປັນການເປີດໂອກາດໃຫ້ຜູ້ຊື້-ຜູ້ຂາຍ ຜູ້ປະກອບການທຸລະກິດການທ່ອງທ່ຽວຈາກບັນດາປະເທດອາຊຽນ ໄດ້ຮູ້ການທ່ອງທ່ຽວລາວຫຼາຍຂຶ້ນທັງເປັນການເປີດໂອກາດໃຫ້ບໍລິສັດທ່ອງທ່ຽວຊອກຫາຄູ່ຄ້າ ກໍຄືຄູ່ຮ່ວມມືໃນການຂະຫຍາຍການຕະຫຼາດທຸລະກິດທ່ອງທ່ຽວໃຫ້ກວ້າງອອກຕື່ມ.

ໃນໂອກາດນີ້, ທ່ານ ເກດຕະສອນ ສຸນດາຣາຫົວໜ້າພະແນກກິດຈະກຳການຕະຫຼາດທ່ອງທ່ຽວ ຕາງໜ້າກົມໂຄສະນາການທ່ອງທ່ຽວກະຊວງຖະແຫຼງຂ່າວ, ວັດທະນະທຳ, ແລະ ທ່ອງທ່ຽວ(ຖວທ) ໄດ້ໃຫ້ຮູ້ວ່າ: ສປປ ລາວ ມີຫ້ອງວາງສະແດງການທ່ອງທ່ຽວລາວ ຂະໜາດ 3×6 ແມັດຫຼື 18 ຕາແມັດ ໃນນັ້ນ ກະຊວງ ຖວທ ໄດ້ລົງທຶນເຊົ່າຮ້ານວາງສະແດງຈຳນວນໜຶ່ງຮ້ານຂະໜາດ 3×3 ແມັດລວມທັງການສ້າງຮ້ານແລະການປະດັບປະດາຕົບແຕ່ງຮ້ານ. ນອກຈາກນັ້ນ, ໂຄງການພັດທະນາໂຄງລ່າງພື້ນຖານເພື່ອສົ່ງເສີມການທ່ອງທ່ຽວໄລຍະ 2 ກໍໄດ້ໃຫ້ການສະໜັບສະໜູນຈຳນວນ 1 ຮ້ານວາງສະແດງຂະໜາດ 3×3 ແມັດ.

ພາຍໃນງານ TRAVEX 2025 ຄັ້ງນີ້ ໄດ້ເຊີນບັນດາຜູ້ປະກອບການທຸລະກິດການທ່ອງທ່ຽວ,ໂຮງແຮມເຂົ້າຮ່ວມງານຈໍານວນ 15 ພາກສ່ວນ ໂດຍໄດ້ຮັບການຖືກເຊີນມາແບບຜູ້ຊື້ (Buyers) ທີ່ອົງການທ່ອງທ່ຽວປະເທດມາເລເຊຍໃຫ້ການຕ້ອນຮັບ, ເພື່ອຮ່ວມກັນໂຄສະນາການທ່ອງທ່ຽວລາວໃຫ້ກັບບັນດາປະເທດອາຊຽນໃນພາກພື້ນໄດ້ຮັບຮູ້ທ່າແຮງດ້ານການທ່ອງທ່ຽວຂອງ ສປປ ລາວ ໃຫ້ຫຼາຍຂຶ້ນ.

ຂ່າວ-ພາບ: ຍຸຸພິນທອງ